Alternators Ravage



首先,問大家一條問題:
「變形金剛的(兩個)主題是?」
特別係同劉Sir一樣老的朋友,大大話話睇左廿幾年,唔會答唔出卦?唔識?答案就係:

偽 裝 機 甲   超 乎 所 見
(自稱變形金剛粉絲而答唔出者堪旋變形成垃圾及堆填區)

變形金剛二十年黎之發展,電視只屬好淺層,特別日本接手之後特意兒童向化同商品化,到後來甚至變成典型/普通東映超級機械人,唯一同變形金剛有關只剩博狂兩派標誌,同變形果陣會大嗌「Transform!」,變得徒具其形,完全背棄兩個大主題。反而漫畫同玩具遠比我地想像中廣闊深入,我地香港單靠無線亞視接觸變形金剛其實錯過左好多野:睇劇情一定要睇漫畫,漫畫版先至係變形金剛真正「官方」劇本,就算到今日2007年仲可以有新野出,比電視版有更豐富想像力同發展空間。變形金剛電視卡通進入九十年代之後除左曉郁之外,實際上完全及唔上漫畫版 - 某程度上係俾日本做衰晒。

玩具難免一樣。細細個睇同玩變形金剛當然係開心啦,大個左開始有要求,自然會覺得玩具有所缺乏,因為點樣好玩,始終你一睇就知係舊膠、係隻玩具,欠一份像真感,冇錯某程度上會追係因為變形金剛卡通同玩具果份懷舊情懷、無可代替之原始、八十年代不死精神,但「要求」又係一回事。連玩具都可以"more than meets the eyes",要等到廿一世紀:


 


如果對變形金剛認識只有來自電視、追玩具只追熟悉之G1,上面兩個標誌睇多一百次都唔會知咩黎。Alternators - 日版叫Binaltech - 係二千年後開發之獨立系列,算係較「近代」同「新派」變形金剛玩具,賣點係向車廠買版權,令機械人變成大家見過之真正名車。緣起背景已可見證日本仔對產品開發同包裝態度從來比美國認真:Alternators出現只係用現代名車包裝G1經典角色,但一去到日本仔手上,自家之Binaltech系列同一件玩具製作已經唔同(自有分曉),再搵左位非常專業之變形金剛迷創立新一個Binaltech世界,設定年份係電視版第二季同劇場版之間,劇情解釋兩派激戰之後博派同人類汽車開發廠商合作,為重傷成員重新製作軀殼,令部份角色變成「真車」,因為博派同人類聯盟關係,Binaltech科技只有博派獨享,後來狂派用計盜用而出現屬於敵對派之Alternators,令博派研發出一個中樞可以控制幾部車身之科技應對。全盤計劃起初純粹投機性質地開多一條玩具線,經故事包裝一下令所有商業元素變得合理,亦解釋左點解Transformers會變成Alternators、點解幾個角色用同一個車殼、點解同一個款可以有幾隻色...而且個劇情唔係求祈作而非常嚴謹同緊湊,雖然只係一個fans業餘寫出黎,編劇之功力同劇情張力完全唔輸正傳,強到就算獨立出一套小說、漫畫甚至動畫完全綽綽有餘,足夠說服變形金剛迷,就算明知係俾人呃都心甘情願。即使同一套卡通、同一個角色,日本版玩具從來受歡迎過美國版玩具,非無因。



話需如此,興趣其實唔係好大,一來唔係車迷而Alternators系列只出車,選擇上都會揀其他先啦,二來可以預期到結構所限,變形之後機械人外觀會「太車」,成個車頭蓋甚至車頭擺係心口成為常見問題,查實好樣衰。一直以黎冇乜特別留意或者想買,直到見到今次主角:


「黑豹。」

冇睇錯,係黑豹Ravage。你會問:
「關餅錄音帶咩事?」
出乎好多人意料,G1入面唔算咩大角色甚至唔係正規角色之黑約居然會被「Alternator化」,好難想像到錄音帶、豹同車三者點樣融合得到喎已經夠晒綽頭,再加上狂派Alternators唔多,而且博派本身已經係變車,Alternators只係將舊角色美化(or醜化)其實冇乜癮,狂派由變戰機(黑豹就係變豹同錄音帶)變成完全兩樣野,噉先更有意思。同埋,有最殺食一著...被迫中招!點殺食法?


出夠兩個版本俾你揀,總有一款合你心水!我最後之選擇係落重本執晒兩隻,冇辦法本身已經好鍾意個角色,仲有其他好多因素,兩隻一齊黎啦冇得走架喇!


