每週一相片大行動
2012 Week 23 In Memoriam：
抗戰二十三年
繼廿三年前出事後全家上街遊行，第二次參加有關六四活動， 因為就算2012唔係世界末日，今次都可能係香港最後一次六四集會， 特此見證，最少第時同人講得到，六四晚會是甚麼一回事。我地阿爸阿媽至再上一代非常明白共產黨有幾邪惡，如果唔係都唔使走難落黎英治香港。我地今代，就係經八九六四明白。
事實見聞：
對事不對人，警方今次維持秩序同控制人流做得好，好聲好氣， 比地鐵站入口一字排開大家鬥大聲亂晒龍的籌款攤位更得人心。
七點半到時，近大馬路幾（三？）個球場已經坐滿，相信屬正常。
行球場側走道入場到後面時，正好遇著方政入場，有緣同佢擦身而過。
企球場最後，好多後生／學生，結果好似去左戲院，女的無知「咦點解ＸＸＸ」，男的專家口吻「我上（幾）次黎ＸＸＸ」，好煩。
另一煩是，大把人一係玩手機勁Whatapps仲要同身邊人講邊個friend個message點點點，一係勁閃燈或勁大快門聲影相。影燭光唔使閃卦／個台咁遠你枝閃燈仔唔會閃得到卦／電話影相較靜音唔難卦。
連嚴肅政治集會都可見香港人性格，開始冇耐默哀儀式結束，已經開始不斷有人走，離場人流一直未斷過。可能黎到先發現原來今次集會冇三舊水收，即撇。
學聯同李卓仁嗌口號太聲嘶力竭，甚至幾達歇斯底里幾近過份煽情，我支持偏激進抗爭路線都有點頂順覺得過左火位，「民主潮流不可擋，順者生、 逆者亡」好激喎（定還是有典故？）。有理由相信有黎今次集會的師奶們老母們，返到屋企立即教佢地班仔女千祈唔好掂政治搞學運，記得乖乖地做個良民「和平理性爭取」。
同，既然都豁出去嗌得咁激，不如索性借大法好的無敵金句「天滅中共」，乾脆直接。
全場唱歌時，前面有個人枝蠟燭燒著左擋風個紙杯，場面壯烈。
大會宣佈今年破紀錄有十八萬人參加，我信的，睇連頹如我都會出席就知真係好多人會黎，而且集會開始之後外面仍然有好多人入緊場／入唔到場。雖然，入到黎坐半場就走亦好多．．．
九點十集會已達尾聲，雖然台上仲有好多野講、仲叫大家唱多首歌先正式完場，身邊已經得番四分一人唔夠。
唔好話我衰，我冇諗過會有咁多後生靚女靚OL參加。所以，黎緊記得繼續搞呀（．．．）
放工用九個字等車再搭多九個字出維園好耐？全場十幾萬人一齊走時先大鑊，除左等巴士排隊排第幾十個，仲要同大把打尖香港人／自由行爭。個幾鐘先由龍尾去到龍頭，唔係有車（頭半個鐘只得兩三架車滿晒人，去到第九個字先開始有車有位俾人上），而係前面班人等到唔等逐個逐個走，先去得到龍頭。唔怪得咁多人趕住走啦頭先。
最後的事實，希望唔會成為事實：劉Sir facebook因為出一張相而被bam。
劉Sir個網
劉Sir個blog