每週一相片大行動

2012 Week 52




玩iPhone同Android電話,分別就好似玩首辦figure同砌模型:iPhone買到返黎已經乜都執好晒靚一靚俾你唔多使自己落手搞,想搞亦冇太多可以整色整水;Android相反整色整水才是重點(某程度上因為冇幾多原生介面唔樣衰,迫住要自己整),搞lockscreen搞homescreen搞wallpaper搞launcher自己由零開始一手一腳砌出黎鍾意點就點,同一部機都可以砌到改到同人地完全唔同,想玩得深入就搞埋軟件硬件刷機tune機就好似砌Master Grade甚至Perfect Grade一樣。所以你係電腦白痴,或者唔鍾意要落好多心機落部電話度最好拎起手就立即有得用,千祈唔好用Android機,你會想死。但相反同我一樣係死geek鬼,單玩美化都有排你玩。


上年Week 52出左第一版lockscreen + homescreen,今年同樣最後一個星期出而家個版,跟住就會同上年一樣format部機再砌過,除左手痕想試試新設計,仲因為通常玩幾個月部機就會俾我搞到好lag仲間唔中輕機,最諷刺地我兩部電話 - 之前Defy+而家Razr Maxx - 末期症狀都係乜都做到就係每次打同聽電話就會失常或超慢,用成分鐘打或聽一個電話算少事,部Defy+最嚴重試過打親電話就會hang機,唔知關唔關Tasker事,所以每隔一排就會砍掉重練,清清瘀血之餘轉下設計風格。從來冇乜藝術觸覺所以最緊要實際,呢個2.0暫時係我最滿意版本,因為WidgetLocker + Widgetsoid + Tasker真係夠晒smart。



Lockscreen

. 張Pacdroid食鬼wallpaper我都唔記得左邊度搵到,用佢除左過癮同黑色底,仲有剛剛好夾到WidgetLocker個版面,直頭好似畫黎就係為俾WidgetLocker用一樣咁完美。

. Beautiful Widget天氣 + 時間,兩個Widgetsoid一個系統數據、一個做開關。

. 兩個拉掣一個開相機、一個拉TeslaLED電筒,下面圓形鎖唔係用黎開鎖而係個八方向app shortcut。WidgetLocker最好玩係,你可以整到成版都係機關,唔識用拎上手都解唔到鎖。



Main Backdrop

. Launcher用Nova,4x5,五行六格dock。本身用Apex,但早排$2減價時有Nova,$2咋喎大佬點可以唔買呀!就轉左用Nova,而且絕無後悔。Nova同Apex基本上冇乜分別,除左功能同介面連設定入面文字都差唔多完全一樣,老實係咪其中一個山寨對家?不過唔知點解Apex成日crash同好lag,轉左Nova非常順加除左成日話小工具損毀要重新啟動widget好少出問題。唔好話$2港紙,就算兩蚊美金都頂到爛。我係佢開發組TeslaCoil Software超級fans,只出過好少作品但全部適合我呢種追求實用人士,WidgetLocker都係佢整,TeslaLED電筒本身多野玩又可以做埋Tasker plugin,HomeSmack設定應用程式預設值,除左一個玩shell command的我用唔著,佢地全部app我通通download晒/買晒。

. 用Neon Clock GL Live Wallpaper,貪佢內置幾種widget俾你揀內容和位置,就可以版版都有日期、時鐘、電量、天氣同指南針。另一個特別用途係畫面上畫果廿幾條蛇仔,好多人借電話見到都話「嘩乜你部電話畫面咁花咁難睇」,好快就會還返部機俾我,變相令人唔會亂咁借我部機玩。

. 我鍾意搵反傳統app,好似畫面頂條橫線係電量計黎,任何時候都可以隨時睇線長短知道仲有幾多電剩。個名叫T.E.A.M. Battery Bar,基本功能免費版都夠,收費版可以俾你改顏色同動畫,都係幾蚊港紙嗟唔爭在。可惜Motorola rom其中一樣最出名係電量用10%做單位,唔係開發者有心配合返Mo記系統整的話widget會顯示唔到個位單位只可以十下十下,就好似呢個app,不過冇乜人同我一樣用Motorola,所以應該唔會有人同我面對同一個問題。



Notification Bar

. 我部機裝左三個電量app:Battery Doctor、Battery Widget? Reborn!同GSam Battery Monitor。各有各好,Battery Doctor主要用黎睇叉電用,會幫你做好多紀錄;GSam Battery Monitor有非常仔細用電分析;Battery Widget? Reborn!就兩者中間,但用佢除左只有佢會幫你計每用電/充電1%要幾多分鐘幾多秒(呢樣真係好有用,但唔知點解只見過呢個app會做),佢個notification bar widget都好靚。另外兩個app資料性高但widget真係樣衰到爆。

. Android Market好多開關widget app揀,但我一直用Widgetsoid,免費之餘功能仲要勁過好多收費app。最新版超級大翻新,一行入面可以放無限個開關或者捷徑,嫌一行迫可以分兩行放,擺桌面之餘仲可以放通知欄隨時用到,非常方便。



