「佢到底係叫Rumble，定還是叫Frenzy？」
一個大問題。音波有兩隻機械人，外表同性能完全一樣，只差隻色：
電視版藍色叫Frenzy、紅色叫Rumble；玩具調轉係紅Frenzy藍Rumble，邊個係正解仲未有正式定案，
換言之你話邊個係邊個都可以，我自己解就當佢係「電視版Rumble」啦。
唔再係錄音帶喇，做得Alternators，佢係變本田Civic Si。
對車冇乜認識的我講唔到你聽即係咩料，只有話，
「個款好似普通得滯喎。全系列中最冇特色。」
盒尾有兩個廿四。第一個係講你知比例係1:24。
第二個廿四，係編號。Alternators已經出到第廿四隻喇 － 雖然實際上唔止咁少。
論車，確係冇乜好提，好在機械人外型係另一個極端，可以話全系列中最型之一。
全套野就係一部車一張說明書咁簡單。美國佬係噉架啦。鬼叫唔係日本仔出咩。
車身用紅色忠於「原著」，係款普通過普通，汽車界路人甲經過都唔多覺唔會望果隻。
另外買左三隻Alternators，美版好日版好，製作點靚實會衰一樣野：QC。
冇一隻「新買」返黎，唔係車窗同車身滿佈花痕。對於此高檔線，此乃嚴重缺點。
最突出都可以話係個「司機」：個頭霸晒成個後座一睇就睇到，有點兒搞笑。
車頭中間斬開，係條罅闊左少少，同埋個標誌擺斜左 － 算好架喇，其他好多標誌同車牌係一分為二架。
車尾破綻較多，算啦重點都係個車牌嗟。
「原來Rumble係夏威夷人！」
車底非常貼地，通常機件走光最嚴重之車底都遮得好，唔多明顯。
車形普通，或者為配合Rumble本身唔起眼小嘍囉角色卦，真係為此就完全達到目標。
點知車底反而好靚，用料加左唔少分。
講「互動」，左右車門、車頭箱同車尾箱四開，算多野玩。
始終變形金剛都係為變形，我對車廂從來冇乜要求，但比預期中精細，
當然我用攝影技術避開晒穿崩位，包括後座超大個人頭，同埋前座冇地板，
另外，又係QC問題，入面好大塵囉．．．
車頭箱放個引擎，雖然冇野食住都唔會跌出黎，但同樣因為冇固定而成日移黎移去。
個夏老威車牌睇極都咁正。車尾有舊不知名物體放係入面。
這是正確的形容，舊野就係就噉放係入面，勾一勾住側邊叫固定。兩件「行李」存放求祈左少少。
可能咁求祈係就番變形啦，因為要變機械人，第一步就係拆件。
噉樣放上去就算，都算係一種方便。
然後摺低車廂對凳，講開又講，兩張凳都係車型重點之一，係賽車凳勁靚勁大張！
張凳仲靚過架車都幾諷刺，其他款相反車靚但座位一舊長方黑色膠就算敗絮其中。
Alternators總衰一樣野（只關美版事，一早完結之日版Binaltech冇份），就係變形說明唔清唔楚，
說明書只得圖冇字，有時好難整都只一個箭咀含糊就算，當中之機關精妙完全略過，玩死人。
好似一開始，好簡單將車底門邊兩條軌開出黎拍埋車門，點拉條軌出黎？
玩Corvette遇過相同處境，當時係要向上推，試試，唔係；向內推？又唔見有駁位．．．
最後先知係向前推，說明書完全冇講得「變形前」＆「變形後」相各一，中間過程？夠晒挑戰性。
全變形最重點：對腳。伸出黎過程好順，推到咁上下車頭會自動分件，
唔同部位會因應所處位置同相互推動而改變，最後變成對腳！
單呢個部份我已經對佢充滿好感，玩變形金剛就係為呢種"more than meets the eyes"之科技感！
然後一連幾步，將腳掌對摺出黎，車門拉落黎，又閂番埋車尾蓋。
「點解成日開完又閂重覆咁多次？」「Alternators特色也！」
