呢兩個禮拜調咗過APM返工，坐大公司做嘢真係爽得多，好似琴日因為唔夠房用，就叫我坐全層唯一一間因為經理唔喺度所以冇人用嘅經理房，落地大玻璃加無敵海景，張凳勁舒服又好un，仲有兩部電腦俾我用可以左高登右天涯，好多人唔知頭唔知路想搵經理，敲門扮晒嘢講句「Come in」，開門就彈句「What 撚 is your problem？」嘩覺得自己不知幾撚威。

可能寸得滯，今日俾人放逐去偏遠到爆嘅某個partition坐，係灰但最灰不是此。過嚟呢邊返工除咗因為有幾個project要趕所以晚晚勁遲放工（可以坐經理房做嘢咁high是有代價的），每日lunch先至難諗，係好多嘢食呀但唔行遠啲好難有位又要貴，今日一點四至落到去食飯，立即唔使諗啦食鬼咩行得出去等到位都差唔多夠鐘返歸啦，就落樓下一田food court行個圈，真係行足成個圈先搵到個四式芝士pizza，唔算大塊但成層芝士叫質得飽你，雖然冇嘢飲但$33已經算全場最平，如果加多枝唔知乜水收多你廿皮，我寧願出返去汽水機求祈買罐。其實隔籬檔炸魚薯條幾有興趣，但最低消費好似已經過百蚊仲貴過我喺倫敦食，而且份量先得倫敦嘅炸魚薯條一半，咪玩啦。

以前鍾意觀塘呢邊，因為工廈區好多飯堂，多嘢食又平又夠街坊，但而家變晒商場商廈，冇晒嗰種感覺，仲要鬼死咁多人又乜叉都好Ｑ貴食唔起。我仲要過嚟坐兩個禮拜添。