返香港個零月咁快又飛返嚟韓國，其實都係為兩晚，就係落機之後一晚Dark Mirror ov Tragedy十二週年演唱會，同上機之前一晚Arch Enemy世界巡迴首爾站"War Eternal Seoul"。開show之前，先講時事。

所以話次次都係有我份時衰嘢就會浮面，嚟到韓國冇耐，就有Dark Tranquillity公開踢爆一間好多人當神噉拜嘅主辦單位（「神」＝「邊個搞到大band過嚟開show邊個就係神，咩方法搞、咩心態做、搞成咩質素通通冇所謂」），請外國大band到中港台地區tour，但事後唔俾錢人，等人一場嚟到但白玩好多場。

其實呢個只係大量問題當中其中一個問題，亦係同各位拜神的朋友最唔切身關係最細一個，但好多事見聞已久，所以十幾年嚟好多香港metal大show，你都唔會見到劉Sir縱跡，雖然我從來係乜show都會睇，就連一啲曾經有你冇我勢成水火的主辦單位搞嘅show照會幫手宣傳照會去俾錢睇（當然，我係噉嗟，另一邊係點諗會點做，就係另一回事）（而家諗返，當人哋可以好hardcore地非要你死不可甚至做好多嘢務求整死你，而我仲可以去支持對方真金白銀捧人哋場，都會為自己真係冇乜態度真係唔多夠metal而慚愧），呢十幾年入面唯獨有一種show，我係從來唔會去睇，因為當你覺得根本唔值得支持，就算係點樣大規模點樣吸引自己點想睇都唔會去支持，而這亦是冇乜態度唔多夠metal的我，唯一有返少少態度的一點。

所以好多人都問，Arch Enemy香港都有得睇啦，點解飛到去韓國睇？上面就係其中一個原因。而且香港同一個主辦單位咁多年搞過咁多場大show，永恆不變評價就係聲唔掂，如果你單純有得睇就得自然唔會理或者唔會留意呢啲嘢，但我最少對呢方面有要求（題外話：上年Arch Enemy出Loud Park音響都唔太得，亦係今次到外國睇多次佢哋另一原因），留香港一樣有得睇而且絕對平得多，韓國飛錢已經$560仲未計機票酒店，但既然想睇，我寧願附出更多換取更佳享受。

再者，上星期睇完Dark Mirror ov Tragedy，今晚就到Method做Arch Enemy opening，一次捧晒兩隊同TRHK有淵源嘅韓國band嘅場，又兩隊都係非常值得睇嘅正band，好多勁band唔係靠自己飛出去而守香港待gig，可能呢世都唔會睇得到。你話香港站都有opening band喎．．．唔知opening band之前自己喺香港開show時，有幾多去睇AE嘅朋友當時有去捧佢哋場，而唔係到而家佢咃幫Arch Enemy開場，先順便支持埋佢哋呢？

不過身在香港的大家放心，Dark Tranquillity單嘢炒到咁大，份屬同鄉的Arch Enemy冇可能收唔到風，而當DT公開一切之後，拖人糧拖足成年嗰班終於肯俾錢，可能就係驚Arch Enemy臨到中國之前個禮拜至出事，所以拿拿臨擺平單嘢先。換言之，你哋可以繼續拜神喇，雖然DT單嘢忽然爆發了一股民怨，但問題解決咗即係唔存在，樂隊收唔收到錢關你鬼事咩，你只會關心有乜band嚟香港開show有得你睇嗟，神的地位依舊是神，大家一樣會照去睇睇完照問下場係幾時係邊隊，而香油錢繼續袋袋平安的主辦單位，對各位不離不棄的信眾表示衷心感謝。