因為我地公司產品較為特別，每次參展必定引來主辦單位同傳媒，借產品擺display影相放頭版平常過平常，電視黎拍野梗試過劉Sir都入過兩次鏡，大家未見過，相信因為拍完返到電視台班友都頂唔順，寧願成條片唔用都廢事俾劉Sir上電視嚇親大家。而作為大陸廠商佔極大多數國際商貿盛事，自不然會有內地電視台採訪，基本上全部係你聽都未聽過的細到爆或超地區性電視台。難為有家勁黎到話「想我地訪問你地的話請先付六百元訪問費。」想上電視使俾錢你？好多時反而係記者想搵人訪問但搵極都搵唔到，調番轉想你做受訪者添呀。

有間澳門電視台，行左好耐都冇邊檔產品好或肯做訪問，終於搵到我地，當時在場有老細同我。記者姐姐問老細市道行情，近幾年外國市場差大陸競爭大中國政府政策又荒謬，成本一年比一年高，同最重要返大陸做生意做廠，想做得好做得大一定要靠檯底，去到需要人脈需要紅包時，有關係的沒關係，沒關係的就有關係，而我地屬於沒關係果種，自不然大把苦水吹。見老細講極唔完，記者姐姐以為「掂啦咁多料爆今舖夠晒貨交差」，誰不知老細一聽到話要開機拍，

「要出鏡要登名，唔好卦！」

死纏爛打多個幾字老細都唔制，冇癮，唯有只影產品再去搵另一間公司。雖然好多野都係事實，但搵食份上，有幾可夠薑到出晒樣出晒名對住全世界講丫，特別身在中國時。相信個記者姐姐最後都係搵番幾間大公司，拍番幾段十分行貨加充滿正能量的鱔片就收工。