呢隻係Binaltech版Ravage,亦即係日本版,盒面自然係寫日文啦。盒面右下角張相,呵呵相信好多人見到頭頂會立即彈幾個問號甚至感嘆號出黎,
「點解隻豹會變左做機械人架?」
係呀冇睇錯呀第一代Alternators Ravage唔係變豹呀係變機械人呀!如果係old-school hardcore fan,齋個盒已經足夠引起撕碎再掟爛之動機。


Binaltech包裝較為舊式,左右兩邊再開窿,可以睇到車頭車尾,好有以前玩具之感覺夠晒復刻。第一代係變做一架Corvette。即係咩車咩型號?有待各位車迷同專家解答。
「我玩變形金剛遮!」


後面就多野睇喇,包括一大堆唔知講乜的日文(...),不妨留意一下,日本變形金剛狂派叫Destron,而唔係Decepticon。仲有附圖解說各部份資料充裕,唔係因為Ravage個名同豹頭人身,變形金剛迷睇完已經心郁郁。(講緊我遮)


盒底仲有。
「咦?一模一樣喎!」
劇情話狂派係偷博派Binaltech科技自用嘛,Ravage之假設係用左Tracks(有冇人知中文名?)個身。話係用同一個身/模,但要揀肯定揀Ravage,變左開蓬車之餘色都靚過人啦,裝個豹頭又特別過大路的博派,冇辦法,邪派型過正派是永恆不變的定律。



或者係豹頭人身爭議性太大,惹來唔少hardcore old-school迷不滿,懾於群眾壓力(加商業考量)下,07年頭出左隻新版Ravage,今次終於係變做隻豹喇!合乎各位老fans的要求!(但一樣會比人鬧「隻豹點會變做架車」之類哈哈哈)亦係見到新版Ravage,令我會對Alternators提起興趣,繼而由兩隻Ravage開始!


個盒係咪同Corvette版Ravage版、Binaltech包裝好唔同?睇睇底邊,美版Alternators黎架!日本仔鍾意玩復刻,美國就走新潮路線,卡紙底盤加個前拱吸塑,好有設計感,我鍾意呢個展示性質同現代感重之包裝多過Binaltech。似乎我唔屬於old-school hardcore fans。


前面大大個積架 logo,後面更大隻字寫到明
1:24
慌死你唔知係真積架車縮小版!大佬!版權費唔係平架你估問積架買個牌出架野平呀!


比起Binaltech,Alternators個盒設計係靚,但唯一有介紹到件玩具就只有盒底兩三幅圖。都講過,呢個名車版變形金剛系列本來係冇任何故事背景支持,要到日本接手發展先開始寫,所以美版乜資料都冇,寫多隻字俾你都唔肯 - 根本冇野好寫,又或者預左你買硬噉款寫都廢鬼事寫。結果得變形前後兩個樣你睇,搞到好似普通雜嘜變形機械人玩具,差噉份誠意,亦浪費變形金剛世界大量資源。




齋睇個盒都估到Alternators/Binaltech系列係走「高檔」路線,從來冇諗過變形金剛都會/都可以咁高檔。高檔野之99%存在意義係擺俾人睇,所以包裝設計特別做到唔開盒已經相當可觀,不過唔係炒家只係玩家的話,買左隻變形金剛唔開黎玩下變下,有咩意思?


跟住時序,首先開隻舊版。復古就係復古,大家認唔認得呢個舊世代變形金剛玩具必有之印花?雖然到而家我都唔知道儲(夠)印花可以做乜、會發生咩事,可能到尾都係得啖笑,但對好細個已經玩開變形金剛的朋友黎講,個印花好有特殊意義架!


開左個盒已經服晒日本仔,完全發揮包裝之可能性同可用性,底盤照顧周到地可以做埋地台,說明書除左用紙印刷皆精美,仲詳盡講解Ravage於Alternators宇宙之故事,同佢汽車形態Chevrolet Corvette歷史同數據,灰在全部係日文唔識睇,唔係可以學到唔少野。


一如舊世代變形金剛玩具(尤其日版),隨玩具送多一張精美彩卡,日本人玩玩具真係幸福!未開始玩,單係開配件同睇說明書,已經俾到你一份滿足感!


講過我唔係車迷亦唔識車,唔識睇日文說明書又懶上網搵料,Chevrolet Corvette咩來頭馬力幾勁性能如何有乜特色完全答你唔到,噉點解會買?原因好簡單啦變形金剛黎嘛,加上真實感同製作質素實在太高,鍾意在變車時接近完全睇唔出係機械人,連玩具都真正達到"more than meets the eyes"境界,打動到我非車迷單純玩具迷都肯科水支持。


美國Alternators同日本Binaltech雖然賣緊相同產品,但兩條線路向完全唔同,日本人之認真令Binaltech更高檔次,車殼係合金再噴油,好明顯想擠身擺設汽車模型之列。只係有個致命傷:全個車頭俾一條線一分為二...雖然黑色車身隱藏到唔太明顯,始終望真都會發現,尤其車牌位置條線相當顯眼,無可避免下成為污點之一,令佢「唔夠高檔」。


連車呔都落本用橡膠做,仲係同軸轉向可以擰少少左右,行果陣轉到彎唔係得條直線。轉彎角度唔係好大都冇所謂啦,家陣你幾多歲,仲有幾可會擺咁大部車落地碌黎碌去?而且買Alternators都係志在佢變機械人遮!


