每週一相片大行動

2013 Week 51



http://youtu.be/s5MYjpJU414

http://programme.rthk.hk/rthk/tv/programme.php?d=
2013-12-18&p=5529&m=episode



「老母,我又上電視喇,今舖係自由野」



自由野令我第一次覺得香港政府做岩野(所以應該好快收皮)

http://lau-sir.com/music/projects/shows/freespace_fest_2013_day1.html


自由野Day 1感想:文青唔太多,靚女唔夠多,bass推太多。音響非常靚聲去到邊都聽得清,係低音幾乎一定出過其他人成日遮住其他樂器,但全日製作同班底同氣氛實在本地難求,不枉我朝早五點半起身出大角咀做part-time之後,點幾鐘收工眼訓到死都由奧運站行去九龍站再頂到最尾十一點。不過我呢挺毒撚都係唔太適合?呢種咁文青場合,入夜之前主台都得好少人,但過去文青樂園大草地,剛剛係今期流行新青年理髮店出場,觀眾人數多主台一倍以上。然 後聽佢地唱左幾句,唔知咩朝早起身去廁所屙屎,心諗做乜鳩轉頭即走,睇黎我呢世人都係做唔到文青架喇,抵我溝唔到女啦。


我相信自由野歷史上最成功係請King Ly Chee表演,根本主台成日到佢地出先至係正式開始,大場都可以玩到pit晒插晒水Riz衝埋落台企上鐵馬唱,仲要成場表演都係橫風橫雨,我企正台前鐵馬,前面大雨到眼鏡己經乜都睇唔清,後面就狂撞上黎差少少鐵馬都撞低,頂真係未試過香港睇一次band可以咁癲咁正,而當呢種場面唔使講日本單台灣同大陸都好普遍,就證明香港缺乏容納得到嘈band之大show/music fest缺乏得好緊要。


臨尾對眼鏡仲要人地插水時飛走埋,勁在跌落個pit度居然冇人踩爆冇花冇爛仲執得返,撞跌我眼鏡位朋友放心我唔會屌你,如果今日成場咁喪都撞唔跌我副眼鏡先至抵屌啦,係咪?話時話,說好的現場歌詞手語傳譯呢?相信冇因為冇人敢接job,全世界可以幫King Ly Chee做,應該只得曼德拉悼念儀式有精神病又上台扮自己係手語傳譯員果條黐線佬先夠班。


上次萬能青年旅店去HA賣飛鬼咁快搶唔到飛,今日黎就係為左佢地,免費有得睇呢隊中國數一數二勁band喎,現場亦完全唔失望兼喜出望外,雖然冇乜台風好多時你望我我望你背對觀眾表演到好似band房練歌噉,但音樂真係無敵非聽CD可比,如果Dire Straits生在九十年代玩alternative rock,或者會同佢地差唔多。


睇完個人重左幾磅,因為入夜之後根本冇停過雨仲要越落越大,成個人底衫面衫件褸都吸晒水。本來聽日打算冇野做的話出去睇埋Day 2,睇到七點MastaMic玩完之後過HA睇唐朝,今舖睇黎唔多使諗,如果仲係咁大雨仲邊敢出呀?


呢屆政府從來好事同應做之事都唔會做,自由野係屈指數得到德政之一。只希望之後、真係起左個九西中心之後仲可以一年一年搞落去,不過到時自由野應該變成好野/應做之野,繼而俾政府收皮。




每週一相片大行動.綱要




Sir個網

lau-sir.com


Sirblog

http://hk.myblog.yahoo.com/lausirisual