連續三日會展朝九晚七擺fair做到殘晒，帶病在身加上接左個project要趕，又無端端要OT鬼死咁遲放工，結果2011/10/29今晚，最後只好放棄蒲吧哥德節選擇朗豪坊Live Stage同學會音樂會。通常睇完一場show都會開個Project: F.A.M.E.，今場一來免費二來有糖兄妹有G.E.M.同最最最最最最最緊要有謝安琪，照計係一場會黎的話不得不大寫特寫一番的大show，但求祈幾句算數，近來超忙冇乜時間寫野之外， 做fair忙到相機唔記得叉電影唔到多少，但其實冇乜所謂因為結果只郁過兩次手影兩張，一張係朗豪坊十二樓舞台前爆滿萬人空巷景，如果唔使OT可以早放的話或者夠早到企到較前位置，而唔會只可以人群最後徘徊；另一張就係上面俾人迫到甩晒焦的謝安琪（唔係好大的）大頭，劉Sir這超級fans第一次影到佢真人。之後收埋部機算數，因為只會影到人頭、人身、相機、大機同埋紙牌。

咁大卡士加免費，實在超多人，但當靚仔靚妹為主時，實在好難頂，尖叫靚妹唔係最大劑，其他歌手表演時猛咁不斷大大聲講「我黎睇ＸＸＸ架出黎未呀」班MK仔先死。

開場係goldEN同Ekee，就好似睇indie gig，出場之後台下起哄「邊個黎」「唔識」，跟住成班人散水唔見左。雖然我承認goldEN同Ekee的確未夠好，後者直頭可以用「唔掂」形容。

作為謝安琪fans自然留守到最後，見到尾二G.E.M.一唱完台下大班人即走，都幾灰。

講到演，各歌手選曲都唔太理想，尤其G.E.M.，而且唱得好少，作為免費演唱會，都未能盡興。仲場地關係唱得好克制，G.E.M.本身就係要嗌但嗌唔到，冇乜癮。

身為超大fans，其實只係第二次現場睇謝安琪，仲要兩場都唔使錢，對上一次仲要係六年前新世紀廣場半game show半演唱會，當時剛出完《K sus2》，狀態達前所未有高峰。今次隔左五年生埋仔，冇預過可以比得上以前，《十二月二十》甩甩漏漏，最少《你們的幸福》達標，但都幾擔心。

最後一樣：唔知係咪人多累事，音響好差。黎過朗豪坊睇咁多次，今場最差，可以話唔合格。

講完，迫一餐之後流住鼻水返屋企，仲要通宵趕project。今次係第一屆同學會畢業禮，唔知會唔會有一屆係Kolor同Peri M一齊玩？（有的話，果場可能得今場五分一人都唔夠，哈）