每週一相片大行動

2011 Week 18 a.k.a. "M.K. Week"



Mortal Kombat: So Real It Hurts!


一張懷念的海報,一隻經常懷緬的經典game,到而家仍然得閒無事大嗌一聲


「Mortal Kombat!」


應該係我投入過好多時間去研究遊戲內外歷史之電腦遊戲,要講幾千字都講唔完。Doom帶起第一身射擊熱潮之前,電子遊戲一直是日本廠商天下 - 最少街機同家用機,美國label強項是PC。原因係大家態度極端,日本機迷追求簡單同即時娛樂性,美國佬追求真實、系統同挑戰性,換言之佢地鍾意策略、解謎冒險類而非動作等,所以好多時美國game都複雜到你唔想玩,打爆一隻日本game之時間,都未夠你睇完一本美國game說明書,難怪PC方是美國佬大展拳腳加領先之地。Capcom街霸系列做得起,美國人自然跟住學,最出名必定是Mortal Kombat,其實作為格鬥game非常之差,系統勁難上手角色動作一模一樣,理論上非常失敗,點知一爆成為電子遊戲歷史上其中一隻最重要最具影響力美國貨,一出旋即成為永垂不朽經典。


原因好簡單,夠cult。開發商Midway靠同Taito合作起家,引進烏蠅機同食鬼到美國發財,當全世界機舖只見到街霸二時想自己整隻格鬥game,心知當時美國game發展仍遠不及日本game成熟就決心「係玩就玩盡佢」,Mortal Kombat當年譯《真人快打》,因為全部角色唔係畫而係搵真人cosplay做動作再錄影,換言之行路跳起出拳出腳全部真人扮出黎,將美國佬寫實心態推到極致,所以會有上面張海報同「So Real It Hurts!」口號,唔似其他公司拍海報要搵真人扮番卡通角色咁戇居,根本game入面全部都係真人。可想而知場面幾咁白痴、動作幾咁生硬。而且血腥暴力到爆,出個拳會打到人噴血、一腳踢到成地血,加埋角色出招中招大量詼諧動作,搞笑到你唔信。嫌未夠柒,仲有令MK系列名垂千古的Fatality。


乜野係Fatality?我唔直接答你,我用例子答你。話說當年仲係486 dup碟年代,買左本《超任一族》(仲有幾多人記得當年大量正盜版game書?)送第二代出招表,第一代錯過左但遇到二代出PC版就dup左隻返屋企玩。贏左兩round之後進入「Finish Him/Her!」環節,年少無知唔知咩黎,照住出招表入指令,然後畫面變黑,跟住一個上勾拳打爆左人,血肉橫飛伴隨慘烈尖叫聲,骨頭內臟成地都係。


「這就是劉Sir人生中第一個Fatality。」


你要知道果陣最暴力果隻Doom都只係動畫化表達,Mortal Kombat係第一隻game將真人圖像碎屍萬段,而且之前冇任何一隻格鬥game特別日本出品夠膽去到咁盡見晒血爆晒頭爆晒肚到如此地步,我果陣讀緊中二三,可想而知Mortal Kombat立即成為劉Sir最愛加最重要遊戲,隻game系統唔掂甚至唔多好玩毋庸置疑,但Fatality就是王道,當然仲有其他好多,不過在此別過。如果好似海報入面俾小朋友打的話會俾人告死,因為Mortal Kombat可能係第一隻非色情類十八禁電子遊戲,當年就係真人快打同跟住照玩fatality的模仿者,直接令到電腦遊戲分級制出現,繼而使我放棄日本投入美國ACG懷抱。


只打到PS1第三代,第四代開始放棄真人拍攝改玩當時吃香(但技術上完全未得)的多邊形,已經失去左真人快打之意義選擇離開,近日到第九代發行,重拾當年2D格鬥系統多邊形3D只用於繪圖分鏡,Fatality再誇過以前,有「返來了」的感覺。雖然冇機冇時間冇得玩,但見到第九代回想起好多美好時光,特命本星期為M.K. Week,好好念舊一番。



M.K. Week - Monday:吳耀漢主演經典暴力廣告


M.K. Week - Tuesday:真人快打Fatality大全集


M.K. Week - Wednesday:M.K.仔的主題曲The Immortals《Techno Syndrome》a.k.a. "MOOOOORRTAAAAAAL KOMBAAAAAAAAAAAAT!!!"


M.K. Week - Thursday:Mortal Kombat 9 trailer


M.K. Week - Friday:「比MK更cult」的Eternal Champions碎屍集


M.K. Week - Saturday:Mortal Kombat vs. Donkey Kong


M.K. Week - Sunday:華納因為Mortal Kombat要告閃靈侵權(喎)




每週一相片大行動.綱要




Sir個網

lau-sir.com


Sirblog

http://hk.myblog.yahoo.com/lausirisual