當你以為黑椒漢堡已經同食屎冇乜分別，麥記驚你嫌未夠一包還有一包屎，今次出埋咖哩漢堡，啡色一劈直頭係成舊屎塞落個包度似到十足十。劉Sir出晒名食得核突又唔劣唔食，又點會錯過丫，立即跟從多年傳統，拿拿臨落麥記食返個帝王版先啦。

其實我一直覺得咖哩漢堡呢樣野應該好耐之前已經出，因為麥記一早出新款出到技窮，差唔多五大洋七大洲多數人講得出個名的國家都俾佢地出過，既然黑椒賣左咁多年，點解賣點一樣係辣同樣衰的咖哩包而家先出呢？冇錯其實兩個包分別只在於汁同顏色，一隻係蘸黑色黑椒汁，一隻蘸啡色咖哩汁，再落洋蔥就搞掂。一向鍾意食咖哩，不過麥記隻汁好日式即係甜味為主，好重咖哩香味但唔多辣，我食晒成個三層帝王咖哩漢堡都冇諗過要飲返啖水，如果一心想食辣會好失望。

中間同2011年版黑椒漢堡一樣係落足三兩隻厚切牛肉，神奇地塊牛肉配黑椒汁時好唔掂，但今次同隻甜咖哩汁好鬼夾，初頭都驚唔掂想小佢點解唔用細牛柳，但食左一次之後，立即想再食多幾次。不過有幾個問題：食咖哩漢堡，真係好似食屎，特別開張紙時一定成劈汁漏出黎，跟住成手都係啡色一篤篤，樣衰到。同埋都幾貴，旺角食只買包，普通版要$17雙層版收$23 － 我屋企果邊好少少每樣平七毫子 － 即係砌個帝王版剛剛好齊頭四條。返去KFC食牛油雞好過。