睇睇車牌:RVG,就係Ravage縮寫,會特登買日版,除左因為料靚,仲為左佢個名。因為不知名原因,同一個人名或者術語甚至節目名,日本同美國往往要獨立分開而唔可以兩個國家通用同一個名,就好似Ravage,雖然角色冇變過,Alternators版要叫Battle Ravage,加多個Battle以茲識別。但抵死在新版果隻又會冇左個Battle叫番Ravage喎!加上日版製作質素實在奇高,Corvette Ravage買日版,兩部車就可以統一叫Ravage。「要求」嘛 - 雖然用有Battle同冇Battle分開兩個唔同性質角色,似乎會更合適。外觀靚係靚,只係同樣受到「變形線」所累。


同博派Tracks一樣係Chevrolet Corvette,不過變左開蓬車,立即型得多。做得仿真車車門自然打得開,車門開合角度同擺動幅度靈活得實在超現實。倒後鏡可以上下郁,另舖左層銀油反光仿鏡面,照就照唔到架喇,總叫做有心思。


座位紅色椅撞黑車身夠靚,只不過內部紋理塑膠感太重用色亦單調,如果修飾一下同儀表板可以執得再細致會更好,但當然要花咁多人力物力就唔會係而家個價錢啦!始終變形金剛市場係玩玩具果班而唔係收藏家嘛!另一個缺憾係機械人部件好張揚地放正坐位兩邊,有礙觀瞻,車底亦有窿位可以「睇穿」個車底。


車頭蓋像真地可以打開,睇到入面機件,但入面清一色用暗黑色,又只得幾條坑紋扮機械零件,馬虎左少少,同坐位一樣細節位製作唔夠理想。開左個蓋,係咪覺得好吉?其實仲有野玩:


就係預留左個位俾你裝個引擎落去,除左配合汽車之機械概念,仲唔怕唔知放左去邊唔見左。槽位有兩個突出點可以固定引擎,放入去要摸黑已經夠難,拉出黎因為個引擎係大半陷入凹位之中,要搵位借力撬,難加煩。


最後當然要睇睇車底啦。雖然往往最冇野睇就係個底,因為預左所有機械人部件塞晒落車底,但我反而好受喎,咁機械之車底好靚幾鍾意(...)。或者我適合做車房仔。



車仔玩完,但未變得機械人住!仲有第二架Ravage呢?新版未玩,單睇個盒已非常鍾意,但係一個致命傷令我對個包裝/美國版非常非常失望。真係好失望:


個吸塑係同底盤啤埋,而唔係嵌/裝上去,亦即係要拎架車出黎只有用暴力拆開,拆左之後個盒已經唔可以再用。絕對可以提升長線炒賣潛質,但對於一般玩家例如我黎講只係唔方便,唔係個個屋企都有位可以長期擺設架車,我寧願好似日本版,玩完可以收番入個盒度方便保養同收藏。因為咁唔方便,我甚至顧慮到唔多想開由佢算數。灰。


...花左好多時間先開到,真係好難開。包裝咩都冇,估唔到開埋,一樣冇。日版有卡送,美版唔見有;日版係一本說明書,靚紙加精美彩色印刷睇寫真集噉睇,再加長篇文字教你點變同詳細解釋介紹架車同部機械人,美版都有說明書,但係得黑白一張,只得簡單構圖講點變形法,有百幾種語言夠晒國際性但冇資料性,得變形指南同一堆「小朋友玩要小心」同「請買正版翻版必究」之壟統野,Ravage同變形金剛係乜一句都冇提過,除左認得係Ravage同有變形金剛商標,雜嘜味甚重。雖然你見說明書都拎到出黎,其實部車仍然被困盒中,因為說明書係收入卡紙底盤入面開蓋就拎到,但架車...


唔係呃你,由開盒到架車真正出到黎,過程長達三四個字,單係研究點樣可以開完之後保存到個盒,都睇左我成個字幾乎放棄,因為個吸塑係啤到入盒底,即係要拎部車出黎,就要完全毀滅個盒,仲因為實淨得好交關,係要非常暴力果隻先開到...最後係用界刀慢慢割爛內吸塑盒邊駁口,先可以較為原整地開到叫做勉強可以再用。原來個地台都有設計,盒底出現大大個狂派標誌,但有咩用?當個包裝係設計到預左你/強迫你一開就只要架車其他咩都唔要果時?


Alternators同Binaltech其中一個最大分別,就係日版Binaltech車身係用合金鑄造再加一層靚油,而美版Alternators要以低價打入市場而全塑膠冇太多特別加工處理,唔望真都呃到人分別唔算太大,但玩落手感已經唔同。另外車呔仍然係橡膠車呔,但係前輪固定左冇得轉彎...


