每週一相片大行動

2015 Week 7




我屋企生活習慣比較奇特,好似拜山永遠唔會揀清明,我老豆最鍾意每年一月同八月先上山,唔好問我點解全年最凍同最熱兩個日子至去拜山。其他時節除咗新年去拜其他親戚之外,從來唔會喺大節正日去慶祝或者食飯,同人迫餐死食都食得唔自在,而且收貴好多但食咪又係嗰啲,所以永遠一係之前食一係之後食,今晚就係過年半個月之前去食團年飯。


以前都會去酒樓,後來老豆覺得咁多人食唔係平又嘈有時又要受部長氣,倒不如食自助餐,想食乜想食幾多都得陷家都開心,埋單又未必貴過去出名酒樓嗌一圍好多,我都唔記得我陷家幾多年未飲過茶 & 我屋企一年食幾多餐自助餐。


食來食去最鍾意都係屋企樓下間8度海逸,除咗夠近行返屋企一個字搞掂食到幾飽都唔怕,同成棟酒店裝修到打斜連水杯都要斜斜哋入去行到你頭暈,8度個自助餐賣點係甜品,道招牌菜芒果拿破崙正到仆街,我陷家都鍾意食甜品,正餐唔會食好多,因為要留返個肚食返幾轉甜品,最顛嗰次狂食食到入廁所嘔,嘔完出嚟繼續食過,真折墮。


假如連我對食冇乜要求又唔食貴嘢嘅人都會覺得好,呢間自助餐就一定食得過(或者完全食唔過,如果你唔似劉Sir咁cheap的話)。不過以前未有好多大陸團時成日有折嘢食又整得好,而家多咗大陸客,價錢一直加但甜品之外乜嘢食都越來越差,如果可以回到以前就更加美好。




每週一相片大行動.綱要




Sir個網

lau-sir.com


Sirblog

http://lausirisual.blogspot.hk