已經放棄開始縮水同時價錢突破$40的Murder King。縮得更勁但價錢就黎趕上的麥記，除左雙牛芝堡同蕃薯批更加完全唔使理，食六隻侏儒雞翼收我廿五蚊？我唔好直頭落百佳買隻燒春雞？各大連鎖美式垃圾快餐店，而家只支持KFC，我幫襯開九龍城廣場同女人街，兩間都疏落到爆任何時間入去一定有位坐加可以自己揀位兼坐幾耐都得唔會俾人趕，又光猛又有免費冷氣仲舒服過自己屋企，環境已經贏晒啦。可惜原因係多數人去另外幾間都唔幫襯KFC。其實好灰，因為而家咁多間只得KFC仲會出新野食同不停搞推廣，冇客唯有不斷出招囉，你有幾可見麥記Murder King半個月出一次新款，今期減價完左第二日立即開始新一輪？

雖然好多時所謂新口味都係翻炒，論頻率KFC算最低，同有時好野寧願佢不斷翻炒甚至長賣，好似呢個加大碼雞脾餐，食第一次已經想覆灼，食埋第二次直頭頒埋個獎俾佢，呢個份量猛跌但價錢勁升時代，KFC加大碼雞脾餐不合常理地逆市發圍。第一次去食，果然係加大碼隻雞脾等於正常餐兩舊雞加埋咁大，張相係我第二次食時影，比第一次仲要大少少，而且皮薄唔係一味多炸粉，肉又唔霉唔老唔知點解平時整唔到咁好食？齋為隻大雞脾已經值晒。仲有大雞皇飯（其實我好鍾意食雞記個雞皇飯）、一件葡撻加杯汽水，承惠$33，平時一個普通餐兩舊雞跟客細飯或者薯格加餐飲已經收你呢個價，而家變相加大左個飯再送多個葡撻，同最重要舊雞好食左，一般黎講KFC我可以一次食兩個普通餐，呢個加大碼雞脾餐我一個已經心滿意足，如此份量如此價錢如此享受而家茶餐廳都未必俾到你，你話垃圾食家劉Sir點可以唔封佢為2011年最佳快餐先？其實幾個月前出過一次，當時只賣$26，代價係少左個葡撻同跟蘑菇飯，而我超鍾意食葡撻同時跟雞皇飯相反勁厭惡蘑菇飯，不過廿六蚊咁抵就無謂投訴啦。

有興趣的朋友，唔使立即仆落雞記喇，因為個promo已經完左。（．．．）新一輪做名古屋壺物火鳥，食一次就收皮鳥。唯有等多幾個月再翻炒。係有兩樣野好唔明白：既然隻加大碼雞脾可以有平時兩件雞咁大，點解普通餐舊舊雞都咁鬼細？（當然，講到細，有排都追唔上麥記啦）又，隻雞脾可以咁不合常理地大，其實江湖傳聞「雞記的雞不是真雞」會否不是urban legend而是真相？