另一樣差係車頭蓋開唔到得個睇字,冇得打開黎睇同裝拆其他野。講車之好玩程度,絕對及唔上Corvette版。個人黎講,更慘在...


...慘在,老實講,其實我唔係太鍾意積架,最少係唔鍾意呢款,太流線型同古典味太重。對於車,我對未來同科技感重、偏向cyber之設計喜好較大。


車尾算係一個穿崩位,後窗望入去會睇到好多機械組合。跟住就到其中一個賣飛佛。見唔見到個車牌?
"RAVAGE"!!!


側邊睇,穿崩情況更為明顯,不論車底同車廂,當然唔係好刻意去睇都唔係太易發覺,我又冇咩所謂。


前座相比Corvette紅撞黑冇乜特別亦唔多細致,黑白兩色夾埋好單調。...死,好似對隻積架Ravage印象持續負面?重點都係變機械人遮,都未變,俾多個機會佢啦...


冇後座,因為塞爆晒機件,都好過舊版一開門座位兩邊已經擺晒出黎咁揚。我又唔會介意,要做到真係完全見唔到機件又確係冇可能,似乎積架版收得好過Corvette,絕對受新版多。


可能兩者冇大分別,但比較Corvette同積架車底,硬係覺得積架部件用料係冇另一版咁靚,又或者最後上色處理冇咁高質素,塑膠感覺太重。不過如果係由車頂同車廂角度睇,積架反而做得較好,因為Corvette個車廂係穿晒窿由上望向下完全唔好睇,而積架車廂接近完全密封其他機件又收得較密,雖然積架唔係我所好整體結構亦唔多合我意,呢方面反而更加接近我所求喎。



唔需要多講,對兩架車之觀感已經講晒,Corvette整體印象肯定比積架正面,加上日版貨本身已經比美版玩具高級之優勢,積架實在係冇得比,但係放屋企當擺設已經非常足夠,始終我唔係收藏家嘛唔需要太過完美。況且,會買都唔係因為為擺,而係為變遮,係咪?架車點唔重要,隻機械人係點先至係重點!



同樣地,由舊玩到新啦。未開始玩,齋睇架車都知道會係接觸過最難玩變形金剛,正式落場變形之前,成份說明書由頭到尾睇再調轉睇番去頭幾次先敢開始變,差在未查埋日文字典睇變形解說,驚呀大佬硬係覺得咁精細會好化學。由車變做機械人,都玩左我半個鐘。

首先,打開車頭蓋拎個引擎出黎。個引擎並唔係附屬裝飾咁簡單,真係有用架,陣間就知架喇。


全個變形過程將近二十個步驟,第一個step已經夠嚇到我肴肴地底:開門開車頭蓋再中間分開一半,望落都覺得牙煙,或者因為造型取自真車,就算本身擺到明係可以噉樣拆骨變形,心理上始終擔心會整甩整斷,所以舊時玩具都有好處,就係擺到明係玩具係假,你玩果陣就更加肆無忌憚地扭拉擰屈玩爛罷就。車頭分體,跟住先係戲肉:


唔好睇少,由頭先到而家,足足變左我四個字。對腳係Z形疊埋,睇說明書剩係一個箭咀話拉出黎以為好易,但自己落手變連點入手點移法都唔知。全架車又多郁動部件冇乜位就到力,好鬼驚會整爛唔止對腳仲有其他位,最後係從不可思議的角度拉對腳出黎,總之變完之後實會狂鬧本說明書昆你。變過一次明白道理自然易變啦,但第一次真係要摸索好耐。


打開個口...唔係係打開車頭,見到對腳,車頭燈後面收埋就係腳掌,拉開之後扭番正就企得喇。


然後對門一百八十度扭落黎,因為係用球型關節可以扭得好勁。而家個樣似足特攝片惡魔黨班機械獸爪牙。通常基地入面參謀呀情報科呀果班就係如此尊容。


拉落後車蓋,再拉出坐位兩邊飛彈,係呀原來正正坐位兩邊果兩條野係飛彈黎。如果現實入面真係噉樣兩粒飛彈放正你個位側邊,你都咪話唔驚。


飛彈個關節位出乎意料地靈活同可動,好易就扭到上背後,然後車尾箱同車頭一樣中間分體。全個過程一次要跟次序做,如果調亂左反而會頂住開唔到。而家個樣更加似特攝片機械獸。


車尾分開就係膊頭,個頭旋轉一百八十度再將胸甲拉落黎,仲差好少就搞掂個變形。特別鍾意胸甲部份,冇預過原來成塊裝甲噉樣由上而下屈落中間再倒轉套番出黎,變完心口有大大個狂派標誌,我鍾意!


