「點解係要我買左兩餅錄音帶先黎出復刻版？？？」
令到我而家好唔妥佢。相隔Ｎ年之後，音波終於再現江湖喇。
打正旗號係「復刻版」，但睇睇個封面，
「何來復刻？？？」
喂，盒面幅圖已經係現代畫風，用Photoshop執過晒啦！何來復刻？
我係諗住可以見番全身一舊舊加一岩一忽之八十年代變形金剛架！
令我呢個die hard fans失望！

睇埋盒底，算啦，唔明點解係用呢幾年動畫版個音波而唔係以前，
既然寫得「完全忠於G1世代玩具」，講到咁八十年代懷舊，
亦即係目標市場其實係廿幾三十歲睇變形金剛大果班，而唔係而家的小朋友，
包裝用呢種畫，其實有咩目的？買復刻版的老野唔多會接受呢類新世代畫工，
睇而家CG變形金剛的後生又唔會鍾意舊世代玩具？
點唔妥都好，算啦都係為左隻玩具遮，到時個盒毀屍滅跡當見唔到算囉，
左下角果個「下回預告」先係我地關心果樣野：
「有暴龍鋼鎖！仲有變形金剛版超時空要塞Jetfire！
拿107警告你唔好返貨住呀下會死人架！」

側邊都有野睇架！唔知睇左變形金剛咁多年的朋友有冇發現，
狂派個標誌其實係由音波個頭變出黎？
可想而知作者已有先見之明，知道音波會大受歡迎，
更甚於狂派大佬麥加登甚至大奸角星星叫。
望真，咦，好似有得打開喎睇落．．．

「豪呀！！！」
噉先似樣嘛！超豪包裝有魔術貼貼實，一打開仲有隻old-school立體音波彈出黎，
齋係呢個包裝盒已經夠晒吸引到人落搭買啦咁花心機！
噉先係我地老坑見開之八十年代，點解一定要畫咁多野一定要咁重Photoshop？
如此簡簡單單咪好囉咪夠晒囉使乜搞咁多野！

玩變形金剛樂趣之一：睇spec。音波速度得二，有乜緊要有成班錄音帶幫拖嘛，
可惜冇兩餅帶鐳射鳥同黑豹資料睇啦，即係想儲埋局你要另外買錄音帶！
更正就係非常詳盡之角色介紹啦，段野已經講晒音波受歡迎之原因，
雖然個個都話變形金剛最奸果個係星星叫，因為夠賤格夠反骨，死左之後又陰魂不散，
相比下音波更邪，邪在夠陰濕，單係同博派打情報戰同間諜戰而唔多正面衝突，
同派錄音帶代自己上陣多過親身落場，戰術已經夠晒閃縮，性格亦都一樣。
好似對麥加登好忠心但實情相當蠱惑，電影版入面同柯柏文打到差唔多死係音波救番佢上船，
但上到宇宙時，星星叫推麥加登出太空時，見佢大勢而去又唔出聲出手，
等到親麥加登派果班全部飄浮宇宙之中，就出黎同其他狂派爭做新大佬，
但之後麥加登化身甲威龍回歸，佢又「歸順」番佢旗下繼續「忠心」。
變形同角色設定已經咁強而有力，細路仔唔知故事講乜齋睇佢變形同錄音帶已經睇到嘩嘩聲，
大個左再睇番劇情，音波之行事作風比外表更加吸引，
直到今時今日佢仍然係最受歡迎變形金剛角色之一，完全唔難明白，
因為人越老，越會覺得呢個角色有意思，
其他好多單純「為了正義」同「我要稱霸」而戰之角色實在缺乏呢份深度，
而呢份深度亦係果個年代好多美國動畫為遷就小朋友市場而忽略之重要一環。

睇完張相，就會明白點解細個已經好恨買音波，原因實在明顯：
「抵玩。」
音波錄音機之外，仲有兩部錄音帶機械人，即係買一得三喎！
全個變形金剛世界入面，係得音波一款玩具咁著數架咋！！！
仲未計你見到果大堆配件呢？

變形金剛面世果時，先係大哥大電話出現之年代，
果個年頭walkman已經算係幾高科技產物黎架喇，而且對細路仔黎講，
一部機械人會變做自己屋企都可能有之「新科技」walkman同錄音機，
點都會比一部車同一部飛機感覺更加切身，又係一個成功之市場設定。
因為變形金剛本身之設計方針係像真，音波呢部錄音機都照足連掣都整埋，
機頂個掣真係用黎開蓋，側邊個tune掣可以擰，但擰黎冇用純粹俾你過下手癮噉遮。

睇睇背面，扮walkman扮到足架真係有埋個夾俾你扣腰或者扣書包出街架，
假使你夠薑的話。廿年前我敢，而家就肴晒底喇。
同樣地側邊個lock掣郁得但冇用，old-school變形金剛玩具唔少得之感熱貼紙當然搵得到啦。

