估唔到《死亡筆記》「潮完」咁耐，仲可以再返炒多野。漫畫睇完，跟住06年暑假同年底連上兩集電影，之後靠動畫版繼續（興趣不大，因為動畫版通常係未夠水準之商業作）。過多年半，仲有一集《L》。睇名都知主角係邊個啦。
「有番新意喎。」
因為死神、死神筆記同夜神月已經玩到盡，囡囡都有玩完睇夠的一天，但當中L神探角色，確係可以有無限發展空間。基於《死亡筆記》漫畫同電影都係頭半得但衰尾半，總結叫做合格，加上又係「有新意」，完全唔知《L》講乜、唔知係後傳定外傳定第三集，照入場。

賣點梗係戰勝夜神月之少年神探啦。雖然對劇本唔滿意，但係罕有我唔反感之漫畫真人化日本電影，印象分加番，
「條友演技確係一絕。」
可惜我入場唔係睇明星、「一睹風采」，單睇將L完美真實化，完全唔夠滿足我，我入黎係為左睇戲。坐低先知，叫得《L》，真係同《死亡筆記》冇乜關係。第二集最後L寫左自己個名落死亡筆記，亦即只餘二十三日命，由佢出鏡開始，頭兩個字已經同《死神筆記》斷絕關係，餘下兩個鐘係講佢二十三日間點樣破解全球病毒危機，夠晒簡單，不過唔夠吸引。《死亡筆記》吸引在加入魔幻元素，同有兩大天才鬥法（雖然你睇完漫畫版同電影版再諗番轉頭，會發現夜神月其實完全唔醒仲幾弱），但當黎到《L》連死神筆記都俾L燒埋，而家只係瘋狂科學家研製出足以滅絕全人類之病毒武器，相比寫個名就死病毒只屬尋常碎料，完全冇壓迫力欠威脅性，亦冇咁多思考性問題，變成單純動作劇情片，所以從頭到尾驚喜完全欠奉，情節至結局好多意料之內，整體劇情亦顯鬆散同慢。諗住有L會有睇頭？其實只係借用L個角色，但冇善用到佢出處背景，好似所謂二十三日期限根本冇利用過，全套戲唯佢一個天才，亦冇乜地方俾佢發揮超人智慧，老老實實，換著L以外任何角色都可以，而家揀L，只因有人氣夠呃傻仔入場。
「係講緊我。希望你冇份。」

作為《死亡筆記》延續篇，導演同編劇功力離合格預期差好遠，因為由《死亡筆記》奇幻懸疑降格至《跳躍大搜查線》之類寫實查案電影，並唔係大家所期望，而相比上黎，我甚至鍾意《跳躍大搜查線》多過《L》。你話慘唔慘？
「拿，講明先呀！《跳躍大搜查線》係激好睇的一套日本警探電影，只因題材相近先用黎作個比喻！」
商業考量絕對重於創作，令我感到失望，再者，無端白事又要加番日本式政治正確，頂佢唔順。即係你話病毒爆發會禍害全日本冇緊要。係唔係都要拉到全世界，特別係「地球上最貪婪最野心的美國」，但唔妥美國之餘又要拯救佢因為「平民百姓是無辜的」，最後多得日本人先拯救到全世界。我小。唔鍾意睇日本戲，就係因為頂唔順咁日本主義。好多時比荷里活大美國更難頂。

經過完全唔出人意表的結局（已經和《死亡筆記》原旨脫軌了），字幕過後，仲有隱藏片段。
「係咪L死左之後，地獄變身Krauser二世再現人間？」
係．．．就有天理了。係乜？自己入場睇啦。

「我要搵人祭旗陪我。」