德國十日主要四圍行玩同睇，購物消費冇乜，幫人買手信多，買俾自己除左少少野食，只得明信片一張。行過好多舖頭明信片通通行貨到爆，法蘭克福來來去去賣教堂同萊茵河景，海德堡就山林古堡雖然好鬼black metal始終又係悶，科隆玩設計吸引得多，本來冇打算買，不過見幾得意同一場黎到冇理由乜紀念品都唔買咁灰，貪過癮平平地買張寄俾自己。

做得遊客生意梗吊高少少，明信片最低消費五毫子歐羅大多不離一蚊，可能我揀呢張冇實景所以五毫搞掂，但仲開心又平又有得玩。跟住去郵局寄返香港郵費一歐羅，當時歐羅兌港元匯率係10.5，即係夾埋港紙十六蚊左右。郵局睇檔兩個師奶都答我唔到德國寄信到香港要幾耐，開頭以為要兩三個星期，點知正正一個禮拜七日就寄到屋企。真有效率，抵俾十蚊郵費支持。

一張明信片背後，仲有兩個故事。

1. 好多時入到大舖頭或者去到大機構詢問處，唔係想刻意搵後生靚女，但遊德國幾日經驗之談，有時真係迫你專揀後生仔女問野，因為大機構女性服務員好多時年齡跟服務態度之惡劣程度成正比（只限女性，男性反而冇相同問題）。班阿嬋大部份時間兩三個圍埋吹水，你行緊埋去未開聲已經黑口黑面擺到明唔想招呼你噉款，阻住佢地吹水嘛。買完明信片搵郵局寄，火車站問晒詢問處兩個師奶，兩個都唔多願答俾埋地圖佢指都唔肯果隻，兩個講條路線都唔同，仲要兩條路都錯。去到郵局對住兩個問郵寄詳情又係十問九唔知一唔應。寄完信返地鐵站搭火車去玩，問負責指路個師奶邊個月台上車，問兩次一次指左面一次指右面結果我自己周圍撞算數。如果服務員係後生仔後生女時情況極端地相反。學精左，以後一見到師奶即閃，寧靠自己搵莫被阿嬋昆。

2. 上回提到俾火車站詢問處兩個師奶老點，搵郵局走黎走去蕩失路只好街上搵人求救，有個返緊工的太太都唔清楚，但特登兜路帶我去附近個油站幫我問路，油站入緊油個後生靚妹妹以純正流利英語仔細地話我知點樣行去郵局。話左架啦。以後去德國旅行，撩後生女搭訕，大條道理。