每週一相片大行動

2013 Week 39

2013大香里大阪遊.五:關西美女篇




大阪遊記來到最後一回,好物沉甕底,臨尾梗係講大家最關心的日本妹啦。我諗冇幾多(香港)男人會唔鍾意日本妹(原因,你明啦,口桀口桀),其實一直以黎我對日本妹興趣都唔係好大,不過既然一場黎到,目及女自然成為一大節目。觀察一個禮拜的結論,我對日本妹印象冇乜大改變,只有話日本妹唔係我鍾意果類型,但深深體會到點解個個香港女仔都要扮日本妹,因為日本妹真係一面倒地技術性擊倒香港女仔。


首先我想話,我覺得香港真係好多靚女 - 即係我唔會好似好多人8/10已經would not bang,外表順眼眉目清秀再標緻一點我眼中已經係靚,只不過好多(男)人覺得香港女仔唔靚/香港好少靚女,全因港女特質:一日到黑黑口黑面,一黑面就冇晒氣質,一冇氣質就自然好難令人覺得靚。老實真係靚到你唔捨得唔望級數,我覺得香港街頭遇到之機會率反而仲高過日本,但你話睇得上眼覺得唔錯就真係多好多,可以話日本優勢係比較平均,噉其實唔係壞事甚至好事黎,俾你揀,你都想行街果陣由頭行到尾都唔多見到有幾多個女仔覺得醜樣,好過一兩個靚加一兩個OK其他全部「嘩,屌」啦下嘩。除左樣贏仲有一樣,日本好似冇肥妹呢種生物存在,我黎左大阪差唔多一個禮拜,肥仔見得多,但稱得上肥甚至唔瘦的女人,可能只得鬼婆。單整體都瘦呢樣已經大勝港女,都仲未講身材,亦根本唔使講,港女身材本身就是個悲劇,全世界可能得香港女人一個人種,係瘦同有好身材兩樣唔可以同時於一個人身上並存。


大多數日本女仔感覺唔錯但又唔叫特別靚,地區血統真係有好大關係。日本人對眼的確比較細,所以多數女仔面相輪廓唔差,但望落硬係差少少,難怪成日戴大大對大眼con好平常,好似黎到日本第一餐拉麵舖門口招待個妹妹,望落真係有點似漫畫人物。不過就算唔突出都好識包裝補救,救到點普通都可以做到亞洲第一,即係度度人人都靠化妝架啦,但日本女仔就係勁在化妝功力超高,其實只會化好淡白底妝,淡到你唔多覺點樣有化,搽埋鰓紅已經叫做化得較恆,但望落會好順眼好受落,最重要係自然,呢樣正係港女冇得比之處。雖然港女最鍾意就係黎日本掃日本貨抄足日本風格扮日本妹,但俾同一堆硬件你都做唔到同一個效果,人地係想整到自己少少似公仔而唔係變成個公仔、想要白而唔係要蒼白,如果要用到成層粉去砌個樣出黎,就唔係自己就唔再自然,就自然冇晒氣質啦。我諗日本妹唯一可以同港女以寸量度之超厚粉裝甲一較高下者,只得真係幾難頂的涉谷系黑妹。


講著衫好似冇咩分別,可能因為香港一直跟住日本潮流,所以黎到除左人樣唔同,頸以下兩地差唔多(身材除外),係多一樣和服妹,但好遺憾我撞親的和服妹一係樣麻麻一係已經超齡唔適合用個妹字去形容。好在日本人做乜都比人認真,班女都一樣出親街實執到好正,天氣點熱都可以笠幾件野襯到絕至出門口,市區好少撞到女仔著衫會求祈,甚至咩時候咩場合都要戰鬥格,正如去到Summer Sonic,四十幾度雲都冇舊爛地一塊,班女仍然可以化晒妝拖地長裙高爭鞋噉黎睇show。所以唔同香港,行市區好易撞到好有時裝感的靚女(本身已經靚,或唔突出但包裝得靚),而且有樣野正,就係乜工種都可以搵到靚女,尤其旺區店舖同大舖大商場,十個女sales九個係後生女仲要幾省鏡,除左細舖頭同食肆,真係好少遇到年長少少的女性招呼你,雖然年長唔代表唔好樣。我仲試過一次,酒店樓下有架貨車經過,初頭冇乜為意,行過時望望司機位,著晒藍色制服開車果個係個好靚的後生女黎,仲要係可以做model果隻級數。可以係最想像唔到的地方見到意想不到的靚女,十足睇日劇一樣,呢種情景香港真係唔會有機會遇到。


再贏一條街係,好多時唔會只得個樣,做得招待的日本妹好多都好好態度,即係就算你擺明混吉,招呼你時都會做足全套唔會黑面呢樣野已經冇得頂啦,有時仲可以非常熱情。去Summer Sonic入口同攤位有好多deep V背心短裙妹妹(請參考上圖),我第一日去到一落車,立即有個妹妹上半身俯前四十五度,再伸長雙手大大力揮手加大大聲打晒招呼,雖然佢講乜春我完全唔明,但當佢可以烏到咁低身而deep V背心入面幾乎乜都冇,仲要成個人想撲埋你度攬住你咁滯,我就知道Summer Sonic一定好好睇,同埋張飛貴在咩地方。只不過有時都幾麻煩,樣係靚又後生仲好熱情,但好多時少少野都要用百幾二百個字講你知,即使多數日本妹把聲唔差冇乜老牛聲death metal聲,噉樣乜都要講一大餐我又要唔識聽,仲嘈過我聽Deafheaven就有點煩。不過目及女係用對眼,唔係用對耳嘛。


經過一星期的實地文化研究,對日本妹印象好左,但又未至於改觀好多,只係今次去左關西一個地區考察嗟,睇完Summer Sonic回顧完大阪遊已經差唔多時候到東京Loud Park,等我再去埋關東目及遍東西之後,返黎再做多個總結。雖然一個人鍾意點玩就點玩自由自在毒撚一個更開心,但自己一個去旅行有樣悲哀,就係好難搵到人幫你影相,特別想同女影時,正如上面一皇四后,好明顯個皇唔係我黎啦,口烏口烏。



2013大香里大阪遊

一:Summer Sonic篇

二:大鄉里出城篇

三:環球影城篇

四:窮飲窮食篇

五:關西美女篇




每週一相片大行動.綱要




Sir個網

lau-sir.com


Sirblog

http://hk.myblog.yahoo.com/lausirisual