每週一相片大行動

2010 Week 41 Extra




日前講過一單metal界白事,順便翻炒早排同樣冇乜人留意的另一單。Segway你記得或者知道多少?差唔多十年前報紙吹到好行,講有樣新發明會點樣顛覆點樣革命點樣改變全世界運輸模式,跟住公佈係架企住開兩轆車仔,個款似玩健身多過代步,仲要原來講到思想控制咁堅,原來只係用人體平衡加減速轉方向,都幾搵笨。而且冇遮冇掩唔安全又擋唔到雨,話單車又唔係話電單車又唔係,上馬路人地惡過你,落單車徑同行人路你又惡過其他人,兩頭唔到岸可以點用?加埋官僚永遠接受唔到事物咁新咁前衛,完全唔明點解條友連政府制度、百姓心態同交通系統都未理解,就可以咁大聲話自己帶黎偉大發明。


所以之後冇晒聲氣,Segway實物只有去美國出差時見過,好似上面係2006年去拉斯維加斯擺展覽時,見到Sears實Q用黎巡邏,英國人就話騎馬,美國佬咁肥可能連隻馬都騎死,行又行唔得快追賊呢家野算數啦,Segway就最適合。展覽會都好多,因為會場超大,冇美國人咁肥都行到你斷腳,既然開住架哥爾夫球車成班人四圍去普通過普通,當然大把Segway全場飛黎飛去啦。


但除此之外,就再冇見過了,對佢印象只餘兩單新聞。一單係布殊玩號稱絕對安全點玩都唔會有意外的Segway時反車仆街。另一單仲抵死:Segway老細自己親身落場試最新越野型號(好難想像Segway可以點越野法),點知激過頭一野衝落懸崖跌死左,而最諷刺係佢唔夠一年前先收購左Segway,點知自己整死自己。立即留意番了。同而家先知原來有中文名,攝位此詞存在已久,至近兩三年自報章娛樂版持續濫用成為新一代潮語,估佢唔到地會做埋Segway中文名,夾得到音同義先吹脹,能成非常有效的marketing工具。可惜而家大家會留意番Segway,只因為「攝位車老闆攝位死」,之前賣咁多年蝕足咁多年,而家連老闆都死埋,Segway呢家野可能好快位都冇得攝消失世間矣。




每週一相片大行動.綱要




Sir個網

lau-sir.com


Sirblog

http://hk.myblog.yahoo.com/lausirisual