對手收埋膊頭入面,變法係先水平拉出膊頭,屈對手出黎之後再將膊頭拍返原位,少少野都幾麻煩。都比唔上對手,由一舊野變成一條野,連點樣伸直伸直左點樣轉番正方向,第一次玩都要研究一陣。少少野都幾複雜下,係隻野真係好麻煩,抱住普通玩玩具心態黎玩真係會死得人,冇辦法「靚野」黎嘛。


「點解隻豹會變左個機械人?」
絕對令各位「老一輩」變形金剛迷不滿。我又點?我完全冇問題喎!仲要超受呢隻獸人喎!劉Sir份人係寧捨另類!至於點解好地地一餅錄音帶、一隻豹,會搞成噉?Binaltech劇情話,冇錯係Ravage冇錯,只不過係Beast War(我打死都唔會叫中文名!)個Ravage,要明白原因需要知道G1以至「G0」變形金剛之來龍去脈:第一輯一開始講博派同狂派由斯比頓星打到上太空,之後太空船撞落幾百萬年前之地球全部昏迷晒,一直到現代火山爆發先再起動,而Beast War劇情係再未來之博派同狂派又係打到上太空之後意外跌入時光夾縫,回到古生物年代之地球、G1太空船墜毀地球之後,而故事講BW時Ravage由錄音帶變成機械人型再落地球。Beast War最後當然係博派打倒狂派啦,未來Ravage中樞核心被埋藏地底之下,一直到Binaltech世代被發掘,人類以Chevrolet Corvette作機體、G1黑豹Ravage作靈魂,再裝入未來Ravage之中樞思想,跨越古今之新生代Ravage復活,所以變獸人反而正常過變豹,因為按照劇情佢應該係Beast War隻獸人版Ravage,而唔係G1果隻豹 - G1 Ravage變成錄音帶裝入車廂hi-fi,成為令死物車身進化成變形金剛之靈魂。復活之後發現Beast War狂派之計劃、回到過去博狂兩派仍然昏迷地球某處之時屠殺未甦醒之柯柏文改變歷史並未成功,繼續於現代時空之間影響局勢發展,襯足佢忍者間諜身份之餘,亦由「音波其中一條靚」變成影響全個斯比頓鬥爭史之重要角色。Binaltech個劇情實在係睇過最佳變形金剛故事。跟住發展係點?睇落去就知...


車變獸人好多人唔鍾意,一來「唔係豹」,二來機械人身整個豹頭好似不淪不類,我反而極度喜歡。又同Tracks比較的話,變車果陣開蓬已經贏左,變機械人一樣,全黑點都型過黃色,加上巨型狂派標記同Ravage個頭立即邪多幾倍,再令佢比其他Alternator更加獨特,兩者間要作選擇非常簡單。異相有陣時都係好處。


每一部Alternator都有一樣手提武器,而武器係汽車機件變成,先前個紅色引擎就係支槍。而家之技術當然唔會只得拳頭一個窿俾你塞支槍入去啦,都有兩個關節可以打開裝支槍入掌心,只係槍柄粗度剛剛好,戴上去幾難,但只要放得正位合得埋手指就拎得好實。


雖然係同一個模循環再用啤完又啤(Ravage已經係第三甚至第四隻Corvette),反正冇追開,一揀自然係揀最完美果架Corvette Ravage啦。見過咁多隻Alternators,Chevrolet Corvette係最重武裝一隻,正正係咁重火力更加吸引到我,噉先襯狂派嘛。廠商會選擇用Corvette,最大原因係膊頭飛彈,元祖型態標準武裝係「光子爆彈」,Corvette紅色彈頭銀白彈身正正係tribute番初代Ravage。兩粒飛彈角度高度彈性大,差唔多前後上下左右環迴所有方位都覆蓋得到(你唔會白痴到指向側邊咁戇居卦?),見過有相係可以將飛彈擺到腰位兩邊,理論上應該做得到但我仍然處於研究階段,未解決到膊頭位同手頂住之問題,放得到落去腰就真正係G1 Ravage tribute喇。


梗係要仔細睇真個頭,就係個頭令佢同其他任何一部Alternator唔同。設計上幾何感好重滿佈稜角位,因為係「CG世代」之BW Ravage唔係G1,噉先突顯到角色特點,只係現實上會唔會專登做到一個機械人頭咁三尖八角呢?刻意左少少:使唔使「彷CG」彷到噉地步呀?
「型就得啦你理得佢丫!」
條頸可以水平三百六十度轉,向上同向下角度較細,最關心之豹口開係開到,但只可以開合好細幅度,細到就算開左都唔係太覺,即使上下顎尖牙做得精細都發揮唔到。而家個口開得咁細,唔係就係驚人玩得開心得滯一唔覺意俾佢咬親卦?


可以話係Alternators系列最大缺點,就係因為顧及真實,變形之後車殼唔可以卡通式地收縮摺疊收埋某處或者表面紋路改變,搞到好似將一堆汽車散件掛上機械人身上,個人反而全不反感甚至頗為欣賞咁寫實。基本上唔係直接將個車頭放正心口(例:接近全部博派角色),我係完全唔會有問題,仲覺得夠晒科幻好型!


