身邊好多人成日叫淘寶，但始終信唔過大陸野，點多點平都冇幫襯過，終於有日破戒了，當然是為了metal。幾個月前大陸朋友極力推薦懲罰者，「中國thrash metal新希望」，一聽大鑊真係好掂，三月出左隻EP，雖然某程度上只係隻四首歌demo仍然好有興致執隻，之前想買大陸band碟有時可以靠內地朋友經香港時順路帶黎，今次搵唔到人幫拖就要靠自己了。當然，強國之強之大，你有心有時間不論如何indie如何地下冇乜band會搵唔到download，但那是另一個議題．．．

全人類都知淘寶其實就係Made in China的山寨版eBay，但乜都學足，就係唔學人地外國方便易用個介面，開完又要搞阿里旺旺又要淘點又點點點，搞左成晚先開到個account買到野。可能係好事，因為完全唔識用淘寶網個系統，買兩隻碟北京寄黎香港照計要四十蚊人民幣運費（係，差唔多貴過兩隻碟），但俾錢時只收左我十蚊，夾埋應該要九十蚊人民幣而家只過我六十蚊數，又搵唔到方法同賣家傾，可能因為噉四月頭落單一直冇消息，最後拖到連賣家都頂我唔順，兩個月之後終於寄左兩隻碟黎香港。

Dying Art Productions係其中一家最正中國label，主線係gothic/darkwave/ambient類，metal band唔多但出親都係好band，你睇懲罰者勁到令我唔淘寶都特登開個account買番隻就知。你叫得Punisher、直接將Punisher電影海報山寨做唱片artwork，就擺到明係為呃劉Sir呢個超級Punisher fans落搭啦，同個卡紙包裝紙同印質素都高，雖然放3寸CDR塊海棉餅玩幾玩已經俾我唔小心水平批左半塊出黎哈哈。當然音樂還是好的，demo性質有兩首歌唔算非常好已經夠照，同重點是歌詞，好難得選擇唱中文仲要寫得好激，聽完就明白點解唔印歌詞，EP主題曲叫《人民公僕》你估講乜？居然噉都出到碟真係好野，而廿蚊人民幣抵到爛啦相信呢種DIY唱片好快變收藏品。因為買一隻碟同兩隻碟都係咁多運費，順便俾多三十蚊執左隱喻隻live album，佢地之前出過一隻碟唔算特別好，但既然同一家label買埋支持啦。近來大陸出左好多新thrash band而且多數玩得唔錯，裂縫就好有興趣，又見到有隊女主音thrash band出左碟。大佬而家人民幣兌到0.83唔掂喎，紙水幾時先肯跌呀？

應該好快又會再淘架喇，要快手學識點樣用阿里旺旺先得，一來幫襯多次Dying Art買野順便找番運費條數俾人，二來我部Motorola A1600差唔多打柴，咦谷果部Android iOS史上最強山寨電話出喇喎．．．