麥記上月底出左個都幾搵笨的$28.5 = 6件麥樂雞加4件香辣雞翼禮盒裝，唔夠半個月玩得仲大連大雞脾都撈埋。擺明襯KFC全線執笠前夕落井下石。

一個餐可以兩件辣雞腿揀配一客四隻雞翼或者一盒六舊麥樂雞，老實講抵食過而家縮晒水的KFC好多，因為一件雞已經有唯一食得飽我的KFC加大碼雞脾皇咁大，就算你完全唔加其他野，單兩舊大雞脾甚至一舊已經塞得滯你，我食得咁喪一舊半已經頂住頂住，唔加其他野都夠晒。不過食就都係KFC較好食，麥記雞腿炸得幾乾，而且成舊雞超重黑椒味由頭到尾得個辣字，如果純粹以味道唔太差又食得飽為前提都OK的，或者因為本身我受辣同鍾意食黑椒，不過可以唔醃得咁濃味會更正。

只不過價錢真係幾襟計，計散賣$16六舊麥樂雞、$17四隻雞翼、$18一件大雞腿，仲貴過KFC，雖然份量大得多。買個盒裝其實同買兩件雞腿再免費送是但一樣野俾你差唔多（證明食水幾深），好似拼四隻雞翼$39，不過呢個係純粹叫雞價錢，去KFC食個有雞有飯有野飲的雞脾皇餐仲可以有找，如果想加埋薯條同汽水做個餐收你差唔多$50，去麥記要五條食一個餐應該係紀錄新高，而且麥記薯條退晒步齋食雞又食得飽，仲加十幾蚊轉餐黎做乜？所以我寧願散叫個盒裝，食完過隔籬士多或者涼茶舖$4.5買包／碗菊花茶下個火好過。

當KFC已瀕收皮，如果唔係賣得咁貴，可能我會成日食呢隻麥記辣雞腿。不過最希望都係KFC可以重振聲威，因為講到食雞，始終KFC「性價比」較高。