聖誕節又凍又多人又一枝公，當然係乜街都唔出匿埋屋企，不過為左應個節，咪落街買野食開個party仔開心下。一個人食得幾多自己整懶一回事想整都唔識整啦，去買薯片蝦條最實際，落到超市居然撞到芝士波＆芝士條買二送一，世紀難得立即大手入貨。

「好平咩？」

真係好平。由細到大都好鍾意食薯片，近幾年食少左好多，因為加價加到黐線。睇落好似好大筒，其實芝士條同普通大薯片一樣得100-110g，芝士波仲衰同樣價錢但少差唔多30g，以前其他牌子大薯片賣七八蚊時已經要貴人兩三蚊，灰在我鍾意食波多過條，好在成日做減價十蚊唔使，記得讀中學時八個幾搞掂，當時仲叫紳子牌。後來改左做卡夫牌（當中因由就冇研究了），加價加得好兇，三四年前薯片開始每年加一蚊，芝士波同條仲勁個半兩蚊噉加，而家賣到十九蚊一筒，當連俾十五六蚊買包薯片都唔捨得，芝士波更加唔使諗啦。今次買二送一除番一筒十二個半，價錢終於返到去似以前，即使落到去十蚊冇乜可能，都夠令我今個聖誕快樂番少少架喇。