達明一派兜兜轉轉演演唱唱會




其實唔算好熟達明一派,又係「今次唔睇唔知第時仲有冇得睇」買左飛先算。最唔妥當然係買加場第三晚,之後再話仲有第二次加場開多一晚,對我呢種鍾意睇尾場人士黎講,喊又唔係爆粗又唔係。


好在真係好好睇,兩個人玩得出以前種感覺,雖然九幾散band後再出之新歌弱得多,一堆'80s金曲聽到人好感動,我坐近山頂位,周圍成班阿叔玩到好high。對黃耀明從來興趣唔大,作為第一次睇佢現場,同預期中仲有段距離但唱同演已好高水準,劉以達就睇得好滿足,結他玩晒bow & e-bow加估佢唔到地有玩《一額汗》,同佢現場好識搞笑。想當年仲坐緊皆旺時有次撞到佢,真人非常之正常講野唔漏口思路好清晰係正常到嚇親你果種,而家變番周星馳電影入面種窒下窒下。未食藥?


不過唔知係咪位置關係,黎紅館咁多次,今場係音響最唔理想一場,全隊人爭聲時有發生成日朦朧一片。達明種音樂注重層次感,音響同音質比一般演唱會有更高要求,但明顯做唔到非常可惜。或者去其他場如機博搞會更好?


驚喜是見到「少年鼓神」阿勳。十年前仲睇緊佢幫indie band去Tom Lee比賽之類打session的VCD(冇錯係VCD,年代幾久遠),勁到飛起 - 真係飛起,鼓棍飛到大hall天花板跌番落黎接住繼續打咁型。十年後今日黎到紅館睇佢live。好多人未必知,聽落好似九唔搭八,但King Ly Chee第一隻碟係佢打。更加唔會有人知係,好多年前去學鼓時,我差少少做到佢徒弟,騎騎。如果真係拜到佢為師,可能最後唔會放棄。


最有趣有香港中樂團嗩吶首席郭雅志,睇佢同中樂團表演就試過,每次到佢出場搶晒成團風頭,係估唔到紅館演唱會都會見到佢,乜都可以吹一餐。借坐我後面個阿太一句:


「嘩,條友好吹得下喎!」


我覺得今場音樂唔算做得非常好其實有點悶場(音響相當累事),但全場反應好好,贏的是本土色彩。鍾意達明、鍾意八十年代香港樂隊,正因而家搵唔到同一種歌詞,不論優雅文筆還是其中多重意思,當香港踏入瀕死階段,今場演唱會唱盡弦外之音之餘舞台玩文字明嘲暗諷時局仲抽得好應,而家好難搵到歌手甚至本地樂隊有咁濃烈政治色彩同「我地係香港人」信念,意識型態大勝。假如梁振英當選三個鐘林忌一張「香港熄燈」都可以俾人ban Facebook account,七一之後或者更快網絡廿三條通過之後,單今場演唱會,達明一派已經可以俾人秋後算帳到的去文革式批鬥。所以,大家真係要好好珍惜。