相關閱讀#1：《劉Sir個網七週年誌慶之黑椒漢堡s》
http://lau-sir.com/mcpeppers/mcpeppers.html

相關閱讀#2：《窮一生為樓．為樓一生窮》
http://lau-sir.com/live_to_dwell_dwell_to_die.html

自大約十年前第一次出，黑椒漢堡一直係我最鍾意麥記包，就係因為簡單直接：黑漢，漢堡，平（曾幾何時）。麥當奴咁多年黎最抵食係「二三四」，即係$2個軟雪糕、$3個蘋果批、$4個漢堡包，記憶中大約02年底開始做到到03年頭，經常一個漢堡包加兩個蘋果批$10一餐食得飽又開心，再者未瘋狂加價就算唔係「二三四」其他野都唔算太貴，而果陣出黑椒漢堡冇耐（通常將軍漢堡出完就到佢，幾成麥記傳統），一個只賣六至八蚊屬正價包中最平之一，合情合理因為一塊扒加汁落洋蔥粒兩塊包夾住同普通漢堡包一樣咁齋，買兩個先十幾蚊又落足料冇而家暗中縮水咁賤格，每次出黑椒漢堡都食到心滿意足。

過三四年價錢已經去到十頭，不過一個包有兩塊扒都叫有個交代，同水準冇退步過。2008年《功夫熊貓》帶契仲出埋雙層版，普通版特別版每樣買一個併出三層六塊牛柳帝皇版，未講食單賣相已經殺晒。整個帝皇黑椒漢堡要$12.5+$17.8 = $30.3，以當時計其實相當貴，單層版賣十三蚊等於幾年前差不多兩個包，雙層版直頭買到舊時一個餐啦。

之後$13-14變左黑椒漢堡正常價，對上一兩年前話特別優惠平兩蚊開心番，點知再出已經賣到$15.3，珍寶版仲要貴多六蚊，理由係2011版用左足三兩果隻加厚牛柳。食左一次，當堂灰晒，因為

1. 足三兩牛柳係大過麥記一般牛同豬柳，但只大得少少所謂加厚亦唔見厚得幾多，以前一個包俾兩塊細牛柳，加埋唔見得少過而家一塊加厚。

2. 主要問題唔在於份量而係味道，肉質本身已經粗你仲加厚立即冇晒口感，味道亦唔夾黑椒汁，非常失敗。

3. 珍寶版加$6但只多一塊牛柳，而唔似以前俾多兩塊之餘送多塊包，冇左一層變兩層之超值意義。

瘋狂加價已經算，一換牛柳立即難食晒，多一事不如少一事完全唔明無端端做乜要換，唯一解釋只有乘機縮水賺到盡，絕對相信一塊厚牛柳平過兩塊細牛柳，珍寶版仲包都唔俾多塊慳多筆，少左又難食左反而加成20%價，剛剛大鑼大鼓話自己重新推出廿蚊餐點樣惠澤社群的麥當奴你真係好有企業良心呀。

早前睇完樓有感而家物價高到連食餐麥記都要計過度過，同財團賣貨完全利益行先消費者權益同應得質素不在考慮之列，食完新黑椒漢堡感受更深。十年前初出買一個俾十蚊仲有幾蚊找，三四年之後已經只食得到半個。再多三四年，早幾年食到個餐筆錢只夠買一個包。2008要食個三層六牛柳帝皇黑椒漢堡，$30.3就俾到你皇帝級享受，2011想同樣玩法要俾多六蚊$36.6，三十只夠食個普通版套餐，最重要個包難食左之餘，而家去麥當奴仲叫餐係on9的，舊時點貴麥記餐都有樣野出名就係薯條夠多塞得飽你，家陣中薯條除左盒大入面同買客細薯條差得幾多？又貴過人又食唔飽俾咁多錢食黎做乜？

雖然一早放棄麥記，每年仍然會為黑椒漢堡期待同興奮，點知黑椒漢堡2011由年度盛事變成年度之恥，新款式開發行貨冇料到，叫好叫座舊款式為利潤放棄質素，你收得貴賺錢一回事連做好少少甚至維持水準之誠意都冇，麥當奴你收皮啦。