比起其他變形金剛，音波之變形其實簡單好多，分分鐘仲簡單過錄音帶，
假如你係鍾意扭晒擰晒又要推入拉出旋晒轉先滿足，音波派肯定滿足唔到你。

你睇，基本上兩邊拉落黎，跟住背後屈出對手，再突埋個頭，
已經見到，成個變形差唔多玩晒啦！
剩番最後兩個步驟，90%機械人變形一定係留到最後之兩步：

就係彈對拳頭同個頭出黎，變完架喇！
喂錄音機仔一部咋喎你諗住可以有幾複雜？

G1即係第一代／第一輯變形金剛，因為係G1復刻，可以預期設計同機關會相當生硬，
基本上變形時對手對腳可以點屈法，變完形之後郁動角度同樣得咁多。
膊頭同個身用條鐵枝仔駁埋咋，只可垂直平面轉同全臂水平九十度屈，
前臂就只得直角上下郁，手指就算啦果個年代得拳頭架咋，
諗住好似卡通噉，音波唔夠抽時可以篤膊頭個掣飛錄音帶出黎．．．
「小朋友，廿年前玩具黎架咋，唔係真係音波呀，將就下啦。」

就噉睇，呢個復刻版身型比例好似改靚左，
以前音波部野好大同個身唔合比例地巨型，而家fit左好多！
關節唔多郁動角度亦唔大，但唔要求高，G1玩具擺pose都唔差架。
最絕係電池都有得玩，就係變成音波兩支炮，膊頭係招牌機關炮，隻手拎多支激光槍，
枝機關炮梗係靚啦，但激光槍就相當灰，話可以上彈再射，
但我試過無數次，點裝法粒彈都係射唔出，俾三粒彈我都冇用啦！
射唔出都算反正呢類機關我都唔係成日玩，
大佬你部野都要拎得穩枝槍先得架！而家對手太粗而槍柄太短，
裝都裝唔實好鬼死易跌，雖然音波係靚但好灰喎呢枝槍搞到我！

「係咪好勁呢！劉Sir都識整gif喎！」（．．．）
呢個就係傳說中之"Proof of Authenticity"！
講就講過好多次，但相信各位小朋友唔知咩黎，
當年每部變形金剛都會有一個感熱貼紙以示正貨，
平時睇只得一片黑色，但加熱之後就會出現所屬派別標誌，
持續加熱仲會不斷紅藍綠噉轉色添，用手指捽甚至吹氣都得架！
攝影技術所限，用呢個「動畫」頂住先啦！

玩音波其實都係因為送埋果堆錄音帶遮，呢班配角先至係主角。
主要之"Cassettron"有三種類：機械人、鷹同豹，
呢個復刻版就送左鐳射鳥Laserbeak同黑豹(Battle) Ravage。

鐳射鳥之前（中招）買左，點玩法有乜好玩唔使重覆，
不如比較呢個1984年日本製造版同2007年祖國復刻版好過啦。
就噉睇，覺得邊餅係新邊餅係舊？左邊果餅手工奇差，
可以見到係唔可以完整裝埋硬係突噉幾忽出黎，變形無論雀變帶定帶變雀都幾難下。
而左邊咁差之呢餅，係．．．新版黎．．．

新版用料色淡左，顏色方面完全唔係問題丫，問題係我研究左好耐，
都仲未可以變成一餅較為似樣之錄音帶，個結構差左少少喎。

兩隻鐳射鳥拍埋，邊隻新邊隻舊？
新版果隻頭頂送多個狂派標誌，但卡通入面都冇，而家噉加落去反而仲怪。
變錄音帶有事，但變左做鷹，齋睇外型色調99%一樣，問題係內在差好多。
新版果隻關節差，變錄音帶時嵌唔實，頭同頸關節又有問題拉出黎都有困難，
更甚者背脊個榫位完全對唔正，兩枝激光炮上唔實郁下會轉甚至會跌。
「好差喎隻鐳射鳥復刻得！
似乎日本仔廿年前水平仲好過而家祖國民工！」
不過，可能又係我符碌中招遮，問番其他同樣買左呢隻復刻音波之朋友，
佢地隻鐳射鳥都冇問題就好似我隻1984日本版咁完美，係得我呢隻係噉咋喎。
乜你唔知劉Sir其中一個稱號係「世紀黑仔王」咩？

音波終於入手，自然要擺番鐳射鳥企音波膊頭之招牌姿勢先啦。
都幾有難度架，音波個膊頭冇乜位又唔係平，對腳唔係易企，
而鐳射鳥其實幾大隻下，要摺後隻翼就位先擺得穩。
不過，G1貨色，可以做到噉都算係噉啦！

