雖然早幾日到左批新貨，執左三日仲未搞得掂，唯有，一來今水貨瘋狂地多，好難得有新貨到後多人（香港black metal收藏家梁生，特地上黎同大家分享「叫床黑金」，笑到仆街），前排放飛機搞到我唯有睇《頭條新聞》渡日的Rock爺，今日終於蒲頭，仲帶左「'80電影回顧」開幕電影《Crossroads》上黎。我剛開始聽metal即係零幾頭，呢套1986年cult片曾經潮極一時，全因最後主角同Steve Vai結他大戰，果陣未有YouTube同BT，上網仲要得56K，1MB寬頻已算新高科技未普及又貴，download＆搵戲困難而家十幾倍，申請到寬頻上網，第一件事想搵兩條片，GUNS N' ROSES《November Rain》MV之外就係《Crossroads》場終極大戰。果陣條片紅得好犀利，就同後來的CoB、CoF，同再跟住的TRIVIUM、LAMB OF GOD一樣，屬於唔識冇睇過會俾人笑果種，不過而家仲有幾多人會記住會理呢？結他手時代，甚至「真正metal」時代，已經隨住metalcore進軍、大label將metal商品化而過去。記得extreme metal「潮完」到metalcore橫行時，有次同個客傾開結他佬，提起James Murphy，問番轉頭
「你講邊個Murphy呀？係咪想講Matt Heafy呀？」
以前好多人名係必須要識、要聽之基礎。呢個年代、對住呢一代人，仲有多少人識Steve Vai，我都唔敢講。
可能呢個緣故，加上套戲定位幾怪，搞到無端端cult左。老實講，題材拍攝製作通通唔夠cult（「未夠爛」），能成為cult片全因題材特別，同最重要流通度低想睇搵極唔見，hype著hype著就cult左了。有幾難搵？以前只得LD，亦唔多見出過新版，一直到近來Rock爺撞到隻DVD，旋買成為開幕電影 － 係我知我地蠢在唔識download。查實我都未正式睇過全套戲，以前隻碟想買都買唔到，上網搵人放鬥結他條片幾百MB拎得晒已經難得，果時harddisc三十激已經算大架喇收file要諗過度過，傳file又慢，點似得而家郁下harddisc幾百激又1000MB光纖有理冇理download晒先算？
講故事之前，要先提提Robert Johnson：佢係blues中殿堂級大師，短短幾年間從籍籍無名變成唱、彈、作皆全能之天才，可惜三十未夠英年早逝，生平作品僅二十九首，已影響往後無數樂手及藍調至搖滾發展。咁後生咁少歌超越古今blues界幾近所有人，加上當時係二十世紀初，自然衍生出佢同魔鬼交易換取一生成就之民間傳說。
「聽metal之前，我都聽過一排blues架，騎騎∼」（不過呢個時代，上個網睇睇Wikipedia，人人五分鐘變專家啦，有乜好稀奇呀）
《Crossroads》故事建基於Robert Johnson傳說，主角係個古典結他神童，偏偏迷上Robert Johnson鍾意blues，相傳當年廿九首歌之外仲有一首流失民間，幾經辛苦搵到當年同Robert Johnson共事之Willie Brown（真有其人），為左得到第三十首歌之秘密，就從老人院偷偷帶佢出走去Robert Johnson故鄉密西西比。故事就係咁簡單，圍繞二人點樣結識、上路，到最後原來當年阿Brown叔受Robert Johnson指點（老點？）同魔鬼交易，老來後悔想取消契約搵番自己靈魂，就用子虛烏有之第三十首歌昆條靚仔帶佢出黎同魔鬼交手。交易過程參照民間傳說「史實」：到一個指定十字路口表演可以招惹魔鬼，從而出賣靈魂成為史上最偉大音樂家。
「如果拎住枝ESP去個十字路口彈《Master of Puppets》，係咪可以召喚到重金屬魔王出黎？反正皆旺就近，搵晚去彌敦道同亞皆老街交界個路口試試！」
