每週一相片大行動

2010 Week 42



曾幾何時,劉Sir口&手呃得下各位無知香港人的英文,幫佢搵過唔少食,讀緊教院做研究助理一個個project噉接,每個做親都兩三個月仲要計時薪,根本唔憂冇part-time做月入還要相當豐厚。畢左業仍然耐唔耐有人叫幫手寫英文信或者做翻譯做校對,當然冇咁好搵,但一個job可以賺幾舊水,都叫做優差了。


越來越忙加越懶,收山已久,難得有同事邀請重出江湖幫佢個女改作文,不過先呃得一個星期早餐,風光不再矣。慣左日日朝早周圍問同事乞野食,好耐未落過麥記食早餐,原來而家多左好多新野,好似豬柳蛋漢堡出左雙層版,非常非常正,但只做早市十分戇居,如果全日供應我肯定開始幫襯番麥記(但當然要睇睇價錢先,如果仲貴過足六兩食黎都晒氣啦)。同買早餐送牙膏同濕紙市,知劉Sir一向污糟食完早餐更甚,等佢可以立即抹咀擦牙以免影衰公司嚇親各位客人。但最正,都係呢個豪華版早餐全餐。



其實即係將原來自己砌個豬柳蛋的早晨全餐(除左隻蛋唔同,又要自己整,又貴過豬柳蛋餐,麥記炒蛋又唔係好食,成日覺得叫早晨全餐好笨實),加多2/3個熱香餅餐合體,上麥記官網都搵唔到,可能係special promo黎,想知幾多錢,又唔好意思問同事,但相信會係要我自己俾錢一定唔捨得的價位。


另一疑惑是,包鹹餅甜,應該食邊樣先?還是兩樣一齊食?我用番早晨全餐個食法,即係將所有野夾晒落兩塊包中間。食完,山德士上校話我食錯左,應該係由最大塊開始夾夾到最細塊。諗落又係喎。我諗要同同事傾傾幫佢個女長期補習先。




每週一相片大行動.綱要




Sir個網

lau-sir.com


Sirblog

http://hk.myblog.yahoo.com/lausirisual