跟住就到全套復刻版之重點黑豹，老實講，買呢套野有一半原因係為左呢餅帶！

黑豹係暫時見過最正之錄音帶戰士，本身造型夠型之外製作同用料亦係最靚，
兩對腳真係用金屬造，花紋亦唔係貼貼紙而真係印上去仲要印得勁細致，兩粒飛彈當然唔少得！
黑豹絕對會係花最多時間玩之一隻，除左因為靚，某程度上係被迫，因為．．．

．．．因為黑豹都只係一餅錄音帶。你可以見到，佢個身，就係錄音帶咁薄。
出盒時個擺法企得到，不過你一郁親ｄ手手腳腳，再要隻野企番就有排煩，
因為兩對腳都係位於咁狹窄之平面空間之內，要搵到個重心平衡係具相當難度之任務，
所以黑豹肯定係全套野玩最長時間之一隻，信我。
「點解唔設計到佢兩對腳可以向外突出？噉咪易企好多囉！」
「將就下啦，玩具黎咋，仲要廿年前呀！」

感熱狂派標記當然唔會冇，亦唔似得地震同鐳射鳥變完形縮左去唔知邊度見唔到冇得玩，
黑豹個標誌大大隻放係度任你捽任你玩！

「三隻野都玩過晒，收工！」
要收藏好呢套音波套裝，要先變番身做錄音帶。
首先係疊埋晒手手腳腳訓低，亦即係我屋企隻狗每日維持二十個鐘頭之姿勢。

跟住摺埋兩對腳，請再次相信我，呢個步驟說明書都只有話「摺埋手腳」冇乜詳細講過，
第一次變你肯定會花唔少時間研究邊隻先邊隻後同前腳點擺後腳點放。
因為技術問題，變左做錄音帶之後，會有唔少窿位，唔似其他咁完整。

雖然有窿透光個角又好似薄左少少，黑豹已經係咁多餅帶中最靚架喇！

仲有盒送埋俾你裝好佢地添喎！何求呢！

覺得咁「大」部機械人，放錄音帶盒裝好似好怪？可以忠於原著，放入音波心口。
包裝話音波每次可以放一餅帶，G1原版都係，點解而家可以一次過放兩餅？
呢個復刻版其中一個「bonus」，就係改大左個蓋，
可以心口放一隻、盒蓋突出部份再放一隻，一部機就可以收埋晒兩餅帶，
但點解會無端端噉樣隆左胸就我都唔知道，因為包裝同說明書都係舊版睇番上面幅圖就知。
擴大左個蓋放兩餅帶係好，但噉樣突左個蓋出黎真係唔多好睇，我寧願keep番原版個設計算。

收埋兩餅錄音帶，就輪到收埋音波自己，兩枝炮變番做「電池」收入後面電池盒，
嘩夠晒像真收野都咁多野玩，抵玩啦音波！

收皮完成。
「喂！噉剩番呢堆槍彈點？」
係喎！鐳射鳥對激光炮同黑豹對飛彈，仲有音波支槍三發子彈，放得去邊？
不如整多個盒我裝晒呢堆野啦！難怪細個玩玩具最快唔見就係呢類雜碎零件。

「好似仲有樣野未玩喎！」
係喇！就係貼貼紙，知道貼定的話點貼你都會小，索性成張俾你自己貼！
不過，疑問有二。

首先，呢隻變形金剛係美版再版，張貼紙點解係日文？
其次，雖然貼紙標晒編號，但說明書都冇講邊張貼邊個位，喂，點貼呀？
睇下！就連音波自己都唔知點貼。唯有自己睇番包裝副相自己研究，都花好多時間架，
以前細個唔識野，通常玩具貼紙貼完點都覺得自己貼得好靚，雖則查實好七，
而家唔想再俾人笑or自己笑自己喇！今次真係花左好多時間同心機去貼好佢架！

「音波攻勢！」
音波最正就係自己本身都係大佬，隨身帶定一大班靚幫拖，所以玩具亦係佢最抵玩同襟玩，
其他變形金剛頂多可以合體，但多數唔會再有咩新野加，跟住一出已經係出新版，
唯獨音波可以加其他錄音帶機械人擴充，廿幾年前第一代錄音帶而家仍然合比例仲塞得落，
橫跨足二十年都仲可以同而家新出品撈埋玩，其他變形金剛就做唔到，所以音波永遠咁受歡迎。

係有唔少瑕疵架喇，但係算啦懷舊嘛老野就係多毛病架啦，而家心願圓了，不多強求。
反而好有興趣追番齊全套錄音帶，同款唔同色唔追啦，但睇睇個盒，仲有蝙蝠同恐龍未有，
呢兩隻野玩具見都未見過，錄音帶恐龍我連有呢隻野都唔知添呀！
據奸商107所講，當年係有出過一隻真正錄音機版音波，
除左可以變形做機械人，仲真係可以播錄音帶同錄音架！
呢隻可能係當年除左紅白機之外最高科技之玩具！
「有冇興趣執番隻呢？」
「算Ｑ數啦！錄音帶都未執晒！仲有鋼鎖同Jetfire呀！」