Be Kind Rewind



從來對呢類充滿獨立色彩的小本/小品胡鬧劇大興趣,indie製作局限細又夠膽去癲,《低清老翻王》單望望預告片,知道一定要睇,

「有Jack Black份嘛!」

當而家個個都講《Pick of Destiny》,我仲係睇緊《School of Rock》,希望唔會俾人笑啦。我幾鍾意睇佢做戲,始終佢係rock友而且d歌夠白痴(木結他玩metal,on9的),做喜劇又確有天份。一向唔多會理中文譯名,好在《低清老翻王》係難得玩潮流加食字譯得抵死過癮,第時出碟,要開番個LD DVD格式俾佢先得。

「應該係LD VHS。」

劇情其實好無聊,某個仲煲緊錄影帶的小鎮(唔好笑,其實香港比唔少西方地區仲先進仲高科技,各位港燦請鼓掌),影帶舖因為Jack Black的磁力異能全部帶洗晒,為左生意,睇檔條友搵左Jack Black一齊自己開戲,d人想睇邊套就拍邊套,跟住自然係全鎮甚至全國受佢地d無聊戲越拍越多。頭半集中搞笑。

「雖然差好遠,但令我諗番起王晶廢片之一《電影鴨》。」

王晶雖廢,《電影鴨》其實有信息想帶出,就係當年電影創作被翻版同觀眾的膚淺愚昧打沉,迫於無奈胡亂創作,正經拍出黎觀眾唔會睇,拍到自己都唔知拍乜似乜時反而變成經典。你可以話王晶拍戲商業得黎廢,呢d頗indie的題材,又的確得佢會開戲講講 - 只係講,講得好唔好另一回事啦。照道理最搞笑就係呢部份但未如理想,Jack Black少左佢種神經質演出是好也是不好,劇情頗為謹慎唔夠放,拍第一套戲《捉鬼敢死隊》真係笑到仆街,可惜後勁不繼,同可能關係到大量較舊經典電影,好多戲翻炒時台下觀眾冇乜反應,初時仲有人識笑,後來場內笑聲接近冇,而整體上笑聲非常疏落,笑得最勁果幕都唔似過到半場,疏到唔似入場睇喜劇,可能題材上始終較偏,同香港人投入唔到西方幽默。自己就睇到有點感觸,又係涉及到indie關係,因為其中一樣野作者拎黎諷刺,係名氣比任何野重要,除左old-school同indie創作精神,仲有呢一點吸引我入場。好多人租帶前其實唔知套戲講乜,只因為套戲出名就睇,睇完就算覺得有問題、好似唔好睇,心理上都會覺得套戲係好野黎,因為個名、因為出名。我絕對明白加感受得到。只不過在現實面對相同情況的我,笑唔出。

笑完,名成利就之後,輪到現實同生活問題出場,後半套戲轉向溫情劇情。生意好、有人支持,但你係唔入流,無論幾有原則點樣堅持,照樣會被社會排擠,戲中「正派」的困境,係先有政府收樓,後被控告侵權,令全鎮人盡地一煲自己拍套戲做告別作,點知套戲勁多人鍾意。故事到此結束。下半部份導演想做到感動人,拍戲過程有d笑料,但虎頭蛇尾左d,本來話播完套戲政府就會拆樓,但成條街都係人圍觀,連本身黎拆樓班政府官員都睇到拍爛手掌,電影就在全無對白只有一片掌聲之下結束。可能係為第二集留個伏線,又可能係整個open ending俾各位朋友自行想像,但論個局,點睇都唔似大團圓得到喎,因為除左棟樓拆硬,產權署來訪時話有幾百萬幾千萬罰款,都冇講到點算?同《School of Rock》一樣,我嫌劇情太簡單太善良,好多難題冇交代敷衍過就算,同主角一班永遠吉人天相,好似乜都唔掂時突然彈個女主角出黎,咩都識咩都得仲樣樣都超勁,但話出現就出現,完全冇講過咩來頭,《School of Rock》都有呢d屈機位但駁得通你吹佢唔脹,今套戲劇本難免牽強左d。所以我唔信佢地下場係大家一套戲翻身,跟住全部問題解決晒冇事。因為而家個勢,點睇都冇可能。

「如果有下集,相信就會,始終喜劇,太灰唔得。」

只覺得導演同編劇功力差左d,但不失為一套值得支持的喜劇,但會係唔一定要入戲院睇,等出DVD或者電視播都冇損失果種級數(死,好似除左膚淺燒幾十億爆到七彩荷里活製作,劉Sir冇邊套戲覺得值買飛入戲院睇?)。《低清老翻王》教識左大家一個新字:

swede

動詞,即係自己重拍,全套戲重點所在,而且製作認真,拍好晒放上YouTube俾埋你睇架。唔夠喉?導演連自己套戲條trailer都swede埋,夠黐線!好明顯導演覺得套戲上到位,可以帶起個swede潮。可惜,未夠。