第二次跟首爾道別，依然依依不捨。其實之前出差早咗返香港冇預過會再嚟，結果有第二次首爾行，都是緣份同好多陰陽交錯所賜。

我好榮幸喺2006同2009兩年，有份搞Method同Dark Mirror ov Tragedy兩隊韓國一線band嚟香港開演唱會，TRHK簽DMoT出第二隻碟時，亦有份幫手宣傳力谷，結果隻碟賣到斷市；

上年十二月到韓國做嘢，睇fest撞返八年冇見嘅Method，挑起嚟韓國睇show舖癮；

一月中一連五日嘅現代信用卡文代節，本來開始之前個禮拜先被香港急召返去，最後居然可以留多一個星期，仲要唯獨Avenged Sevenfold出show當日唔使OT準時走人，至有得睇佢哋場首爾演唱會；

而唔係去到睇A7X的話，就唔會撞得返Dark Mirror ov Tragedy鼓佬，更加唔會知差唔多五年未正式表演過嘅佢哋二月底會搞一場十二週年演唱會；

跟住睇完Avenged Sevenfold，大家去飲酒嗰陣見到Arch Enemy "War Eternal Seoul"海報，原來正正三月頭DMoT場show一個禮拜之後，仲要係Method做opening，我就知道就算要早返香港、無論二月底三月頭有幾忙，都一定要返嚟首爾一次；

到訂晒機票酒店買晒飛，至發覺個日子好有意思。冇特別計劃過，但睇完Arch Enemy第二日上機，就同如果跟足原定計劃出差留足三個月至返香港個時間表一樣，今次返嚟只係過返本應喺韓國過嘅最後一個星期，仲要走前睇到晒兩隊曾經合作過嘅樂隊。好多年前種落嘅因，今次一次過開花結果俾我過嚟收成，仲要個時間夾到咁靚，真係一切皆冥冥中有所註定。

雖然話今次除咗睇show仲想補做返好多上次個半月冇做未做嘅嘢，但飛到嚟都要繼續跟香港啲project，自費旅行都有一半日子要返工，又有兩日睇show，除咗終於走到去江南最西邊探探行家Misanthropic Art Productions了咗個心願，都唔係行多好多地方，不過多謝各位韓國同事帶我去食咁多好嘢，新村真係一個食之不厭不盡嘅好地方，一日未再去韓國，喺香港一日都唔會再食韓燒同炸雞。

本來打算留兩日滑雪，可以參加即日來回滑雪團，但我覺得點都要仆足一日街先會學得識第二日至正式開始玩，同要留喺office跟咁多嘢，想揳到兩日出嚟走到咁遠玩其實好難。而且落機已經覺得冇乜feel，隔一個月再嚟熱咗好多，話就話得幾度我著住羽絨都可以流晒汗，日頭就算唔著褸其實都冇問題。熱成噉自然唔會落雪，其實有兩日落過，但都係剛開始飄幾粒落嚟就出太陽，而天氣咁「熱」時，硬係覺得去滑雪好古怪喎。睇一年之後有冇機會啦。

噉當然希望唔使過足成年至再嚟，我都好想快啲再過韓國同可以留耐啲，呢兩個月印象係雖然冇啖好食，但我對韓國好感更甚於日本，因為今時今日嘅首爾其實就係香港本應發展而成嘅情況，唔太過西化唔太過份摩登，東西並存中保留一份傳統舊區風情，日本大城市相比都太過煩囂喇。所以喺首爾住得越耐越唔想返香港，即係你去行一行清溪川，然後望望城門河，再睇睇首爾中間條江，跟住返去維多利亞港，點解韓國做到嘅香港唔得？

想搵藉口過去又唔係冇or難嘅，睇show已經是個萬能key啦，呢啲嘢梗會一早睇定，其實返到嚟已經搵到下一個：25/4係其中一個本土年度大metal fest Hellride Fest，又係DMoT同Method有得一晚睇晒佢哋，仲有上次Still Crazy睇完好鍾意嘅Crash，另外加多三隊，不過撞正24/4 Suffocation + Truth Corroded香港站．．．係咪禮拜五晚一睇完佢哋，星期六朝早立即上機睇埋首爾場Hellride咁激？（然後禮拜日機返香港禮拜一返工，假都唔使請，一撚流）