每週一相片大行動

2011 Week 15

Trade Show Special
Fun Fair Day 1




今天開展了。不過,先講的不是展覽,是《誰家灶頭無煙火》。冇錯就係今期無記八點檔。其實幾悶,我都係鍾意《同事三分親》、《畢打自己人》果期擺明一班7頭加懶藝術風格攝影剪接柴娃娃地on99,這才是八點檔正確路向,跟住八點半踩到十點半永遠係勾心鬥角喊苦喊忽,俾套我無聊笑幾笑得唔得先?好可惜編劇果班唔知咩事,《天天天晴》劇情天天偷情,再跟住套粗口都廢事講,《誰家灶頭無煙火》係悶,最少入得眼。同有Katy。


「關做展覽咩事?」


因為李璧琦囉。其實佢做左無線一排,冇人覺因為只現身明珠台做連個名都唔識讀所以一定好高檔俾鬼佬睇而唔係俾你睇果類潮流節目,跟住撈埋美劇廣告,《女王辦公室》仲有份做常任配角升左級(雖然仍然隔幾集先出一兩幕講一兩句),《誰家灶頭無煙火》叫第一套做二線頭大角色,戲份多但老實外型台型演技未夠擔正,講對白節奏與感情已經要再練,唔驚啦黎緊可能仲有大把機會,當新人冇乜邊個出得到大場面,而家連明珠台潮流消費節目班主持都要過埋無記做劇集演員(唔止佢一個,佢亦唔係第一個),可想而知無線台前多麼缺人。話雖如此,做開明珠台果班你只睇無線的話好少機會見到佢地,但講搵錢求祈一個都一定比接近所有同劇演員高,身在香港只要你外型唔差,講得一口流利英文口音重到爆捲晒利勁鼻音高低十六度飛黎飛去,你根本唔會搵唔到食&搵得少,尤其你係女的話。見佢地都係《港生活港享受》真情流露同你分享各式奢華生活就知啦。AI Rabee'a真係靠Master Joe食飯咩。


又或者接function job,樣靚語文好口才得,做公司或者商業活動司儀,都是一條財路。2007黎會展做展覽,當年仲未擴建,一入正門係超廣闊超高樓底巨大落地玻璃無敵海景大堂,次次展覽會都會搞活動十分開心,當時第一次見到李璧琦真人。之前只見過做硬照同廣告模特兒,而展覽會每日晏晝大堂都會有佢同大家(當然是鬼啦,商貿展覽嘛)唱英文歌吹吹水玩玩遊戲,先知佢原來咁掂的,問工作人員佢地都唔知李小姐何許人只話佢係「街頭歌手」真灰。再跟住明珠台《港生活港享受》,其中一個女主持就係佢,而家再慢慢上位。雖學好普通話越黎越迫切,香港地英文好始終好緊要。但一定要口音鬼過鬼佬先得。所以劉Sir都係發唔到達。


好可惜,Becky live亦只此一次。回想當年2007正值恆指三萬點、雷曼爆煲一年前(可能係香港最後一個)盛世,場內有抽獎券拎,就算你唔想聽李璧琦同你吹英文水唱英文歌都一定會落黎睇佢,因為最後一日有佢主持大抽獎,類似無記台慶抽人出黎開櫃睇拎乜獎品,頭獎係最新手提電腦一部堅到爆,果陣隻隻鬼唔知邊度搵到好多抽獎券,有個參展商先抵死成疊報紙咁厚可能偷晒全個展廳全部抽獎券,好記得有三個櫃,抽左一隻鬼出黎開,一開就係頭獎,身邊個個拎住大大疊抽獎券但乜都冇的鬼佬立即(當然係玩野的)起哄,好鬼開心。但往事只能回味而家乜都冇,跟住會展擴建,原先大堂先變成見唔到無敵海景的迫爆走廊,之後加多幾個展廳已經再冇大堂這回事,加上經濟蕭條順手取消晒同類娛樂活動,個市咁淡,仲拎咁多錢搞咁多活動送咁大份禮俾你?就正如無線台慶,以前頭獎係送某出名花園一個單位俾你,後來香港樓貴改送大陸樓,而家連大陸樓都唔送頭獎得番架房車咋,市道差,縮就得縮啦。


劉Sir做展覽咁多年,冇乜建樹,唯一成就就是開創「會展展覽會女性工作人員的人數與質素直接反映當下經濟狀況」泡沫經濟學理論。08年之前、會展擴建之前,嘩勁呀次次去展覽會好似入左夜總會,由正門起從大堂去到展館,沿路每幾步就有一個大學生妹妹part-time棟係度對住你笑騎騎,而且樓數跟質素成反比企大堂果班一定係最正的,而且明顯睇過揀過先俾做,行晒成個館都唔多會話唔掂的,有部份擔任「詢問大使」一班更是精中之精,嫌未夠會再請model企正面同展廳門口舉牌,2007年一次過見晒大量「詢問大使」加Becky Lee加全盛期的Kawaii十分完滿。只是過多一年,已經完全兩個世界,夜總會小姐歡迎你之景不再、part-time妹妹由五步一個變成五十一個、反應由「嘩∼∼∼」變成「嘩∼∼∼彈鐘唔該」、Becky Lee(和完美Kawaii)一去不復還。香港,真的已經死了。


「Becky姐,我都係懷念你四年前那elegant的鬈長髮。」




每週一相片大行動.綱要




Sir個網

lau-sir.com


Sirblog

http://hk.myblog.yahoo.com/lausirisual