Homescreen #1

. 又係減價時買的Business Calender,以前用開Jorte不過呢個俾左錢買梗用呢個啦,而收費app質素果然唔同,功能超多超齊介面同widget又多選擇,好似呢個full page月曆可以直接widget轉月份唔使入app轉,而且同Google Calender同步較少出問題。係衰Jorte介面靚好多,Business Calender個4x4 widget月曆全部字會壓扁晒超樣衰,要自己拉返做4x5先變返正常size。同唔知點解連月曆widget都要用sd card做cache一插USB就load唔到,人地Jorte免費反而唔使,仲做得好過佢。



Homescreen #2

. 減價時買落的Poly Clock,widget可以擺七個鐘一眼睇晒七個國家/城市時間,我地呢種成日要知道同個客時差幾多個鐘就最有用。不過老實冇乜用過,純粹為型嗟,而且個app都幾食資源,所以下次未必會再擺出黎。

. 又係Business Calender,呢版係4x4行事曆,仲可以直接碌上碌落睇之後有咩野做,型得黎方便。



Homescreen #3

. 香港地區天氣七日天氣預告。香港地區天氣可能係最實用香港製造app,不過有點又愛又恨...

. 一個同notification bar版一樣的Widgetsoid,一個4x1 widget放16個常用程式捷徑,差唔多唔使開app drawer。其實可以更多app shortcut,不過驚搞到堆icon太細太迫,8x2剛剛好。(雖然我launcher dock有用Multicon放個一開四shortcut widget都篤到冇問題)



Homescreen #4/Main Homescreen

. 用左香港地區天氣兩年,唔知乜事天氣預告冇問題,但最有用的即時天氣時鐘成日開機之後唔識得自己更新成堆問號,兩年都未搞得掂呢個bug,都唔知個開發組做乜。減價時買晒Beautiful Widgets同HD Widgets,老實HD Widgets較實用不過除左HD真係好鬼樣衰,都係Beautiful Widgets多野玩,冇幾耐前更新加左個8-bit版主題好過癮。既然Neon Clock GL Live Wallpaper已經有鐘,個widget就可以只擺天氣。

. 最下有曾經係我最鍾意的Organizer Widget,因為超級實用一個widget有晒通話紀錄、SMS紀錄同行事曆,不過黎緊未必會再用,因為我試過用app睇用電,一日之內佢可以自load幾百次,即係熄左芒部機都會搞到部機繼續行休眠唔到,雖然話總體唔係用好多電,不過成日無端端行咁多次都幾有問題。可惜而家冇其他似得黎一樣咁實用之app/widget。



Homescreen #5

. 又係天氣widget,今次係Aix Weather。成個Android平台Aix應該係最型天氣widget,只不過我地香港用就真係得個型字,因為資料跟挪威天文台,不論即時還是預測,都同真正香港天氣或香港天文台公佈相差幾遠。即係如果去歐洲旅行的話可能有用。

. 另一個Widgetsoid小工具,呢個係開關組。Widgetsoid真係好多野玩,而且我仲只係玩緊佢免費版,收費版好似再多好多功能。$10嗟,應該format完部機之後就會磅水。



Homescreen #6

. Evernote同Springpad一直係雲端筆記大戰兩大,以前我用Evernote,不過果陣Evernote一衰介面差二衰一定要連線先用到,所以揀左較靚同可以離線用的Springpad,但一年之後Evernote大反攻介面功能變到超勁仲要上大陸開埋分公司,Springpad介面相反越變越樣衰之餘server超慢,但用開而家先轉都幾難轉,同當你將server搬入中國即係我地香港人用都可能會俾大陸server睇實,就只有繼續中伏了。Motorola一向主打商務市場,我部Razr其中一個內置app就係Evernote,可想而知上位上得幾快,而家Springpad基本上已經冇人會提,睇黎應該收得皮了。又是一個俾地獄黑仔王剋死左的例子。

. 眾所鳩知Android版Facebook係其中一個最垃圾Android app,直到近來全新版由HTML5變返用Android coding寫,先至真正似返樣。之前因為個app太廢,所以用Android Pro Widget直接桌面睇夠簡單夠快。近來收費版減緊價$10.5,不過佢好多種widget我只用Facebook一個,同俾左錢只係可以轉色主功能差別不大,所以免費版都夠。



Homescreen #7

. Poweramp + ICS Widget Pack,基本播歌飛歌可以桌面搞掂,想轉playlist先要入app。又,如果只對條女有興趣的話,佢係1.0版lockscreen wallpaper條女暨我最鍾意內地女歌手潘辰。



暫時我都諗唔到仲可以點樣改,因為以自己追求實用心態,已經乜都最齊全最方便,所以可能format完部機之後,砌來砌去又係砌返一模一樣出黎,或者會減噉部份只為型但冇乜用的widget,下個版最後可能五版甚至三版搞掂晒。




每週一相片大行動.綱要




Sir個網

lau-sir.com


Sirblog

http://hk.myblog.yahoo.com/lausirisual