因為車型限制加上高檔設計，機件要比普通玩具複雜，好多位都要開開合合同按既定次序進行，
假使唔跟規矩做或者調亂次序，係有機會跌落瓶頸而要倒後幾步。
腳掌轉一百八十度就可以企起身，車門屈落腰下係留位俾對手。
對手拼埋成為車尾，嵌得幾實但變形冇想像中咁困難或者多麻煩事故，
而聰明的朋友已經睇到當中精髓了：新舊Rumble之共通。
再將頭同雙腳擰番正前後，心口同腰位裝甲屈下，人形完成，只差最後一樣：對手。
一拉膊頭位收得好密之隱藏掣，立即彈隻手出黎！ － 唔好意思，係彈個槌出黎！
Rumble係第一隻Alternators用到彈弓機關，變車時後座封死，就係要放咁大對機關同個頭！
仲未變晒架，兩件行李呢？引擎同車尾箱兩舊不知名物體．．．
其實係軍火黎，將炮管屈出，跟住夾上背後兩個坑位就成。
同錄音帶時代對炮比較，身高差得遠，但武器差唔多大細咋喎．．．
真係好靚，上色同用料都係，雖然只係塑膠，表面處理明顯比以前進步，更具質感。
要彈，咪係上身好似好臃腫，望落一舊一舊。
搞到咁累贅，主要原因係對超大膊頭，因為要收納比拳頭巨型之樁槌，
膊頭之尺寸亦要相對加大，令上身感覺過高而雙腳相比下短左。
車頭箱之空間令對腳中空，後面睇大大個空洞，所以有時穩定唔到重心唔多穩陣。
睇佢心口，完全係復刻啦，變車都不忘自己錄音帶之過去。
再搭埋背後對炮，你敢話設計師冇顧及過各位fans感受？
只可惜對炮太細，頭先都睇到同舊版錄音帶兩枝炮差唔多，
但而家全身高過以前兩三倍對炮仲係咁細，裝左都唔多覺眼，
尤其是對槌咁有氣勢，反而兩枝炮迷你咁大，台型輸蝕晒。
亦放棄左以前對炮可以裝上手之方案了。可以完全收入車廂，方為設計大前提。
雖然Rumble/Frenzy招牌係對樁槌，但玩具第一代錄音帶只得手一對，
黎到而家變車之新版，「唔係原版」，先至有番對槌，但亦只得對槌。
膊頭相當靈活，只係樁槌好似十幾年前機械人玩具得硬直一碌，
同埋要得黎就係打落地下，對手擰黎擰去除左型同感覺上值番，又有咩謂？
亦有另一個問題：
因為對槌係用彈弓收縮，彈左出黎完全冇固定，自然會向下墜或者擺向側邊，
正常情況係向下所以唔覺，但當諗住試其他pose，就睇得出問題所在，對槌好難同對手成直線。
條腰想點轉都得，只係腰位兩位裝甲擋住對腳，
扭腰就要解起腰甲，否則轉動角度好細。
背後車蓋對活動自不然亦有所限制，但下半身可動性好大比想像中出色，
特別整番個特集，俾大家睇睇對腳之高靈活性，同Rumble設計之一個荒謬處。
「叫得地震俾得對槌我，就梗係要用黎打地下啦！
不過我彎盡晒腰，對槌仲差寸幾兩寸先掂到地！」
「好在我對腳關節位多移動空間大，點郁都得！
要我跪低？冇問題！」
「．．．搞錯！跪埋落地，都仲差半寸！」
「跪都唔得？我一字馬！一字馬都打唔到？」
「唯有出絕招！等我飛身撻埋落地！」
「訓晒身終於打到！麥加登我得左喇！」
．．．冇錯。雖然首次跟番原著有樁槌，但用正常方法，係打唔到塊地的。
都唔會計較咁多啦。會買，都係鍾意佢夠靚夠型，好在可動性比我預期高好多，
係只鍾意玩唔鍾意睇的我難得願意接受，figure成份較高之玩具。
同另一隻"Cassettron" Ravage一樣，變車時普普通通，變機械人之後，無敵。同種族卦？
佢地係Alternators系列一個突破，做左好多之前廿幾隻所未做，同時作出好多前瞻性嘗試，
只可惜，或者係讓路俾變形金剛大電影、或者成本問題、或者銷路未夠好，
上面兩隻，係（短期內）最後兩隻Alternators，即使質素係全線最高。