平日朝早起唔到身，上星期國慶加中秋長假，反而好無聊地有幾日十一點前彈起落樓買早餐食，勾返起沙牛麵舖癮，放完假開返工都居然好神心地掙扎到早起身，幫一幫襯茶記先返公司。不過而家連食早餐都開始有點奢侈，屋企果邊叫老人區舊區，都已經搵唔到廿蚊樓下一餐，最平都要$23。所以今朝向大角咀出發。

早一個小巴站落車去砵蘭街太子地段，有間食開每次返工廠朝早等老細車時都會黎攝時間，門口有個牌話「$16起」簡直皇恩浩蕩，但入到去成個餐牌睇極最平個餐都要$19，仲要細份到食兩個都唔知食唔食得飽，到頭來都係廿四五蚊先食到個早餐。不過廢事問點樣叫十六蚊早餐，除左個「起」字有好大討論空間，個牌寫到明「歡迎訪港旅客」，而一睇就知我唔係旅客啦自然歡迎我都廢事，或者下次我要拉隻篋入黎再乜話都講就係唔講廣東話，先可以用旅客身份食返個十幾蚊茶記早餐。

香港人係自己地方反而會俾自己人歧視，真係悲哀。