每週一相片大行動

2012 Week 10




個半禮拜前講到發現原來旺角都有喜喜喜喜,雖然水準未及深水土步總舵,想食平靚正雞軟骨可以退而求其次黎旺角舖唔一定出深水土步。冇諗到一串雞軟骨擊起千重浪,平時個blog一日只得幾十人睇,本已廢柴到粗口都不足以形容的Yahoo改版改到介面同成個社交系統再加無能之後更少得番十幾二十人,唔知點解旺角喜喜喜喜張相出左街,禮拜未完有二千幾人睇,而家一個半星期已經向四千進發。


點解會咁勁是個謎,對上一次有blog文破四千瀏覽已經係《天與地》(如果計埋Facebook版同lau-sir.com原文俾人豆瓣同Twitter(唔係微博,係Twitter)大陸勁推,過二萬都唔奇),居然Yahoo blog冇宣傳加個新系統咁廢都每日三四百人睇,又查唔到係咪有人推定Yahoo點樣谷,只有話喜喜喜喜真係咁出名咁受歡迎。


要寫blog要多人睇,成功因素一是題材夠潮,二是要推上報or高登,三是睇彩數全賴天時地利人和,可睇番之前一次紀錄陳年開午餐肉記無端端成為每次提到午餐肉例必同陶傑一齊出現的高登潮文之《高登討論區資訊傳播效能測試 featuring 劉Sir個blog》,話時話Yahoo blog新版介面己經冇咁多數據俾你睇。所以,寫野使乜咁搏命丫,《天與地》寫幾千字四千幾人睇,喜喜喜喜幾十字已經三四千人,都係膚淺好。當然,更簡單方法係貼囡囡相J圖,要唔多使出力而一日有三千人黎睇,其實唔難。


但任何一個blog/xanga有幾千人流值得留意,唯獨Yahoo blog可以不理,因為Y Blog就同佢間公司一樣頹到不可理喻,全個介面同系統本身已經同人地脫節幾代,到只得好似我呢種已經寫左太多文走唔甩的舊客仲會用先肯升級(根本新寫blog都會揀Blogspot或Wordpress,完全唔會有新人加入,仲升黎做乜?),但各方面仍然同人地差好遠,其中一個咁多年視而不見大問題係spam。好耐之前Yahoo blog已淪落到只為spambot同垃圾廣告存在,十個留言九個係廣告,由鹹碟到團購到買賣立雜野都有,今次喜喜喜喜除左引來人流仲獲勁多人留言同關注,不過我自己都相信當中有一半係bot黎,洗廣告留言都唔知洗左幾多,而新版Y Blog最仆街係取消左黑名單,洗完轉個頭又留過。一版還有一版垃圾,選用Yahoo Blog係我寫作生涯最後悔決定。




每週一相片大行動.綱要




Sir個網

lau-sir.com


Sirblog

http://hk.myblog.yahoo.com/lausirisual