前排行過七仔見到張海報，影低諗住遲下試試，點知今個禮拜經過已經唔見左，唔知仲有冇賣？冇就唏噓，因為細個好鍾意食思樂冰新地，雖然小學時$4.5賣到中學$7.5算相當奢侈，以當時物價等同於一個冰山巨火a.k.a. Magic Cone (R.I.P.)，同隻杯好似細過細思樂冰唔多抵（當時的杯尺寸同而家簡直兩個世界，一個遺憾是未有挑戰過珍寶裝），仍然鍾意大熱天時放學整返杯可樂思樂冰再加軟雪糕，立即透心涼，但後來麥記開始賣軟雪糕仲要只售$2平七仔一半有多，七記索性連軟雪糕都唔賣，自此世上再冇思樂冰新地呢回事。

勢估唔到絕跡十幾年失驚無神出返黎，雖然軟雪糕不再成個蓮花杯掟落去就算（所以個名都變成黑冰牛了），總想懷緬一番。但亦因冇左軟雪糕，一直冇心情落手，始終從前食新地樂趣係將思樂冰同軟雪糕不斷攪撈到成劈屎噉有得玩有得食，唔知點解身邊好多人對呢種食法非常反感，所以每每食思樂冰新地時總帶來另一份優越感，硬雪糕邊度做得到？同「減價$9杯」都幾襟計，仲話原價$15.2，雖然我明係想繼續同冰山巨火睇齊以顯身價，但如果真係賣到十五蚊咁貴，我自己買杯大思樂冰同一個雪糕杯黎撈，咪仲抵過你細細杯黑牛仔多多聲啦？