子彈危機之消失的真相


早幾個禮拜先話冇好戲睇好悶,暑假一完立即幾套勁野一齊上,單今個禮拜已經睇三套。《生化危機之滅絕真相》其實冇諗住睇,因為成個系列game好勁但戲相反第三集開始慢慢爛,不過間唔中開電視睇到唔覺唔覺睇晒頭四集,既然上新一集點都想追埋,同最重要一點:豪華有上。就去睇了。應該話,就去中伏了。


其實Bio Hazard本身除左氣氛一流劇本都唔算差,電影頭兩集未叫好好最少拍得出原著horror action AVG種感覺,遊戲改編電影黎講係難得改得拍得成功之罕有個案。但第三集已經慢慢唔理故事一味死打,冇horror冇AVG得返action仲要無端端玩超能力心諗做乜春,有睇第三集後半同第四集開頭都會明有幾悲哀。今集一開始係第四集結尾連住落開頭開得非常好,可惜有頭威而完全冇尾陣。


我睇過最冇劇本冇故事的動作片係《Mortal Kombat》,只得前設跟住一味打連文戲都冇乜(但神奇地拍得唔算好爛),而今集生化危機拍得住MK咁mk,簡單黎講正派去到一個場景,打雜卒,打大佬,打贏去下一個景,重覆,繼續,打到去終點就完,即係同你上Youtube search「XXX fight scene」冇分別,令BH電影系列由最初真正能夠將一隻遊戲轉型成電影,退化回用遊戲模式主導電影,而且一味玩槍戰真正長處埋身打鬥發揮得非常小,其實導演知唔知前幾集劇本衰極都有人會睇正因武指做得好呀,結果李冰冰是正的但親身出手打得一小段,而真正好睇之動作場面只得一開始同最後,中間淪落成Mortal Kombat X G.I. Joe仲要喪屍都唔見幾多隻,簡直睇到你喊乜呢套仲係Bio Hazard黎咩。吹脹是結局即係打爆機之後話你知,原來頭五集只係前傳,跟住仲會長拍長有繼續落去可以長過星球大戰。好在豪華星期二場$51包埋眼鏡先冇咁灰。但跟住任佢拍多幾多集,都係同之前一樣等電視播算。早知今晚返屋企睇同樣唔多好睇但相比下一定好睇得多的《Perception》好過啦。


「雖然劇本廢係預左,有一點實在犯駁得好緊要:上兩集先話成個地球變晒沙漠同廢墟基本上滅晒國,今集又話Umbrella仲會搞咁多野一直研究病毒係為整生化武器賣俾唔同國家賺錢。到最後結局,又話全世界得返白官仲有人類生還者,即係全個地球得返美國一個國家。矛盾得好緊要喎。」


「同,我而家少打機你都唔好呃我,最後果隻明明係mutalisk黎,乜我睇緊Starcraft電影版咩而家。」



好在跟住一晚《消失的子彈》唔錯補返數,奧海城簽卡買飛仲有九折。因為呢類懸疑戲一講白少少一定會提到劇情,所以先簡單總結:老實令子彈消失個諗法幾特別,最後局中有局未算好突破但處理得唔錯,只係劇本寫得好時導演喜好留白,好多野需要自行意會(或穿鑿附會)先會明白全個故事來龍去脈,好在亦唔算太夾硬或講唔通,但港產或國產一向少偵探懸疑片,編劇同導演算上乘,而且製作水準不輸海外,及贏在可以面向國際。


拍得好睇的港產或國產戲唔少,講起子彈立即就會諗到《讓子彈飛》,但大多都係好睇之餘地方色彩太重難賣埠,《消失的子彈》則唔會過份中國式並帶點西化,睇完覺得鬼佬有機會黎傾買劇本翻拍果種 - 根本將個故事搬去西部時間設定成拓荒時代,已經係一套西片啦。打戲唔多而拍得明快,好事黎一濫就好似荷里活架喇,笑點唔多但度得幾好,即使有瑕疵已經係我睇過覺得最滿足國產戲之一,同類之中好過對上一套睇所謂中國式偵探片《狄人傑》唔知幾多倍。不過有樣野非常頂唔順:黎到香港自然要配廣東話,但配音唔止語言一項,對白都需要本地化,單純用廣東話去讀一連串好唔廣東話的對白,係非常非常柒的。


再繼續講就會提到劇情,講明先呀嚴重劇透呀,未睇而打算睇就唔好睇落去喇。






最初覺得兩條女可有可冇,當然有好過冇啦(第一次睇楊冪,真係無能敵地正),但到頭來其實好重要。成功完美殺人但超少戲的江一燕負責帶出主題「壞人只是變壞的好人」,就係講最後謝霆鋒。叫出多少少鏡的楊冪原來唔只為除衫,仲做埋收風同做中間人,令謝霆鋒可以將開頭一單完全無關的子彈失竊案變成消失子彈疑案,換言之冇楊冪就唔會有成場復仇鬼殺人疑雲。不過係咪懸疑片潮流就是畫公仔唔好畫出腸?當中好多細節冇刻意指出或重覆,好似楊冪個角色唔諗深一層真係以為只為除衫俾你睇,就連最後劉青雲搵謝霆鋒罪證僅僅幾個簡單畫面帶過就算,所謂密室殺人其實亦冇破解到,臨尾兩人攤牌只得五條問題,兩大男主角要型嘛講野當然簡短啦點能夠長篇大論,所以我明白到成件事係點,但相信好多人即使覺得套戲拍得好,仍然會話個劇本好空洞好多問題。


我主要不滿只得兩樣,除左頭先講過廣東話對白柒到爆炸(好似冇睇過幾多套廣東話版國產戲唔會出現相同問題),就係因為好多野唔拍得明顯低調處理,反而拍唔出謝霆鋒處心積慮同魔性,好似今日廖啟智為鎮壓工人殺左個女工,第二日佢立即知道件事兼諗到成個局點佈,第二晚已經開始幽靈子彈行動,未免太神。而只靠簡單一幕拉有錢人但告唔入,未夠完整建立佢想奪位掌警權以彰自己心中正義之動機。同,喂我厹黎架,俾楊冪除多少少衫得唔得呀?