Zip Zap Saturday Night@Backstage






「唔係戈竹尸帶契,相信我冇幾可會睇呢類gig。」

不過佢咁衰話左俾我知有show噉玩法,本地all-star "Hong Kong Classic Rock" project玩old-school (hard) rock/metal cover,恭碩良喎包以正喎!

「metal喎!」

就中招了。地點係蘭桂坊Backstage Live Restaurant。即係邊度?我都唔鍾意蒲,又懶過海,點知?

「2006 ANGRA我先第一次上蘭桂坊呢邊!今次第二次!」

酒吧成世落過唔夠十次,落親都係同音樂有關,幾次係大家傾野或講搞show,之後幾次全部公事,數都數到啦:ANGRA、METHODDISAVOWED,同真正似番場酒吧show、全場玩到黐晒線的六6陸,而家仲回味無窮(不過冇下文因觀眾層面太唔同),今日唔係有戈竹尸帶路,自己一個肯定唔識黎&唔識走。場show禮拜六而睇得到,因為係酒吧show開十點半,九點半收舖搭地鐵過中環,仲夠時間行多陣街。MK仔就係MK仔,每日出旺角長時間過留係屋企,收工返屋企仲成街燈火通明,所以過黎中環諗住起碼可以行埋HMV啦,點知十點閂左。沿住條街一路行,九成舖頭閂晒,連機舖都收埋。

「搞錯!係咪香港地黎架?」

難怪咁多人鍾意香港島,生活幾咁悠遊,放工夜晚仲有大把野玩,上到蘭桂坊。我地冇街行,十點三四上到去諗住霸定個位,已經滿左半個場,雖然唔係好大間,大約兩個LiveHouse左右,香港地搵到呢種gig場算難得架喇。搭電梯上去時,視線順時針轉九十度,企我地側邊的,就係包以正。

「有眼不識泰山!」

一向鍾意睇細場show,因為有feeld、underground,同酒吧睇show有得一面睇一面飲多一重享受,雖然我唔飲酒,我飲橙汁,好似六6陸我飲左幾舊水橙汁(...),好多人唔鍾意酒吧搞/睇show,因為一來冇台二來地方細,一多人除非生得高或者企得前,企後者得個聽字睇只睇人頭i.e. DISAVOWED,而靚仔覺得俾左錢睇show一定要睇得清清楚楚先值,所以酒吧show不嬲唔多靚仔靚妹睇,表演單位同觀眾都係老餅或外國人居多,好似今場蘭桂坊搞,勁多鬼,囡囡亦極大量,而且個個睇落成熟裝身四正,對比自己著得件band tee入場,即時覺得好渺小。

「所以唔鍾意落吧。我太cheap了。酒又唔識飲。會自卑。」

一貫band show傳統,話十點半都要遲番幾個字開先似樣。酒吧中間企位,最後有排梳化,開show時滿左三份二,坐梳化果班最正,企梳化睇唔怕齋睇人頭。隊band雖然叫all-star,小弟無知,對佢地的皮毛認識,只有包以正、恭碩良加AUDIOTRAFFIC一個成員唱同彈結他,另外bass同歌手唔知咩來頭。入場預左玩舊歌,只係初時都冇預到舊成噉,已經唔止old-school咁簡單,而真係classic:通通六七十年代。難怪咁受外國人歡迎,因為佢地的THE WHO、AC/DC,就好比我地的BEYOND,由細聽到大,聽到個intro已經識得唱落去。即係隊band見到個級數都知勁到爆,歌佬把聲非常Dio又唱到高音加唱足全場(我超鍾意Dio!),AUDIOTRAFFIC Adrian都有唱,但佢把聲適合唱和音多,有時唔夠力配合首歌,特別拍埋「真歌佬」把恆聲,被比下去。恭碩良同包以正兩個成日話勁,但以前只有一個機會睇佢地現場:夏韶聲2007《諳III》場演唱會,原先話兩個都會出現,結果只有包以正一個。佢手結他真係殺晒,計jazz;今場玩hard rock、classic rock,論彈絕對駕輕就熟加彈得好勁,不過覺得佢玩快野有時未夠乾淨,當然噉先有番果種風味,以前器材邊有而家咁勁大量硬件幫你除雜訊降噪,要彈彈下有d音唔清唔楚又或拆左feedback左,先至有番當年份瑕疵美,同埋一定Fender,才夠味道。至於恭碩良,唔使講啦,根本係個黑人。

場show分兩個部份,上半場感覺未夠放,不過唔少歌玩/改得好,好鍾意佢地版本個《Sunshine of Your Love》。玩左半個鐘左右停一停,吹個水劈個酒同等大家幫補一下酒吧生意(這才是重點:人地唔使做生意咩?),第二部份先至真正戲肉。又或者話第二個部份d歌「新」d,同經典d。先黎LED ZEPPELIN加DEEP PURPLE,《Black Dog》再黎《Highway Star》(可能是世界上第一首power metal/neo-classical metal),冇可能唔high囉在現場。不過最大驚喜係玩左《Walk This Jin》,AEROSMITH《Walk This Way》featuring廣東話rap贏黑鬼的傳奇港裔MC歐陽靖,剛剛遇到今個檔期佢黎左香港(《壹週刊》第959期有佢專訪),本身《Walk This Way》已經勁hip-hop(可能是世界上第一首nu-metal),不過搵著佢上黎rap埋一份真係一個極大驚喜,跟住仲有LED ZEPPELIN《Rock & Roll》再KISS《Rock & Roll All Nite》完場,觀眾嗌到拆再黎多首ROLLING STONES,差唔多一點玩完,雖然上半場唔算點樣突出,break完第二部份真係黐晒線,睇完覺得值晒,MC Jin都出埋喎,事前點會估到真係all-star同classic成噉?

