07年復活節係九展玩具日，多野玩多野睇仲多野買，聖誕節同地點黎多個玩具節，我的最愛死貨場喎大佬梗係唔會錯過啦。日同節真係兩個level。玩具日地方差唔多大，攤位唔多行人亦唔多，但玩具節十點開十一點去到，已經係逼巴士咁逼。玩具日食住變形金剛加超合金魂個勢，中間大片空地擺幾個櫃做展覽，今次搞手都知商機無限，展覽都唔鬼搞拎塊空地開多幾個檔口賺盡佢仲好。都係睇人地舖頭超合金算。

除左人山人海，會場當中仲勁多囡囡，裝晒身化晒妝入場果隻，一睇就知唔係黎買玩具，全部都係做野：拍片、採訪、傳媒工作。即係專業人士就係唔同ｄ，衣著外型都高質素過人。有條友買完玩具俾四條囡囡圍住做訪問（唔知四條囡係同一間公司，定四間唔同傳媒機構一齊做訪問大家慳水慳力？），劉Sir當然要自動請纓協助各位姐姐啦：
「幾位姐姐係咪想搵人做訪問呀？我好得閒喎！」
「好呀！請問你點解會黎玩具節？」
「聽講桃哈多今年黎擺個攤位，特登黎捧佢地場架！你知啦，佢地隻粟米條由細食到大！」
「．．．噉你黎到買左ｄ乜野呢？」
「頭先去左合味道個攤位食左個粟米肉粒杯麵，點知入面冇咖哩石班，你地知唔知點解？」
班女就走Ｑ晒了。

至於買，人係多左舖頭係多左，反而少左好野，今次死貨場唔夠死喎ｄ貨！又或者日對夜對變形金剛，俾佢地教識左我做人要有耐性，新玩具出極都有得出根本冇可能追晒，而且出完隔一輪話咁快又話新版改版，學晒各大labelｄ衰野。舊玩具可以reissue再reissue改少少又所謂新版再版，好似《變形金剛》套戲出玩具，一個角色可以有超過十個版本唔同變形唔同外型唔同價位實有中招的一天，再加由上畫前幾個月開始出，出到而家已經plan到2008仲可以有新野或舊貨新版，就同買CD一樣，使乜咁急丫所以睇定先囉我份人又唔急唔係一出要立即有果種，拖下拖下掃平貨同新版仲開心。

另外我黎死貨場只想搵兩樣野，一係平野，一係白痴野，睇之前就知，但今次太正常喇，好野間間舖留起唔拎出黎，無聊野又係冇一間引到我一見立即仆埋去，太pop了。搞到今次冇乜斬獲，大失所望。

變形金剛電影玩具幾萬條線，戲入面有幾幕係普通機械受斯比頓星能量感染獲得生命變成機械人，咁大個搵錢機會班老細梗係唔會放過啦。「乜都變得機械人」概念，玩具出左一個Real Gear系列，純出玩具電影入面冇出現過，賣點係像真生活電器變機械人，不過又要像真又要做玩具，諗都諗到好易死人，好多好似望遠鏡呀手提電話呀唔變好地地，一變機械人幾近不堪入目，難怪長期滯銷。但衰極都有好野，包括上圖隻變雀MP3機，同一隻Xbox手掣變猩猩，全系列中兩隻係超水準，只係唔急丫反正成條line都冇人買，等到散貨場合例如今日先搵未遲，原價近七條，而家半價唔使三十搞掂，不過隻Xbox手掣猩猩就真係整得靚間間唔肯放貨，暫時只見過玩具反斗城有賣，價位都算合理街價，不過，唔急。反正黎緊一年仲有得出，價自然長跌長有。
「變形金剛教識左我做人要有耐性。」

你都知劉Sir鍾意自護。早排執左隻蛋玩成為人生第一隻正式高達玩具，隔冇幾耐黎到，俾我見到廿蚊盒SD自護，即係平唔算好平街價都係三四十蚊隻左右，但一場黎到加平過出面十幾蚊，捧捧個場對得住自己都要啦。G Gen 0已經係PS1年代產物，隻野睇黎倉底貨多，廿蚊一隻高達模型加上外型手工皆靚，諗得過啦。
「模型喎！你識砌咩？」
冇錯劉Sir廿幾年黎只識玩玩具唔識砌模型。不過SD高達難度低，唔使上色唔使落膠水就番低B仔如我，作為人生第一隻高達模型甚至第一隻模型，我有信心會砌得掂．．．．．卦。
「隻野先廿蚊雞，真係砌唔掂的話，咪當食左餐大家食算囉！不過希望唔會淪落到噉啦，連一隻SD高達都砌唔掂的話，其心靈創傷食多廿年大家食都補唔番！」

