每週一相片大行動

2013 Week 12

麥記搶包山傳 正傳




多謝麥記啦,佢今日幫我破左兩個紀錄。第一個係,今次應該是空前絕後地最早一次photoblog update,七點幾就出街。唔係麥記失驚冇神整個「全港早餐日」六點開始全港全部麥記每間免費派1,000個煙肉蛋漢堡,又點會咁早起身丫。真係好早,之前一日老豆睇報紙頭版見到個廣告已經話「嘩唔使錢聽朝一定要去拎!」今朝早五點幾就起身搞呢搞路俾佢嘈醒,點知原來佢五點幾係起身...睇波。搞到我都起左身,咪落街癲下囉。返大陸都冇咁早呀。


我5:50左右出門口,屋企位置正正係兩間麥記正中間,先去真善美村至寸樓地下間,5:55先得十幾廿人排。諗住冇乜競爭就去另一邊馬頭涌道果間先啦,行到過去6:05,就大鑊了條龍係由麥記入面排到出商場走廊再排到出面圍住間商場掟左兩個彎。阿婆力量果然強大難怪今朝連差佬都要出動啦,拿拿臨放棄走返去至寸樓,條隊都冇乜長過唔使排好耐,上面張相我係回程時7:15影,都只得三四十人嗟唔係好多,我六點二去排時隊尾先至係七仔門口,半個字搞掂。過癮在點解麥記姐姐會用份《爽報》夾住個包塞俾你?再睇睇今次搶包山活動英文名叫「National Breakfast Day」,咁政治(不)正確,莫非係肥佬黎贊助?係的話,拿肥佬黎呢舖我就撐你喇.jpg。


馬頭涌道可以放棄,好在我屋企佔盡地利正正九龍城隔籬,行多兩個字去太子道舖,6:25條龍唔算長keep住三四十人左右,又係排半個字就成功拎到第二個包,不過呢個時候個天已經光晒,條隊開始慢慢變長,晨完運耍完太極的阿伯阿婆們應該開始發力了,就去埋最後一站九龍城廣場。反而呢度最得意差唔多冇人,我排左一分鐘已經叫耐因為六點半呢個時間差唔多冇人過黎,好多拎完包走出去四圍同其他阿伯阿婆講「唔使排隊呀唔使急呀」,直入直出大家拎得好鬼開心。


因為屋企附近兩大條屋村大把阿伯阿婆,再加多四間小學兩間中學實搶到癲,諗住要排好耐隊,所以執晒包袱打算拎完包就出發返工,點知七點未夠已經唔止屋企樓下連九龍城兩間都排埋,而且其實本身唔太鍾意食煙肉蛋,所以冇乜動機好似班阿婆噉拎完一個再排過隊繼續拎,如果你係免費派豬柳蛋我就梗同你死過啦但煙肉蛋喎算啦過下口癮就算,就打道回府,留返俾阿伯阿婆同班學生哥學生妹慢慢爭啦。


亦因為噉多謝麥記令我創左第二個紀錄:劉Sir呢條仆街呢就出晒名好鬼不孝,不過今朝早拎到三個煙肉蛋,自己食左個仲有兩個,就拎返屋企一個俾老豆一個俾老母,嘩我都唔記得上次咁有孝道係幾多年前,你知啦時候仲咁早唔返屋企唔知有乜做嘛條街又熱,而且又唔係豬柳蛋你派豬柳蛋就話我三十個都同你拎同你食晒佢嗟,直頭返工途中土瓜灣九龍城太子旺角大角咀一路掃晒佢呀 - 挑原來講到尾始終都係一條仆街黎。即係佢老豆老母都好清楚呢樣野,所以見到劉Sir居然會咁早起身落街拎包上黎俾佢地,睇睇《爽報》頭條,再睇睇個包,好很驚:


「你...唔係想我地食飽先上路丫嘛???」



2013 Week 12.麥記搶包山傳


正傳:麥記搶包山直擊報導


外傳之一:所以而家係唔係有錢人都要買豪宅


外傳之二:食完免費煙肉蛋《爽》完,不如講講靚女




每週一相片大行動.綱要




Sir個網

lau-sir.com


Sirblog

http://hk.myblog.yahoo.com/lausirisual