放假都黎會展行電子展，除左因為真係想行，仲為左Ｎ年前已經出名到上晒報紙雜誌的泉昌。上個禮拜自己擺fair撞正復活節幾日紅假，估唔到小食檔都會放復活節假冇得食，今次行完fair有免費過海穿梭巴都唔搭，行到身水身汗都都要特登出黎再回味全香港最好食臭豆腐以圓心願。

想當年2003沙士果排就係黎軒尼詩官小實習，超級開心因為上午校只返半日，每日一點準時放學行過隔籬街就係巴士站，避晒繁忙時間兩點前實返到屋企嘆到呢，返到食完飯訓個晏覺起身睇埋閃電傳真機先開始做野，仲舒服過平時返學。而家邊度有半日制學校呀？所以新一代小朋友永遠唔會明白我地細個讀書幾咁開心。去搭巴士一定會穿過橫街經過泉昌，每日放學必定食番一兩舊臭豆腐風雨不改，因為好好食，唔係講笑檔口位置街中間，街口未行到已經傳來陣陣香／臭味，旺角好多檔一早俾人投訴大陣味而唔再賣臭豆腐甚至執埋，仲邊度搵得到呢種未見到已經聞到之old school街邊小食檔？人地整臭豆腐通常整到塊皮好厚，佢薄得黎仍然好脆豆腐肉又滑，仲可以入舖邊條污糟冷巷坐低「堂食」夠晒風味。講真，唔係復活節冇開食唔到又勾起左舖癮，未必會為區區紀念品特登放假加大熱天時過海咁神心。

係好食，不過唔咁亂咁豪，因為好食代價就係十蚊舊。十年前先五六蚊，十年間加價近倍，賣得仲貴過旺角，尤其行出街口已經係豪大大加五蚊有食得飽的炸雞一客，這全港最佳臭豆腐就有點奢侈了。如果命運能選擇，劉Sir當年棄metal成為真正阿sir的話，今日對白可能係

「十蚊件，咋嘛！同我黎兩件，一舊水唔使找！」