每週一相片大行動

2011 Week 29 Extra




琴日同大家分享左年度最佳垃圾快餐KFC加大碼雞脾餐,早排意猶未盡想再食,去到先知轉左做名古屋壺物火鳥,雖然從來唔鍾意食日本野加見到賣相已經估到會(好)唔掂,既然一場黎到又要食飯就支持下啦。就仆街鳥。


其實我到而家都唔明點解香港人咁鍾意食日本野,我係對日本菜冇興趣到成世人一件壽司都未食過,唯一會幫襯的日式食肆係吉野家,所以名古屋即係點壺物又是甚麼完全唔知道,斷估唔會好似我食果餐咁唔對路卦。要講晒成個情景你先會明白:夜晚去女人街間雞記,當時食飯時間都冇乜人,長方形舖最入四張長檯吉晒,我就坐角落頭位,坐低開始食之際聞到一陣異味,就好似搭緊冷氣巴,有條友剛剛打完波成身汗就上車仲要坐正你隔籬一樣,不過現場最近果個人都隔我幾張檯加佢一定唔係打完波黎KFC食飯,面對的只是兩隻所謂壺物雞。


本來估即係甜豉油或者燒汁之類,入口一陣酸味同聞到一樣,最灰係純粹拎普通餐雞脾雞胸蘸一蘸汁就算,個汁唔點特別或點好食,又要落得鬼死咁少到頭唔到岸同平時食冇咩大分別(多少少(唔好食的)酸味囉),唔知係廚房手勢問題定點,今次新出品相當失敗,我相信如果舊雞擺到過期一兩個禮拜再炸俾你食就係噉味道。而且叫個餐要$36,人地加大碼雞脾餐收正常餐價錢$33但成個餐加大一半有多件雞又好食左,你個壺物乜鬼要我俾多三蚊先加多少少野(飯大左但薯格少左,拉上補下其實冇著數到),仲要兩件雞唔落汁好過落,個名古屋壺物火鳥食到人都憤怒鳥,絕對是洗潔精味黑椒青檸雞後KFC歷史上另一大污點。強烈要求雞記復刻大雞脾餐。




每週一相片大行動.綱要




Sir個網

lau-sir.com


Sirblog

http://hk.myblog.yahoo.com/lausirisual