重點之變形金剛已經被電影系列飽和達三幅被階段，貴野我唔會大興趣，平貨又冇乜驚喜，除左上面兩隻，仲有兩隻野較有興趣。一隻係鐵球筆座，鐵球從來係我愛機（冇錯越主角果ｄ我越唔鍾意但越茄哩啡越得我歡心），之前有個玩野周邊系列出渣古熱能斧keyboard掃、印個嘜頭就出的杯杯袋袋之類的抽獎系列，其中包括鐵球筆座，隻野超靚之餘枝炮係枝筆可以拎出黎夠實用又夠過癮。只係冇得散賣要俾五十蚊抽獎（年年都係噉！），全線七款禮品即係五十蚊先得七份一機會中，雖然我見過散賣係貴一半以上（係平的話，一早執左把熱能斧啦咁過癮），但我世紀黑仔王從來冇運行，要抽先有都係算Ｑ數啦。又估佢唔到而家高達都要crossover變形金剛，見到有隻渣古可以變一年戰爭出過場的自走炮，夠晒過癮喎即係變到形我就中招架喇加上渣古又勁鍾意，只係變炮後超樣衰（唔係有圖解，我都認唔到變形後架野係自護自走炮），又唔係平喎七十五蚊隻（我已經俾廿幾三十蚊的死貨寵壞晒），都係算啦。同樣，我有耐性。下次玩具節再會。

人多唔好行，講睇又冇專題野，唔同睇囡囡咩唔係咩大型活動點會有囡囡丫，全場除左記者姐姐，只得一個外賣妹妹，
「唔係卦！送飯盒送汽水都要著晒Lolita裝咁激？」
要行其實好快行得晒，因為冇乜吸引野，十一點到捱到十二點幾先走，因為幾百人塞爆個場搞到鬼死咁慢，同等十二點抽獎。根據經驗，抽獎時間送得俾你果ｄ都係「某某公司倉底貨Ｎ件」或「某某玩具舖贊助死貨一大堆」，例牌冇乜吸引野，上次玩具日最大獎已經係音波，今次好少少，送星球大戰變形金剛，兩部機械人合體做千歲鷹（司儀叫隻野萬年鷹當堂升左幾千個level），
「部野勁大部又勁墮手，不過兩隻機械人都勁樣衰，我鍾意星戰同變形金剛不過買就唔會自己買架喇，咁大隻野咁多機關都可以拎咁多隻出黎抽獎就知咩事啦！一唔覺意抽中左，咪玩下囉！」
不過，條友從來未好彩過。

冇野睇又冇野買，叫做未衰到貼地，咪係執番堆小便宜先走。

唔知邊間大贊助商咁慷慨，所有入場人士，每人一隻星戰公仔，清一色Han Solo，亦即戲中無端白事俾天行者拉埋一齊革命的船長。可能冇乜人記得，星戰大家都係記得天行者同黑武士多，但夏里遜福喎話晒，或者係佢演出過最成功的茄哩啡，佢做主角ｄ戲通常都係（半）收皮（《空軍一號》．．．）。只係一向唔鍾意買人形figure。一來玩具整面相太易撻Ｑ關節位亦樣衰到爆，雖則現今玩具技術進步像真度越來越高，隻福伯在我已經係合格級數，仍然old-school地只玩機械人，假嘛。二來人一定冇機械人（正確黎講係變形金剛）咁多野玩，郁下手手腳腳頂多加多幾件道具俾你，就冇。個福伯叫做多個機關一拉掣立即高速扭腰扮開槍囉。搞到隻野擺係度唔知點，果真雞肋。
「頂你送隻唔曉變形的變形金剛俾我好過啦！隻福伯開又係唔開又係！」

最大意外反而係呢本本地玩具雜誌。叫做月刊，不過第一期七月，第二期十月，跟住一個月一期即係出到第四期，但幾個月黎行報紙檔都未見過，黎到會場頭兩期有得免費派，即拎啦小便宜喎！本野日本漫畫大細，印刷相當落本超過四份三全彩紙，只係內容實在冇乜好睇，資料同圖片不足。主編輯得四個人，睇佢地寫專題同特集相當有料到，但始終做得資訊刊物唔夠其他鬥，賣成三十五蚊一本，人地三十蚊差唔多厚但一版已經等於佢四版大，講同一件產品相唔夠人多寫又冇其他人咁深入，單靠正稿唔夠撐喎。
「不過唔關我事，除非係變形金剛特集，唔係好難引到我買玩具雜誌，呵呵。」
最過癮係第二期中間專題訪問。平時訪問，係搵玩具界專業人士例如設計師、收藏家之類。但第二期訪問對象，係「網上最多人討論美少女售貨員」。即係好地地的訪問，囡囡自己同攝影師都要用盡方法等大家「有野睇」，笑爆。我以為睇緊壹本便Face添。

今次玩具節，可能當初見勁多參展商加值聖誕時期搞，期望甚大，結果失望。唔緊要，下次再接再厲。照計番，應該復活節到下輪玩具日。
「到時要拎埋Toyz第三四五六七期！」