食完免費煙肉蛋《爽》完，不如講講靚女。好難得見到劉Sir講女架。琴日講麥記派包果朝《爽報》頭條，今日講講封底廣告。你未必叫得出佢個名Sabina Kwong，都會認得呢位靚女覺得熟口熟面，因為拍左幾年平面同電視廣告總會見過一二，One Day Acuvue個電視廣告應該算佢代表作 － 話時話Acuvue揀女真有一手。若數香港童顏系model，我覺得佢好難排唔到第一。

今期做花旗銀行妹（一講到銀行姐姐就會諗起旺角恆生，跟住就會講衰野，請阻止我），個廣告電視未睇過報紙更加第一次見，不過其實差唔多日日都睇到，因為每晚放工巴士經新之城入亞皆老街個彎位必塞一輪車，轉彎對角亦即旺角恆生附近（總要提住！）惠豐中心窗口超大LED螢幕會不停loop住花旗廣告，實最少睇到一次靚女同大家講去佢地銀行借錢唔使還咁滯搵花旗借貸生活無憂好鬼開心。所以放工同佢見一面已經成為返工日子的生活一部份，雖然因為個LED銀幕分開三層，搞到成日個樣出唔到街或者個頭斷開兩截，都幾灰。

冇咩特別，純粹日日放工見到又咁蹺報紙睇到就諗起，咪順便講講。不過要講呢，其實仲可以再講好多：雖然好多人對劉Sir認識只係一個憑「非一般切入點」而於兩岸三地間饒有江湖地位的獨立音樂評論人，同埋香港metal界最大謝安琪fans，但當你有洞察一切之視野就自然會對好多事有意無意認真研究一番，包括睇女講女。「靚模」呢個詞報紙雜誌未日講夜講時我已經有用，用黎形容班靚妹model；我可以半學術地同你講靚模歷史，由邊度開始、點樣漸成風氣、幾時正式成型（其實轉捩點係《美女廚房》第三集），直頭寫篇文投稿去八卦雜誌都得；就連model label都有約略研究過，可以同你講幾間常見模特兒公司各有咩特色；拎起報紙雜誌，講得出入面一半model叫咩名甚至而家簽緊邊間公司；蘋果「中環我最靚」可以話你知邊日係影素人邊日係影model，有幾個final boss係model黎，名梗知道啦。假如一開始追求唔係地下文化而係流行文化，劉Sir今日應該唔係一條窮撚metal友，而一早做左娛記搵食。

即係劉Sir呢條傻佬其實唔係只得metal同謝安琪，仲有好多野係你估佢唔到 － 咁容易估到你都唔會一直咁鍾意睇劉Sir吹水追足咁多年啦係咪先 － 或者有日會見到佢寫一劍浣春秋式AV影評都唔出奇。聽落巧威威，不過如此知識技能係屬於一條即將迎接第三十二年單身生活的窮空毒撚，其實係好撚可悲的一回事。

灰完，不過未完。繼「每週一唱片大行動」同「每週一相片大行動」之後，係咪要搞返個「每週一靚女大行動」專欄呢，口桀口桀∼要好似寫metal寫謝安琪一樣，閒閒地寫返幾百千幾字同你慢慢道來其實唔難，單Acuvue逐個講都可以講一排，因為之前品牌合作開間label Primo即係Elite的確係香港model界elite集中地，雖然我較愛Unique。但要寫的話都要有理由地去寫，而唔係得閒無事「嘩呢條女正呀」寫包膠一樣噉樣冇乜意思，所以等有機會同機遇先再分享，今日會講起Sabina，都係因為一個我最愛model都係花旗廣告出身，所以會心血來潮。（放心，劉Sir口味同音樂一樣都係情迷不知名獨立派，你唔會估得到係邊個架喇，估到第時「每週一靚女大行動」就冇野寫啦係咪先）