參照隨車附送張彩卡,我地又跟住擺個pose...其實好難。以上係我盡力嘗試之成果。最主要問題係腰位冇關節,即使對腳結構比想像中高彈性,用獨立膝頭連結上下腳即係一共三節屈到跪低都仲可以,因為腰冇得郁加背後車蓋頂住,想改變全身角度只有靠對腳,只係雙腳精密結構亦補救唔到太多,另腳掌只可以水平轉垂直郁唔到,平時企果時睇落怪怪地之餘幾難控制重心;雙手可以做到接近全部正常手部動作,手指未至於每隻手指有獨立關節咁強,只得食指一個同之後三隻手指一組一個,純為可以拎到支槍而唔係擺pose。冇辦法,車型所限,機械人型態好難做得咁完美,要郁得多就只可以變番以前硬膠玩具樣。


Corvette Ravage靚真係夠晒靚,加上日版用料高級,完全能夠滿足得到我對Alternators之期望,但講滿分又當然未到,直如頭先所講/玩,機動性未夠,好多動作同姿勢都做唔到,算係一個「半figure」,但我只係一個玩具迷,鍾意玩多過擺,假使可以再更靈活自然更好啦,好在個高難度變形有足夠挑戰性。Corvette玩得未夠盡情,所以對齋睇都知多好多野玩、睇過張相已經知道走唔甩之Jaguar非常期待。大佬,都係因為佢我先會中招開始玩Alternators咋!


變形全十五步,說明書話。首先車底伸出對腳再轉兩粒飛彈出黎,但研究左好耐,我發現實在超難,最後唔跟說明書用我自己方法:唔由對腳變起,而變飛彈先。開車門出飛彈,睇落係咪好有萬變奇兵feel?(唔知萬變奇兵咩黎,你就真係後生囉)


然後先出對腳,似唔似隻豹呀?
「似隻狗咋喎...」
噉樣調轉腳同飛彈次序,我覺得易變好多。我資質差卦。


車尾兩邊向後轉再屈屈對腳,就由隻狗變成水底潛行型態。原來Jaguar齋變形都好多野玩喎!


下一步係反起車尾蓋,再由車廂屈條尾出黎,睇說明書好易,屈一屈遮!點知落手超難,車廂高度有限,車尾廂又有幾重駁位但說明書完全冇講清楚,點樣頂起個車蓋再拉條尾出黎然後展開,又係一個課題。


跟住去到車底,座位噉樣中間拉埋再摺起意念實在好,配合到豹之纖瘦身型。但說明書冇講到,座位部份同車頭係有一個位連埋,要稍稍推開車頭鬆開座位先可以移位,搞到又浪費左時間同心機。


車門旋轉向前遮住車呔,車頭兩側再向外拉,就可以向上拉開車蓋。咁多重功夫,說明書只得簡單箭咀指指下寫多隻字講解都冇,其實由第一步開始,全架車好多部份同相連部位係互相扣住,肉眼睇到就話搞得掂,如果係內部扣住,說明書唔講唔寫,點玩?唯有自己慢慢摸,有時候真係差少少暴力相向。就好似呢個開車頭程序,說明書都係冇叉用最後又係我自己黎,原來全個車頭係左中右大家環環相扣,要好巧妙先分得開變成而家個樣。嘩,咁難玩架?


Ravage.陸戰要塞型態
(我已經當左佢係萬變奇兵噉玩)


擰轉車頭蓋再伸出雙手,差唔多搞掂晒。對手經過重重折疊同旋轉之後收入車頭底,變形成功彈左出黎,先知道原來對前臂會咁長。


最後扭返正手手腳腳同飛彈做埋微調,搞掂!真係不得不佩服設計師,冇其他參照,單係自己憑空設計可以做到咁精細真實,創作力係Alternators吸引力同賣點,當中之表表者你一直睇緊!


舊版有九十分的話,新版我一定最少俾九十五分,架架都係車變人係佢車變豹突破性已贏晒,最重要係貼題:由積架去積架,就連品牌都係度身訂造,全個系列真係唯佢獨尊!


冇錯問我係完全冇意義,你問我幾多次,我仍然係覺得好接近完美,肯定靚過獸人版本啦,雖然我未至於超hardcore old-school果班非要係隻豹不可,只係心靈上、外觀上,變豹點都如意同開心過變獸人啦。除左顏色之外(超型之紫撞黑),相信後腳邊兩粒飛彈係G1 fans最滿意一樣,就同最初代錄音帶Ravage一樣,只不過拎錄音帶同車黎比較冇意思啦,兩者隔左差唔多廿年,加上錄音帶本身玩具已經局限好大,又點及得上自由發揮點整都得之Jaguar Ravage呢。


講車件外掛之嚴重程度,積架只係綠色水平,一來遮掩得好好似前輪用車門擋住,加上色調同體型唔特意去睇唔會太突出。所以我先會俾咁高分。但唔可以再高,因為有個扣分位...


