「寫得正，尤其英文翻譯。睇戲都學到野。公關部應記一功。
雖然，用戲名做下款，好怪．．．」
想知一套戲劉Sir會唔會睇，
「好易知道。」
《Cloverfield》100%符合佢要求。大怪獸加大災難同狂死人，最重要係由套戲公佈到上畫都完全唔知做乜，只知道幾條友拎住部機拍怪物搖下搖下，
「好cult呀！」
就中晒招了。明知（好大機會）係廢片（正面黎講，cult片），照去睇。
香港一月十七上畫，十八號上Yahoo搵時間表，順便睇睇影評，上畫一日已經有超過二百篇留言，其中八成以上只俾一粒星加怒插，
「套戲由頭到尾都係搖黎搖去唔知睇乜」
「最驚慄是隔離G段某個位小姐嘔到九彩行出戲院」
睇埋影評，爛片王如劉Sir更加冇得唔睇啦唔睇真係對唔住自己。旋入場。
第一次睇到宣傳片，係去新世紀排隊買《AVP2》（此先為之爛片）戲飛時睇到，頭半拍班人開party，但角落頭個中文名《末世凶煞》，點睇都同畫面唔夾喎？跟住係噉爆又拆樓又爛自由神像，一班人拎住部cam走難，完全唔知做乜只知怪獸襲地球。因為係J.J. Abrams出品。此君主理過《Alias》同《Lost》，都係玩懸疑玩解謎作賣點，條友編劇確係一絕，《Cloverfield》亦貫徹佢一片謎團（正確點係唔知做乜）作風，同以低成本造出大製作場面，雖然宣傳唔勁加全部演員茄喱啡，但「以無宣傳為有宣傳」同導演個朵，就吸引到好多人．．．中招了。非常明白點解一晚間Yahoo可以引黎咁多人狂鬧套戲。
講套戲前，又要講講其他野先。冇錯我最愛小爆百老匯。因為時間就唔到上唔到新世紀，朗豪坊又冇，唯有揀百老匯。十點十開場，十點半去排隊，前面得十幾個人，都差唔多開場先到我。排到去先知得咁大條隊得一個阿叔同一個阿姐，阿姐幫緊兩個人唔知唔見飛定信用卡訂飛點點點查飛，即係得一個櫃位賣飛，但個阿叔超慢，收完錢找錢可以找半個字，又要成日行黎行去，我前面個人買張單人飛，咁簡單都可以用左差唔多成個字。簡直黐線，好耐未見過咁差服務。全戲院得張啟示可取。
同唔知點解，入百老匯睇戲果班確係冇乜「戲品」。十點十開場，十點九個半入到去，剛剛播緊《長江七號》預告片（原來套野係周星馳tribute番周星馳自己，好似冇想像中咁差喎），全場坐左四份一人唔夠。一搭正十點十，立即四五十人墟陷入場，直頭要停埋片頭等人坐低，遷就各位大老細搞到遲埋開場。相同情況差唔多次次黎百老匯都會發生，但其他地方少見。點解？
「又唔係好坐，又唔係好睇，音響又唔係勁，飛又唔係賣得平過人，服務同環境仲差，我肯定唔會再黎！」
劇情，睇完預告片等於知道晒90%，亦相信除左我身邊冇幾多人會有興趣入場睇（尤其見到十個有九個話唔好睇之時），都唔怕寫多ｄ詳細ｄ。主角出國，臨走前同條女散左，突然出現巨型怪物襲擊全城，主角加三個陪祭旗大茄同佢一齊返去救人。你知道咁多就夠。其他野？接近冇（合理）解釋過。特別在套戲模仿紀錄片，一開始先黎字幕講你知「黎緊播映係軍部於民間拾得之災難片段」，檔案名稱就係「Cloverfield」亦即戲名。做得紀錄片，就係用一部攝錄機從攝影師角度出發。聽落同幾年前小本大收經典《The Blair Witch Project》相同，但今套好似去得仲盡更加直接。初時見影像部門劣評如潮，搞到我好期待（．．．），點知對我黎講，套戲其實算拍得好清楚，有ｄ位我仲嫌有時「身處突發災難之業餘攝影師」拍出黎角度同穩定性專業過頭添！（．．．．．．）完全唔明點解會有人睇到暈睇到嘔。
「劉Sir有問題卦？當年比卡超一秒十幾次紅藍狂閃睇到班細路頭痛屙嘔，佢睇極都冇事！」
一開始就係大班人歡送男主角，玩足三個字，為帶出角色關係，但三個字先入正題有點兒拖，尤其因為「攝影機的問題」片中偶然會出現男女主角以前片段交代二人關係，用呢個回帶插敘方式去介紹既特別亦唔會好似而家浪費太多時間。到怪物一出，預告片都睇到，狂爆炸（雖然唔明點樣整爆？）加自由神像頭飛天，成街成城亂晒，然後大家走佬的走佬救人的救人，主角四人一面走一面拎住部cam拍低晒所有野作為「歷史見證」，十分有心。所以你諗住係《哥斯拉》睇軍人打怪獸，死硬，唔係套套美國片都係荷里活出品架，《Cloverfield》係以受難平民第一身感受災難，特技同大規模場面雖然如宣傳「低付出高效益」但唔多（控制成本？），賣點之怪物都係逐少逐少俾你睇，好多時明明個鏡頭再定多半秒你都睇到隻野到底咩樣，都要刻意移開或者拍到好朦，一直到最後結局前先有正式全相睇，全戲最拿手之吊你癮好戲莫過於此，只係公開後完全唔恐怖冇驚喜，縱使佢重要性唔及其他怪物片，設計都顯得過於普通同交差格。
