Truth Corroded "The Saviours Slain" Live in Hong Kong


唔係有Hidden Agenda,有好多理應更受賞識的樂隊大家根本冇可能睇到,Truth Corroded就係表表者,唔係有HA點會出新碟有tour都有機會到香港表演,今次仲要已經係第三次。雖然玩得好但你知香港地現實玩得好唔代表乜野,比起台風同實力各位大老細們更關心隊band個朵有幾響,Laibach「新文化大革命」提過香港今時今日仲有一個咁蓬勃之live scene全靠傻人,正如冇HA,大家有機會睇三次Truth Corroded嘛?雖然,我都係第一次有機會入場睇佢地live...


碟就有追開,只有話頭兩隻覺得都幾普通,但一路death落去technical落去,新碟我係非常非常之受,所以好好彩今晚黎到睇佢地。而我覺得Truth Corroded最大成就,唔係身處世界上其中一個樂隊最難發展地區澳洲,可以默默耕耘堅持十幾年出到五隻碟;亦唔係對住一班比預期中少得多之觀眾,仲可以全不欺場交足貨(又諗返起上次台下得廿個人但台上仲好似對住二百個人表演咁搏命之Diablo,另一傻人做福人群的代表作);而係話俾大家聽,如果metalcore/deathcore走breakdown,世界會是多麼的美好,同想表演一場精彩metal live,一個技術高有創意lead guitarist係相當重要。好可惜近來HA實在冇乜運成日同人撞,上次Alcest撞The Black Dahlia Murder,都可以話冇乜事,對文青黎講識睇一定係睇Alcest,所以當晚HA反而係難得見到之爆場;呢晚就大鑊,撞到歌路接近但出名/潮無限倍的Bullet for My Valentine,講音樂點會唔係Truth Corroded贏丫,但前面咪講左囉,對大部份香港人黎講,一隊band幾時至係好睇?個朵響果陣時。


「between,好多人都問點解呢幾個月好多場大band黎香港都見唔到我蒲頭。就講講今晚啦。要睇BfMV其實上年Summer Sonic已經有得睇,佢地接住Maximum the Hormone出,而Maximum the Hormone玩完,我已經毫不猶豫走左去訓晏覺。既然上年去大fest主台出我都寧願訓,今次黎香港就算同一晚冇Truth Corroded,如果我反而俾幾舊水入場補睇返,會覺得自己好戇居。」


至於Evocation,雖然「遲到」所以睇唔到(不過都係樓下聽晒成場),但就所聽,今場睇唔到損失都唔算好大,畢竟已經睇左佢地最完美一次演出,就係上年幫Ne Obliviscaris做opening。老實睇Evocation咁多年,幫NeO做Opening果晚表演同製作真係超晒班,話當晚係其中一次香港metal band最佳演出亦絕不為過,以當晚水準作準的話,要成為第一支代表香港出戰Wacken之metal band,其實唔難。但係NeO之前同之後,唔知點解一直都遇唔到果晚好似標童上台咁堅之Evocation,所以都係等《天靈靈地靈靈》Wacken Tour Edtion算,我想要特別版送Evocation@Wacken official bootleg DVD加Emperor bootleg唔該。