07年復活節九展玩具日，有個攤位玩抽獎，五十蚊有得抽玩野高達主題日用品，不過好多都係杯杯碟碟毛巾袋仔之類，只有熱能斧keyboard掃同埋鐵球筆座兩隻幾吸引，但興趣還興趣，五十蚊隻野其實幾貴，同冇得買只可以抽，一唔覺意五十蚊抽左條高達頭手巾仔就灰爆。
「所以咪要抽獎先有囉，唔抽獎有得直接買，點昆到你俾五十蚊買條毛巾買隻杯咁戇居呀？」
再次見面係聖誕玩具節（此時九展已升level為Emax了），仍然不為所動。
「有得直接買先搵我啦。我成世仔都冇抽獎運。」
玩具節隔冇幾耐，過年了，跟住OK「賀歲」，連佢地都玩埋一份。不過禮物同兩個展唔同：
好似更精彩喎。雖然唔等使物體仍多，但有新野：馬沙敷眼面罩、高達組件USB hubs同木馬號空氣清新機。都動搖唔到我，我知我係世紀黑仔王。都係107衰，抽到隻鐵球，仲下戰書
「你抽到個馬沙面罩，我用隻鐵球同你交換！」
見佢玩得咁過癮，好就拎五條搏一舖。可惜，我抽唔到面罩．．．
「因為一抽就抽到鐵球！唔好意思107！」
連阿姐都恭喜我。聽佢地講有好多人抽，
「不過你係今日第一個唔係抽到毛巾！恭喜晒！」
側邊有使用說明。鐵球枝砲，其實係枝筆黎。過癮也。
盒蓋夠簡潔，簡簡單單一隻鐵球，再大大隻三隻字
脫 戰 士
「嘩乜咁似h-game名?鐵球都識除衫?」
入面仲簡單，一個吸塑裝住隻鐵球就夠，說明書盒面有慳埋。
「格納庫打開！」
個吸塑設計得好過癮，雖然只係包裝一部份，但形狀可以模擬到當正格納庫黎玩。
唔係透明膠，而係灰色卡紙再印花紋，會更加好玩。
RX-79 Ball鐵球現身。大細同膠紙座差唔多，算幾大隻，出左藍白兩個版本，
藍色係正常版／普通版，白色係「特別版」，前方仲有兩隻爪即共四隻。
忠於原著，我選左普通版，白色果隻過癮，但多左對手反而有點怪。
我鍾意茄喱啡角色，鐵球簡簡單單設計，在我好具吸引力，可惜多數出模型，而我唔識砌，
手頭只有S.O.G.版鐵球兩隻做對比。顏色近似原版，不過略淺處於白同藍中間，想調深少少。
對比外觀，難免失望。鐵球，就真係做到球樣，表面近乎冇晒紋理，
基於隻野除左用仲會兼當擺設，梗希望可以再加精細具質感，可惜。
上色及啤工亦未達要求。另一唔滿意，係全隻鐵球出模一件過，
初時諗住對手可以開合玩下，點知全身乜關節都冇，就係得一舊。
俾我郁郁對鉗都好丫大佬。搞到我好灰。
後面睇到隻右手唔知點解會傾向左。好怪。又唔郁得冇得俾我轉番正喎。
個底用雙手做重心，可以放穩檯面。右手刻住
BP 2007 China
係Banpresto一年前出品，即係我第一次見時剛剛出。
「唔係出左好耐咋喎！點解手工可以咁求祈？」
「吾皇息怒！請笑納微臣貢品！」
重點係機頂枝180mm低反動砲，拎出黎即變黑色原子筆，
「名乎其實的Ball Pen。」
唔算好好寫，勝在換得芯，唔怕冇墨隻鐵球就得個擺字 － 配到芯的話。
所以千祈唔好唔見枝筆，冇左隻鐵球會變成唔知似乜，仲衰過枝筆寫唔出。
襯番砲台，砲管／枝筆向斜上，固定方法係壓力，插入窿位同洞壁迫實，好夠力唔會跌出黎，就算用枝砲借力單手抽起成隻鐵球，點拋點轉都唔會甩。係優點，但同時將缺點表露晒：隻鐵球只得少少重量，要用筆必須雙手一手固定一手拎，換言之想高速用筆或得單手就會好唔方便。加上外觀未如理想，收$50，fans如我都覺得貴左。俾我設計，先加重鐵球重量做到紙鎮，唔需要太重，因為再將筆頭加淺螺紋榫位，唔係用壓力而係旋轉方式將筆固定落砲台，實用性同便利性立即提昇幾倍，亦只有噉先值$50高價。
「聽到未呀Banpresto＆Bandai？」
「．．．107隻白色鐵球好似靚好多喎！反正唔好用，早知唔貪得意要普通版啦！」
「唔怕啦！再抽過囉！」
我抽完隻鐵球，阿姐數飛，仲有廿一張，之前咁多人抽到毛巾，大獎木馬號又未有人抽到，繼續抽落去，好大機會再抽到好野喎！
「冇木馬號，都有得抽多隻鐵球啦後生仔！」
「算！我唔會再俾你搵笨！」