每週一相片大行動

2013 Week 45




多謝Stan哥仲搵得返十年前呢期《打口》,唔係我自己都唔記得左呢回事。同一本已經R.I.P.多時的音樂雜誌《打口》有關,重點是第四期,好多年前講過所以呢度懶再講喇,自己睇history啦。嘩十年前的劉Sir,即係仲未過130磅、對波仲大過肚腩的劉Sir,嘩而家睇返張相都唔多認得自己。


呢一期《打口》我好似仲有keep到,但間房咁亂唔知仲有冇機會摷得返,好在當時有scan低,咁值得留念,因為一期入面有好多樣野值得留念:


  1. Donald Ashley專訪,而家已經冇乜人/雜誌仲會訪問佢。最近一次有人會搵佢做訪問,諷刺地,係仆街的亞視。


  2. 六翼天使訪問。果時剛剛畢業交晒功課等緊拎證書,未有工開的日子又撞正搞show,係TRHK第一場show同香港第二場外國band黎開的metal gig - 你冇經歷過,唔會知道當時搞一隊外國band黎香港,係幾咁困難要使幾多錢。當時唯一一本幫手宣傳同會訪問佢地的雜誌,就係《打口》。呀,仲有亞視,呢記唔記得劉Sir上《慧珊時尚坊》同你講metal...


  3. 第四期係第一次行雙封面,身為客席編輯同顧問的我,成功爭取到用六翼天使張相做封底。意義重大呀,證明劉Sir講野真係有人聽架,騎騎。


  4. 最後同最重要一樣,咪就係呢張靚仔相囉。是咁的,一直有幫《打口》寫野,呢一期除左六翼天使訪問講解乜野係(power) metal,仲有寫Lenny Kravitz訪問同Velvet Revolver專題。當晚酒店大堂訪問完六翼天使,佢地幫我同隊band影張合照,出版社想出作者介紹但得呢張相,就cut左合照入面個大頭出黎,點知排版位仁兄見版面有好多吉位,就將張相放到車頭相咁大,名副其實的大頭。真係而家自己睇返都有點尷尬。


故事,未完架,呢期第四期《打口》,亦是一個劉Sir黑仔得超乎想像的見證。《打口》出左剛剛好一年就執左;六翼天使黎完香港差唔多成隊換晒人,出多隻碟跟住消失埋;TRHK唔使講啦;而Velvet Revolver劉Sir寫完之後都收左皮,歌佬自己隊Stone Temple Pilot出返黎玩,但搵左Linkin Park個歌佬唱,剛剛Loud Park day 1搵佢地做壓軸(唔好問我,我都唔知點解一個metal fest會請隊grunge band,仲要擺最後...),睇兩首已經頂唔順,搵LP歌佬黎唱根本就係想自殺。一期書就睇得出,劉Sir真係生人勿近,佢遇過掂過既野,從來冇乜好下場。




每週一相片大行動.綱要




Sir個網

lau-sir.com


Sirblog

http://hk.myblog.yahoo.com/lausirisual