自從個半月之內旺角兩間大街KFC執晒，冇左個MK食野價位合理而食得飽又坐得舒服加俾你任攝時間竇口，而家次次出街到旺角搵餐飯仔都冇啖好食。蕩來蕩去蕩左去遺忘已久的Burger King，初開時非常熱愛仲因為旺角終於開分店開心左成個星期，後來吊高黎賣而且越吊越高之餘縮晒水，期待已久的旺角舖差唔多冇幫襯過。四十幾蚊個包餐實在太貴本來冇打算食，見反正無聊兜黎望望，好彩咋唔係就錯過左呢個可能係Burger King史上最正餐。

估唔到向來賣多餡多味之Burger King，會返璞歸真出豬柳蛋漢堡 － 或者驚俾人告，個包叫做豬柳煎蛋堡，雖則同一樣野黎。由細到大豬柳蛋都係我最鍾意食麥記包，但會幫襯Burger King個乜叉煎蛋堡主要因為價錢：個廣告大大隻字$26.5起，平過正價餐十幾甚至二十蚊，值得一試啦，雖則都中左招，睇小左個「起」字，原來廣告入面三款新包當中最少餡最普通果個豬柳蛋，先至賣得貴$29.5。反正貴左俾多八蚊加洋蔥圈同雞手指，豪俾你。

起初冇咩期望純粹貪平，點知個包好食到唔信。逐樣比的話，個包用番麵包而係麥記鬆餅唔搶餡味，已經好食左啦；Burger King招牌就係即叫即燒靚豬柳，你麥記平價量產點比；塊蛋唔似麥記成日煎得太熟，少少生同塊扒一樣好多汁；就連芝士都贏，車打芝士非常夠味而且溶溶地夠晒口感，其實單芝士已經贏左人地成個包。全部加埋唔似麥記經常整得太鹹，而保留到Burger King一個包入面有好多隻味，又互相比衡到唔會某一隻味太搶之特色，加埋其他野一樣掂，汽水我鍾意百事多過可樂，薯條呢你食過一次BK就唔會再食麥記架喇，洋蔥圈雞手指更加唔使講，作為主打菜式之一麥記今舖大輸。缺點唔係冇，除左貴左三蚊，相入面個包勁大勁高舊蛋仲厚過墊底塊包，點知實物同粗製濫造的麥記有得揮．．．

當然，好食一回事，點都要睇埋價錢。用我屋企樓下麥記參考：

• 麥記豬柳蛋漢堡 散賣$13.4／套餐$26.5

• Burger King豬柳煎蛋堡 散賣$19／套餐$29.5

麥記較平就一定（平唔過的話死左佢算啦），不過原來都唔平得幾多，雖則散叫一個Burger King要成廿蚊貴人地一半的確好很高價，補多少少夠去麥記買個足三兩，但以餐計只貴麥記三蚊，而我絕對肯俾多呢三蚊支持BK豬柳蛋。同睇到麥記食水幾深，散包轉餐大家同樣多汽水同薯條份量亦相若，但要食呢兩樣野麥記可以收多$13。所以我好耐冇食麥記餐，除左薯條唔掂，同實在太搵笨當大家傻仔。麥記豬柳蛋只有佢減價賣$6-8一個時先會幫襯。

開左幾年，我第一次真心覺得Burger King吞左雞記旺中地庫個舖位係好事黎。如果屋企果頭有得食，真係每日（最少）一個呀。

「聽到未呀，蔡加讚，快叫Burger King去九龍城廣場開間分店啦！不過唔好食雞記間舖呀，食麥記好喇！」