「但係,喂,《Holy Diver》呢?」

張飛包野飲x1,當然唔係貴野啦,但做我生意就實冇蝕底,因為我唔識飲酒,換野飲都係換全場除水之外最平的可樂一罐(...),飲住去搭小巴返旺角 - 我有諗過唔開袋番屋企架,不過好似超級樣衰怕俾人笑。睇係好睇,只不過下一次睇酒吧show相信唔會係短期內發生,大佬一張飛兩舊水唔平架,加上過海來回夾夾埋埋二百五,仲要咁夜睇show似返工十分辛苦,我都係繼續御宅算。支力。


見近來又有人提出一個經常聽到之問題:

「想認識更多metal,但不知從何入手」

單就今晚,不如講講classic方面可以點入手。畢竟係三四十年前產物,請唔好以現代角度去評價「激唔激」、「勁唔勁」,首先classic rock唔會有黑腔死腔,你唔鍾意聽到人正正經經唱歌、唔鍾意聽到男歌手唱高音、甚至係用人聲唱就唔得一定要嘔聲嘔到聽唔清楚先受,已經唔需要聽classic野。另以前唔係玩快同爆,而係blues同迷幻,guitar solo大大段玩melody玩build up,不過技術唔似而家1,000MPH,係玩feel。難怪而家冇幾多人會(肯)聽classic,除左老野。但如有興趣,以下係幾部必聽必備級classic rock/metal經典:

只屬冰山一角,因本人學識僅得皮毛,另有其他大量經典如THE WHO、ROLLING STONES等未有足夠認知,希望有識之士唔會取笑。如是入門、想認識現代搖滾/金屬根基,以上隨便一張皆非常合適,特別之選QUEEN《A Night at the Opera》,最偉大art rock作品之一。

但更/最簡單,其實係去睇show,自己屋企聽CD音響效果同臨場感都冇咁勁,而且睇住台上樂手彈、台下觀眾嗌,同就噉屋企聽MP3、睇YouTube感覺完全兩樣。只係相信冇幾多人會噉做:提及過的觀眾層面問題。正如DISAVOWED,可以全場爆企滿二百五十人,事後綜合番加上各種所見所聞,我唔會話因為係第一隊death metal band黎香港,反而價錢先係主因:唔係七十蚊一張飛,有最少四份一人唔會蒲頭先,即使係首隊香港表演海外death metal band,而好多人成日話「想睇外國band」、「想睇death metal」;同一道理,假如六6陸唔係免費而要收錢入場,同時即少一半人先。因為香港人 - 討論題目係metal show主要對象靚仔 - 入場可能係為某一隊band、為捧某隊/某個朋友場,同係邊種band show先入場睇,但外國人睇show唔一定要係某種類型某隊樂隊,因為入場係為enjoy、為在場聽音樂可以令自己開心或輕鬆,今場ZIP ZAP同DISAVOWED明顯睇得出大部份入場人士尤其外國人,本身都唔係聽開呢類野、唔係聽band野,甚至之意在不,只求有得聽住high的音樂飲住酒同朋友癲下玩下;六6陸雖話免費入場,酒吧show入場應該幫襯番一杯半杯之不成文規定,似乎入場的靚仔靚妹唔知道,真係有買野飲,大部份都係外國人、一睇就知唔係因為metal入場的觀眾,而香港人口面同靚仔靚妹樣的,幾近全部入到黎到走人都係冇買過野飲,真係齋睇show。所以你見六6陸之後,再冇另一場如此盛大之免費metal gig;場show之後已經要執手尾就知,我一場show飲幾舊水橙汁,真係因為咁鍾意飲咩。亦因而睇得出呢種show香港根本搞唔成,有幾多個老細肯噉樣俾個場你唔做一晚生意,仲要場內飲品減埋價俾你,但大半人入到去唔幫襯仲要玩到拆場咁滯?經過一單,仲邊有場敢/願俾你搞第二單?因為香港人冇呢份去enjoy的心態,而一定要某人某隊某類,而酒吧唔計咁多,只一樣野:最概括之音樂。所以香港人冇幾多個會肯好似外國人,會/肯唔識表演果幾隊band、唔識佢地玩d歌都去捧場;你話貴,亦有酒吧係低收費甚至免收費,而有live band玩舊歌,甚至冇咁舊的金曲如玩八十年代你識果d你聽。係睇你會唔會去enjoy、去試。就算去左d歌唔識dband唔算好鍾意,都有野飲下、感受到現場氣氛,都唔係蝕底丫?只係冇幾多個會諗到呢樣野,或去理呢樣野,所以雖然間唔中香港區有live band同你玩rock玩metal,同香港人講佢唔會去,「都唔識」、「要俾錢喎」,轉個頭又埋怨「冇band show睇」。


「好多時,認識一樣野、入手一樣野,全無難度:開明就夠。亦即,唔理玩果隊係咩人、叫咩名、玩乜野,只聽歌。」


音樂,唔係用黎追、用黎拋,係用黎聽、用黎享受嘛。老土,又如何?乜都要最新最多人識、計較介懷咁多、聽音樂都要就住就住,又點可以投入、入手?