全套戲最強梗係隻怪物啦，無敵到炸彈掟到正都殺唔死，都唔夠幾位主角＆大茄黎。前半仲好地地。一到後半全部變神人，可以徒步行幾個火車站再勇戰怪獸跑多幾條街再走五十層樓梯全程一氣呵成，女主角鋼筋穿體只係暈低冇事，救番起仲滴血不流加健步如飛，大家上晒直昇機俾怪物一野打番落黎，居然機師死晒三個只係受受傷咁大把，頂會唔會其實佢地幾個係超人呀應該係會變身再合體打退隻怪物架？到最後大家期待的攝影師拍完怪物全相之後，怪物一啖食左佢，條屍居然完整加一滴血都冇？同食左一個人，在場仲有男女主角，點解佢兩個反而冇事，仲可以執埋部cam繼續「紀錄歷史」？因為佢地係主角？就係同《我是傳奇》一樣，衰後半為打圓場去得太求祈唔夠說服力。最頂唔順係唔明點解幾個人咁有毅力死都要帶住部機，名正言順地死都要拍，連去到軍部基地咁高機密都照拍可也加冇人阻止，好多時放低左部機都要煞有介事返轉頭拎番。換著一個正常人，突然見到咁大隻怪物同處於生死之間，唔會仲咁有使命感去拍低一切卦？（不過我覺得如果我係當事人我會喎！）另外好多支節都係開左頭冇收尾，例如怪獸身上會放出蜘蛛型寄生獸見人就殺營造貼身恐怖感，但冇乜特別善用過出得幾次場就冇，另有寄生獸有偏好攻擊女性取向，同被攻擊者會好似異形爆體而亡甚至生出另一隻怪物之設定，到劇終都冇明確交代到；最後兩個生還者男女主角遇著地氈式轟炸係生定死，未知；轟炸過後隻怪物又死唔死得去，都冇講。但既然《Cloverfield》係事後軍方紀錄檔案，亦即殺到佢啦？似乎會有第二集。
而大家最關心果樣：
「隻怪物到底邊度黎？點解出現？」
戲中（接近）完全冇交代到（請睇落去）。因為導演預期你入場之前知道晒。又一個宣傳點係「《Cloverfield》係拍俾internet同youtube世代睇的災難電影」。YouTube就係玩第一身，正如戲入面見到好多人係唔係都要拎部電話影一餐，而internet，其實上畫之前套戲已經整左一個虛擬現實，用好多仿真片段同網頁作宣傳，想知道需要上網睇實幾個網頁同玩好多解謎遊戲，風聲就係經此慢慢放出黎，吸引到你日日追同辨認當中線索，再加上網同其他人一齊討論，已經係一個最佳宣傳途徑同用噱頭吸引更多人留意。當你睇晒咁多網頁文章影片，會知道晒套戲前提同部份應該知但電影中唔會講之背景資料 － 例如怪物源頭 － 就到正日入場睇戲了。外國而家電影同遊戲推出前宣傳就係玩到咁大咁認真，NIN 07年新碟《Year Zero》都係噉玩法，當今市場學已經唔止電視網頁賣廣告咁簡單，而要做到真正全世界廿四小時互動，成個internet就係一個大playground。激成點？睇完返到屋企上網，有個網頁睇完唔夠兩個字已經俾人update左唔同晒，再過幾個字又變晒樣。但香港唔多見有人敢玩全城參與虛擬現實去宣傳。投資回報不符卦。就係上網睇睇，先知道原來作為片尾睇落冇乜意義之一幕回憶，箇中暗藏怪物來歷玄機。頂。冇留意到添。因為上一幕係成個紐約俾軍隊炸到七彩，下一幕變番男女主角渡假，就入片尾字幕。你話有邊套戲埋尾埋得咁突然咁反高潮先？點會去睇段回憶片段講乜呀？加上咁多野冇解釋到，係咪迫人買隻DVD睇番製作特輯同導演解說？
作為寫實紀錄片，全片除左只得第一身角度，仲真係乜音樂都冇，最後播字幕都要靜番半個字先開始播片尾《Cloverfield Suite》。除左「暈」，香港人另一睇唔慣就係太靜，冇配樂從中煽情一番自然覺得悶。但字幕講到戲入面用左好多歌，點解唔覺？假如收音機電視機或者行街聽到ｄ背景音樂都計，就可能真係好多。另外呢類片往往臨尾懶係要有伏線，睇埋片尾先走，字幕完晒首Suite都過埋，播左一小段唔清唔楚之對講機信息。唔知係呼應番劇情，還是真係同下集有關係？
「一句，套戲好唔好睇？」
雖然係拍黎俾你親身感受怪物襲擊大都會之驚慌恐懼，我代入唔到完全冇感覺（冇腦卦），真係齋睇。但整體我覺得OK喎！因為根本冇深度可言，全程就係走難走難走難，過程冇探討過任何野角色亦唔深入，但夠晒風格而我鍾意有格，唔算極度滿意又未至於俾到一星咁差，只係連埋字幕都唔知有冇八十分鐘，太短，唔值戲飛價錢。而最大得著，係呢種戲香港冇可能會多人鍾意只可以hype，同
「記得千祈唔好盲目入戲院睇戲。」
仲有樣野，一定要問問：
「部cam咁多電咁大容量清過高清仲要襟捱襟撞防水防火連怪物咬加炸彈炸再高處墮下都唔爛唔壞，咩牌子？」