原來幾十年前已經興打《Guitar Hero》，想同魔鬼討價還價，就要去佢地頭同班靚鬥彈結他，因為阿叔只識吹口琴，條靚仔自告奮勇做架樑幫佢同魔鬼頭馬Steve Vai隻抽，抽完就爆機冇交代任何野。全套戲故事完整但唔突出，「女主角」更是可有可無，講到大家中途相遇，走左段路各散東西，只得中間三分一有戲做，結局直頭見佢唔到，重要性低無可低，不過我欣賞打完大佬居然唔「大團圓」、主角最後冇女攬，以臨尾一定要抱得美人歸之正氣電影黎講，如此編排都算破天荒了。其實由出走至決戰中間全段，大量情節就如女主角一樣，加入冇影響，減左亦唔會出現問題，呢類故事正路梗係講主角彈blues火喉未夠，阿叔傳授佢畢生功力，最後得道再戰勝魔鬼，可惜前提主角係個天才，兩個人路程上交流唔算深入，睇唔到主角成長同二人情誼發展，就連臨尾打爆機都唔覺得佢點樣艱辛，最抵死佢從頭到尾都唔知／唔信其實同魔鬼打緊，自己做緊乜、俾阿叔推左出去送死都唔多明。如果一離開醫院立即cut到去最後搵到魔鬼鬥Steve Vai，已經可以完場，所以我地可以推論，幾近棄之無所謂的中段，純唔想變成電視劇半個鐘完場（拍OVA都唔止半個鐘啦大佬），導演好辛苦係噉度橋駁到個半鐘長總叫算套電影，而無存在價值的女主角除顧及商業因素（一條女都冇，搵鬼睇咩），應該係男主角收到劇本時見得佢同阿叔兩個由頭做到尾，就開條件有女先接，導演唯有夾硬加個女角入去同佢拍番場床戲，等佢肯接套戲拍落去。
「難怪套戲cult得起，某程度上導演同編劇都幾爛。」
未必好多人知道，開拍《Crossroads》箇中潛藏好多陰謀同江湖恩怨。劇本將主角塑造成古典結他奇才，卻撞左入blues世界，面對玩hard rock的Steve Vai唔夠抽，都估到超必實係摷番古典一套出黎，用八十年代結他紅人必玩之Paganini《第五隨想曲》屈機（最紅版本莫過於Jason Becker，仲要正正《Crossroads》跟住一年cover，佢係咪睇左套戲？），neo-classical反敗為勝。當年出名結他手唔係少，Steve Vai經歷Frank Zappa、David Lee Roth同ALCATRAZZ三個事業階段未到最高峰，會搵佢因為樣夠邪同未算出名唔使俾咁高片酬？另有內情也。話說果陣佢已有能力議價，覺得戲入面要輸俾個靚仔好樣衰，加上講佢彈古典野彈唔到影響形象，要求天價片酬先肯拍，結果一個人佔全戲總投資40%，唔好睇少簡單幾段solo呀，每撻一次Q使片商十幾萬架。你會問點解會有人咁捨得投資？皆因製作公司叫Rising Force Production。有聽結他佬、留意八十年代rock & metal，都知果陣Steve Vai係Yngwie Malmsteen主要競爭對手，Steve Vai已經諗住用電結他玩古典快佢一步成名，YJM心知技術同創意唔夠黎，決定用旁門左道打擊對手，匿名投資《Crossroads》請對方參演，再重點宣傳最後「Steve Vai輸俾neo-classical」一場，搞到個個以為Steve Vai彈古真係唔掂，形象如計劃中大挫，輿論搞到佢意興闌珊放棄發展新古典，YJM就乘勢上位成為neo-classical教父同八十年代最紅結他手。其實最初劇本構思，一直唔提主角個名，到最後鬥贏結他，Steve Vai臨落台問佢：
"What's your name?"
"Yngwie Malmsteen."
就真係串到爆，不過YJM覺得編劇編得太過出面，最後版本就如大家睇到，陰ｄ陰ｄ更好玩又唔怕惹禍上身。其實戲中另有政治宣傳元素，始終YJM係瑞典人，而美國人種族主義強，就順便用套戲幫自己鞏固地位，向被美國人歧視之黑人成為代罪羔羊：戲中黑人一直被白人欺壓；黑人靠出賣靈魂換取成就，白人靠自己努力；魔鬼同鬼下奴僕都係黑人，白人角色係正派；全套戲最勁兩個都係白人，黑人都要靠白人救、靠白人幫佢地出戰；黑人音樂縱使源遠流長，始終不及白人音樂．．．到頭來，又係踩低黑人抬高白人之種族主義電影，透過攻擊黑皮膚「共同敵人」，令YJM得到美國人信任。雖然投資唔細，但用半套戲開支打殘最大對手同幫自己「入藉」美國簡直超值，雖然呢個波折令Steve Vai看破俗塵，最後摻透禪宗四年後出左「zen rock」《Passion & Warfare》一舉打沉番Malmsteen，又係佢當初始料不及。
「．．．剛剛先醒起，今日未食藥。」