每週一相片大行動

2011 Week 12




由細到大都係KFC fans。絕對好食同飽肚過麥記,又比Murger King同其他XXX Burger之類平同多款,一直唔多受歡迎做唔大,我覺得香港人唔鍾意食炸雞同冇其他食得咁方便反是其次,主要是失左先機。細個時麥記賣點係平,當年初出套餐一個先十五到十七蚊抵過茶餐廳,但雞記已經同而家差唔多價,未比較食物已見高下。到近幾年麥記價錢勁升,十年前同今日比價錢加左一半至一倍,已成有錢人餐廳,但貴得黎野食縮晒水頂佢個肺,KFC則一直穩定冇乜上揚,甚至成日做推廣打折反而減左價平過以往,好可惜已經冇用因為麥記已經達到霸佔市場之大目標,點惡都得點加價點縮水一樣大把人俾佢昆,新對手貴但最少有新鮮感。所以成日覺得KFC處境同亞視一樣,唔係唔掂唔係冇質素,只衰市場策略唔夠人黎又開錯左頭,就灰爆了。


而我一直支持KFC除左呢樣,仲有佢地非常進取開發新口味,新野接二連三地出差唔多一雞死一雞鳴(好爛的gag),同新餐好多時做到勁平加份量夠當一餐食得飽你。麥當奴算九數啦,以前一年都冇一兩款新野,甚至陳年舊貨翻炒或麥樂雞多兩三款醬就話「新出品」來來去去食老本,到近兩三年加價加得太兇俾人勁小,先至開始認真整新野呃人返去幫襯,但同KFC相反新野一定貴到癲,你要我三十蚊食個包仔當我傻?KFC個芝士焗雞皇飯包多件大雞同汽水都係廿七咋(呢個餐真係無敵我成日食而家)。


每次麥當奴出新野,KFC往往會整差唔多的打對台,麥記早前出又貴又唔好食搵笨實的雞翼拚盤,當中有款檸蜜雞,好擔心雞記會拎番當年同黑椒漢堡對撼的黑椒青檸雞翼出黎同佢鬥(難食到嘔絕對係KFC歷史污點之一)(未衰到盡係,隻雞翼冇麥記咁細同咁重洗潔精味),好在唔係。而是全新出品蒜醬濃鳳燒。


「食雞之前,先小。邊條友諗到呢個柒到冇朋友的爛名,拉佢出黎斬唔該,冇幾可見過有商品名可以差劣到此地步,on9當有趣簡直趕客多過招徠。點解班老細會接受得到,而唔係炒晒做marketing班人?」


一個餐有兩件蒜茸醬燒雞兩隻細雞翼加自選小食,一向會揀薯格但發現咁耐都未食過芝士雞肉焗薯蓉就試試,結果成為非常錯誤之決定,擺出黎張相超靚個碗薯蓉上面勁多芝士勁多雞肉,點知實物柒到核爆掀開蓋已經冇晒胃口,仲要冇芝士味雞肉少又老薯蓉成塊餅噉冇味仲勁乾,有點後悔點解咁身痕唔揀薯格以後唔使再食。至於兩件蒜茸雞,好遺憾食極都唔明邊忽有蒜茸味,只似普通燒汁雞唔覺有咩特別,最慘唔知整法定雞問題比平時原味細隻,食晒成個餐都未飽。噉就收左我$34,以此份量計絕對唔抵。唔特別唔好食冇所謂,但連底線食得飽都達唔到又物非所值,就唔會有第二次,所有方面綜合整體未至於黑椒青檸雞咁差,應該做得到尾二。


下個新餐出現之前,我會繼續支持KFC芝士焗雞皇飯,廿七蚊大盒飯大件雞大杯汽水又平又飽又好味十分開心,在這乜Q都貴都加時勢仲做到咁平咁豐富,單呢個餐我差少少周圍同人講「KFC真係一家良心企業呀!」但最想佢出番咖哩脆皮珍珠雞扒飯,三年前2008賣過一次,三十六蚊有個雞扒飯加珍珠脆雞粒加葡撻加杯野飲,係貴但咁大餐值得的,當然減個雞粒或葡撻平番六七蚊會更開心。黎緊幾晚屋企冇飯開要食自己,睇黎又係芝士焗雞皇飯過日子。




每週一相片大行動.綱要




Sir個網

lau-sir.com


Sirblog

http://hk.myblog.yahoo.com/lausirisual