一年前，公司樓下間華潤萬家執左，非常無奈，因為除左已經難搵之士多同雜貨舖，而家只得去華潤同大昌兩間，先可以用合理價錢滿足你衣食住各種需要。因為附近得佢一間超市，執左之後冇左個就腳地方買平野，跟住個舖位一直吉落去，好心業主就平租留住華潤繼續方便街坊啦。

過左大半年，隔籬同對角兩棟所謂豪宅相繼建成（「所謂豪宅」＝「外面睇酒店咁靚，但附近社區爛溶溶，地下旺舖一間都未試過租出，底層商場連扶手電梯同燈都廢事開，實際上樓上有冇人住都成疑問的金玉樓宇」），個舖位終於有人租變左間超大地產經紀舖，而瘦田姦開有人爭，對面本來賣開雜貨五金，都俾香港置業食埋打對家。

正好反映而家香港已經得返炒賣同賭博之社會現實，一係做地產一係做金融，有舊樓黎插旗傾收購，有新樓霸街舖兜買家，連最基本飲食業同零售業都冇位企，難怪咁多地方唔揀揀到黎大角咀傾緊收購個地段起兩棟新「豪宅」，又要起完好耐都唔覺有人入伙，因為根本唔係起黎俾人住，只為俾有心人有樣野炒同推高同區地價。

我屋企九龍城土瓜灣一帶亦開始出現同類情況，每有舖位丟空，好大機會變成地產代理，同連老人區平民區都可以開好多品牌檔，再望望新界北舊市區，經自由行同投機人士同心協力，落街只見到金舖、藥房、找換店、物業代理、股票行、大超市同連鎖食肆，再搵唔到多少舊式地區小店，相信假以時日早已老的九龍都會同樣淪陷。