車尾係最樣衰果part,係唔多機會特登轉過黎睇,只係唔覺意望到都幾礙眼,太累贅喇。不如我地從呢個角度睇睇其他野啦。條尾中間接位一個關節,又係因為車廂結構關係可供擺動之空間同角度唔大,但好過冇啦,反而粒飛彈黐線,一粒飛彈仔俾足三段你再一個球形關節,真係你想點轉點擺指向邊大把走盞位。不過化學。睇睇右邊果粒,我果隻一開盒粒野已經爛左甩出黎,灰!


睇完灰野又睇返下這個世界多麼美好,全隻豹最可圈可點就係個頭,睇同玩都有排講。冇Corvette咁刻意地「CG化」比較自然,必需要之狂派標誌位於右頸,另外頭有對稱紫色花紋一路由側邊延伸至頭頂,加埋眼神靚得黎好有邪氣。如果對眼換成半透明膠料加重反光效果就更加錦上添花。


最成功係頭之三點:頸、頭顱同下顎,接近所有部份都可以容忍你作生物學上合理之大幅度扭動(好複雜),單係個頭像真度已經極高,要用黎玩同擺姿勢完全足夠應付。


點好玩,都唔夠個口好玩。Corvette衰係衰在精細度極高,但「安全理由」個口開合接近零完全浪費,而家係隻豹黎喎,個口開得細?點得呀!有幾大開幾大唔該!


「夠大未?」「...大到有突喎...」
即係我都知Corvette個豹口係缺憾黎,新版都唔使矯枉過正成噉卦?簡直係漫畫式超現實!


美版之「簡約」,令到全套只得玩具一隻加多張說明書冇其他野跟,冇日版玩具送之彩卡,唯有跟盒底張相擺pose...直頭可以100%重演啦,唯一唔同只係我唔可以做到佢噉前半身飛撲狀凌空遮!


另一邊或者可以睇到關節位一二。後腳三段關節算幾多,問題係前腳長過後腳(好似不太合常理,新品種長臂豹?),加上重心,擺姿勢果時出現預期以外之限制。擺pose可以分兩種擺法:


一種係地上型,做返四腳爬爬動物應做之事:咪就係四腳爬爬囉。你想佢點樣俯伏潛行法都可以,前腳任你點舞一一做到,反而後腳冇你所想咁靈活有點兒硬,睇幅相會大概明白。


另一種係空中型。要做到隻玩具曉跳曉飛就當然冇可能啦你估細個睇電視廣告咩,想隻野企定定做個樣就OK。又估唔到隻野真係企得起身喎,就連手腳運動都fit埋。只係企直之後個樣好鬼死詼諧。


「Ravage,請請!」


我見人地可以玩到好勁,上半身向前傾差唔多四十五度都仲企到,照道理後腳同全身個重心冇可能會支持得住實會跌喎?係特技效果?CG?定還是吊威也?我只知我果隻唔得,最盡只可以噉樣直企。


因為要顧及機械人變形,好多汽車玩法好似同軸前輪同車頭蓋都冇,但係你會唔會介意?當見完個咁perfect之豹樣?(除左從後面睇之外)個人黎講未足夠達到更完美,除左粒飛彈唔開心地甩左出黎,仲因為係美版唔係日版。都講過,兩者製作質素上差距實在大,Binaltech有靚包裝、精美內容、合金車殼,Alternators除左個盒靚,部車只用膠料,價錢唔係相差太遠的話,有得揀的話,點會唔揀日版Binaltech丫!
「噉點解買美版?」
因為...「有得揀的話」。Binaltech系列早前已經宣佈停止開發,只餘Alternators繼續,亦即係Jaguar Ravage出之前已經冇左「日版」呢回事。大佬,隻豹靚到爆,如果真係有日本合金版,我點會唔捨得使多少少錢丫!



Ravage係Alternators史上最與眾不同之一隻 - 應該話兩隻至係,好可惜制度令佢冇得發展落去。
「劇情係點呀?點樣車變獸人之後再變做隻豹?變豹之後故事又點?」
咪講左囉,Binaltech停產嘛!Binaltech/Alternators劇情係日本人寫而美版冇任何劇情,日本線終止,亦即係故事爛尾,因為Binaltech故事係每出一個新角色/一隻新玩具就寫新一章,本身冇諗定方向同結局(冇錯咁宏大的故事係條友即興地一筆一筆寫出黎,原來作者好懶),全個系列突然休止,劇情自然即時無疾而終。只好當Jaguar係旨在平息fans對獸人Ravage之不安怒火,為滿足番各位老細而名正言順地推出之產物。以此為目的的話,絕對足夠應付各位老細的要求。



「唔出日版喇喎!噉個故事點呀?」
係囉!難得有個咁精彩之背景故事支持,而家斷尾,好浪費喎!唯有我自己作埋個故事落去啦!就由頭先繼續:


Ravage於時空之間不斷破壞博派計劃同組織,最後終於達到目的:滅絕博派改變歷史,令狂派統治世界,Ravage亦成為狂派大佬!但反效果出現:不斷跨越同影響唔同時空,最終出現時空錯亂,另一隻來自某個平行宇宙之Alternators Ravage進入同一空間。只係主角只得一個、狂派大佬亦只可以有一個,一《變形金剛》不能藏二豹,點算?



