我公司樓下的車仔麵檔。傳說中家族經營幾十年、現由三姊妹打理的佳佳。一間以前十分正的車仔麵，價錢平而份量大，廿幾蚊已經包晒加底同山咁高的送菜。一直大件夾抵食，後來終於加價，貴左之餘料又少左。立即冇癮了。

星期六返半晝，車仔麵癮起，放工諗住加左價都照食番碗，唔使啦見到都。以前就算食飯時間行過都可以大半間舖冇人，平日夜晚放工行過甚至經常全舖吉晒，廚房以外得隻貓走黎走去巡舖（．．．）。同人講黎呢間食，會問你

「唔係卦！你食呢檔車仔麵？」

而家又貴又少，反而廿幾人長龍排到兩三個舖位之後。點解？上左電視囉。無記黎採訪，節目出街之後立即日日食飯時間都咁長龍。而加價加退步正正是採訪幾日前開始，可能知道一登無記定必升價十倍而精心佈局，反正而家咩價錢咩質素都好生意都只會多到做唔晒，家陣試下同人講你大角咀食車仔麵唔食佳佳，

「唔係卦！你唔食呢檔車仔麵？」

即係我仍然有心想食佢。只不過家陣pop晒了。同要我排餐慒，又冇位坐，有得坐都迫死。好在旺角開左間Murder King。