黑仔的究極層次，就係任何野埋到佢身都會被牽連到誅連九族。今次呢，大家都知道年底Motorola幾乎完全撤離亞洲市場，差唔多全部亞洲總站同時閂門，從來做唔起的香港當然唔例外。估唔到劉Sir連做Mo記fans都會累到人。

我第一部手提電話係中七時老豆唔用塞俾我的摺龜，摺埋大過部iPhone5，當時已經係超新高科技，有手提電話真係好奢侈架，而且只用儲值卡因為上台唔平。跟住老豆換左部V仔即係Razr又係用完之後掟俾我，就正式成為Motorola fans，當時兩大電話label Nokia同Motorola，雖然話襟用個個都講Nokia無敵實際上手工同耐用程度Mo記不相伯仲，不過唔似Nokia玩普及Motorola一向走商務同實用路線，功能同設計都男性化，所以市場反應好極端一係超鍾意一係完全唔受，作為一個永遠同潮流脫節最緊要實際的柒頭我自然屬於前者，而家仍然係覺得V仔係史上其中一部最型手提電話，想當年個廣告拍得好型，講到廣告Mo記從來係最型果班。話時話，《Mentalist》主角都係用Razr架。

跟住老豆自己都唔捨得就拎部Nokia同我換返部V仔，自己去左買人生第一部手提電話，A1200明。當時仲係前iPhone年代Linux天下世界上仲有Palm呢回事，而揀明除左Motorola加摺機仲係電話科技尖端，主打商務客一部機有晒卡片scanner（不過未用過）、OCR同相機字典（聽落好吸引但同樣未用過）、內置電話錄音（超有用，次次打上寬頻屌CS同講數幫我留晒底）、可以用部電話上網同查GPS，當其他電話有得打打字查查字典已經好新奇時，明係電話+Palm的新高科技產物（明＝日＋月呀），仲未講Motorola最出名的超級降噪Crystal Talk（可惜毒撚冇電話，浪費左Mo記電話全行最佳通話質素），同埋型到爆炸的透明蓋，唔開蓋都可以直接查到資料唔需要次次特登揭開。最有趣係明系列其實唔完全算Motorola出品，係佢地搵大陸代工對中國市場設計出黎之大中華專用機，如果而家大陸廠設計可以有咁高水準而唔只得會爆炸的山寨貨你話幾好。只可惜最柒係，Mo記搵左何韻詩首《光明會》做明主題曲．．．

部A1200我係出左一年之後跌左價$1000先磅二千四買，玩左一年左右就死左，即係用過摺機的朋友都會明白摺機的樂趣就係用完或講完電話一野拍埋果下聽覺同觸覺快感，只係成日啪啪啪話咁快就啪到入面電線鬆晒死聽筒，又遇著出新一代明A1600就trade in左佢升級，老實除左畫面靚左少少、芒大少少、ram & rom多少少行得快左，兩部機基本上冇乜分別 － 呀應該話1600外型成塊餅噉樣衰左，我都有少少後悔點解唔換另一部1200好過。雖然頭一兩代真係好多人用，但A1600同年蘋果出iPhone，我已經差唔多係全條街唯一一個仲會用明的柒頭，過多兩年Motorola最後一擊Milestone大戰iPhone 2&3拎到少少甜頭，就完全放棄Linux同明系列，其實2011仲肯出新一代行Android的A1680實在難得，因為當全部電話廠轉晒得個長方形篤篤篤的新世代智能電話，任何非午餐肉形電話已經幾近絕跡，只係曾幾何時主流的摺機進入iOS vs. Android世代好多人反而用唔慣，除左叫做商務機但個芒勁過晒同期99%電話包括出名靚畫面的iPhone，硬件唔夠強同價錢企硬二千中唔跌破二千（兩個結果我冇買到而轉買Defy+的原因），除左去電話舖我完全未見過部機實物，全中港台總銷量有冇四位數字都成問題。相信明系列從此收皮了。

自從iPhone當道，全世界電話工業設計同軟件發展其實慢左好多甚至倒退，睇返以前電話成日有新奇野，設計部部唔同摺又得推又得趟又得，會有人開舖幫你改機加裝飾加閃燈之類，又成日諗到新功能輪流鬥突破，而家電話變晒電腦大家用同一堆硬件砌出黎、用同一個系統同一堆app，除左畫面美化冇晒個性，分別只在於機殼少少唔同同幾多ram幾多rom咩芒咩CPU跑分有幾高。對我黎講最灰係以前的基本功能反而冇晒，好似「安全問題」好多Android電話就算裝左app都做唔到雙向電話錄音，同想鬧鐘響一定唔可以熄機連休眠都唔可以，迫你部機長開唔熄加速打柴。當初會考慮買A1680繼續支持明全因佢係唯一一部熄左機仲識響鬧鐘同內置電話錄音Android電話，唔知點解呢類好實用同時應當好基本的功能，而家要所謂商務級數先至有。

有鑑之前成日大大力啪死左部機的教訓，部A1600錫住用左四年先開始有點壞，與時並進地換左部Defy+一年之後Motorola就話執笠，見最後今天大清貨Razr Maxx賣到半價二千五，放左部Defy+先同原價買部Maxx一樣，唔追電話都立即把握機會換機，因為可一不可再呀第時仲邊有機會用中楷機價錢買到全新一線頭旗艦機？只係大家個名一樣，而家Razr除左一樣賣刀片咁薄已經唔再係摺機淪為午餐肉，加上可能係香港末代Motorola機，對於我呢個fans由部機得2.5"電阻芒、40MB ram同8MB rom開始，追到黎4"電容AMOLED雙核兩激ram都叫弱的年代，見證住Motorola點樣大上大落，實在有點唏噓，所以仲留住部A1600當鬧鐘用，本身諗住兼埋後備機，但新一代機全部細sim卡，想用黎打電話就要靠買儲值卡。而且而家連出左一年唔夠「新」Android機回收價都低無可低，仲有冇人會肯收我部明都成問題，所以唔用加冇用都留住部明做個紀念，得閒無事睇開機片頭同電話鈴聲「Hello Moto」。

Moto撤出香港最大問題係，雖然我唔係年年換新機種人，但部Razr Maxx玩死左之後點算？從來唔鍾意三星，LG同HTC QC得啖笑，大陸的會爆炸，日系機唔會用，水貨機唔曉用，莫非真係要等Nokia出Android機？或者，下次輪到邊間Android機大廠執笠？