「開拖囉咩呀!打過最實際!」



「叫得Ravage梗係變豹啦!點會係變你隻豹頭人?」



「死開!」



「我由G1捱到BW再到而家Alternators,我先係主角!」



「食番你自己粒光子爆彈啦!」
「唔好呀!會同歸於盡架!」

撞擊之時,兩者唔同之空間組織將光子爆炸變異成時空風暴,再超幅擴大蔓延同銷毀左全個Alternators宇宙,時空自行整頓,回復成冇出現過Alternators之G1世界。

兩部Alternators變番做普通名車,本身裝入Corvette之"Cassettron" Ravage回復自身做番自己。
「...做主角咁鬼麻煩打生打死爭頭爭命,我都係做番音波會靚簡簡單單算數!」
世界,從此回復「太平」了...



靚真係好靚,不過鍾意睇同玩變形金剛的我,都唔係太常拎出黎玩,因為唔敢。要部車變機械人好開心,但要個人變番做部車先難到飛起,好似Corvette個車頭拉對腳出黎已經玩死,點知人變車果時仲死,對腳唔摺又唔得摺到盡又唔得,要中庸之道摺到剛剛好先塞得番入車頭入面,而Jaguar除左車頭蓋整極都唔識點樣整番去原位扣住車廂,最死都係條尾,唔屈得好多而要全條隊番入後座,太曲會頂住車頂落唔到,太直又會頂住車廂中間,要剛剛好屈同直中間先可以放到入去。除左少少零件之外變形次序唔可以亂,一亂一係變唔到一係影響下幾步,仲要做好多微調,要d榫位對得正、駁位駁得好,難度確係唔低架,好似Corvette變番做車之後,前輪要兩邊中軸相互抵住先可以做到一齊轉向,頂唔正的話唔好話轉彎連轉都轉唔到,玩足大半日班埋救兵先變得番。再加上變形時又要搵位借力就力,拎下壓下差唔多所有甩得之部件都甩晒,雖然好多部份係遷就番我呢類膚淺玩家,本身設計係拆得甩裝得番,不過心知都好,眼見佢俾我玩到甩皮甩骨,都咪話唔肴底。美版玩具永遠話「五歲以上適合」(但又會有標籤話三歲以下不適合,噉四歲果班小朋友點算?),喂,五歲喎???我廿五歲都玩到隻X噉,一個五歲細路會玩成點?(「噉係你玩得廢遮!」)都係日本仔合理,同人講「十五才以上」,噉先至係嘛!

起初我以為Binaltech/Alternators會係一個非常成功之變形金剛玩具系列,落本買埋靚車重新包裝「最hardcore」的G1角色,理論上冇可能會失敗喎,但睇番本地市場反應,香港好似完全紅唔起,想搵間有得買都唔係易,就算有得買價錢都非同小可,玩具展見過日版賣到$300一隻黐線(我兩隻包晒都只係同一個價錢呵呵呵呵),浮動得咁勁,因為市場細冇乜基準。況且Alternators會似景品多過似玩具,唔係變完就算玩玩下咁簡單,仲要做好多微調,慢慢郁下轉轉睇睇唔同角度得唔得執到完美過完美,唔係以玩為主導,又冇電視/劇情支持,結果係唔多受本地玩家歡迎。有乜計丫,當今世代機械人動畫都唔多套,變形金剛直頭係過時添啦買都未必有咁多人買,更何況係「唔識」又價錢又偏高之Alternators?


Alternators係最接近真實之變形金剛玩具,亦最接近電影概念同演譯,尤其是隻積架,亦因為咁真實,變完形就係應該噉樣東一舊西一塊掛晒上身,而唔會完美地變完機械人之後大部份變形前之痕跡都會神奇地唔見晒消失晒,最佳例子當然係柯柏文個貨櫃。唔係架架都受,某幾個車款實至覺得唔多掂,但Alternators/Binaltech整體尚算接受,所以我知道電影版冇得唔睇我一定會極度鍾意(電影版玩具設計見晒光,睇過之後我真係冇邊隻係反感喎有幾款仲好受!)。截至Ravage,Binaltech已經結束,Alternators亦要讓路電影暫時休止,噉都係好事黎,本身追開好多都未追晒/搜索中,電影版又出玩具,而Alternators休止前已經出左廿款都有,追舊野都未追得晒,係時候抖抖。

Ravage真係令我對Alternators上癮。而家等緊條線出Laserbeak,一架車變雀頭人身或者變做隻鷹(呵呵),更期待會有狂派版本Alternators("Deceptioners"/"Fightech"?),唔係變名車而係變真正戰鬥機。肯定大受歡迎,但相信幾難。