我對EVA canon版結局即係《Air／真心為你》相當滿意，劇本夠張力打到飛天又冇乜dum波鐘仲要睇得明（呢樣好難得），而且配樂秉承電視版同《Death》傳統非常強勁睇完我特登買左隻soundtrack（其實電視版四隻（好似係）soundtrack都好值得買，當年信和仲係超平台版碟當道時唔識貨，而家想買又唔知邊度搵得返，可惜）。所以當話有新電影版，一整就要整四部曲，而未睇戲單trailer已經同正史非常唔同格調，擺明係想維持返電視版頭三分一種少年漫畫風格延續落去，一早預左是個好大機會連中四次的大伏。《序》同睇《Death》一樣不過執到好靚所以冇事，《破》就開始大鑊真係太過少年漫畫冇晒應有迫力，同當講到二號機可以自由暴走，即係將已成真實型機械人最頂尖模範之自己貶低到一般超級機械人層次，完全偏離正史世界觀設定，最後又無厘頭第三次衝擊，就知道呢個新補完劇場版四部曲註定失敗。《Q》果然不負眾望，上畫第一晚九龍區全部戲院七八點場坐無虛席幾乎連頭三行都坐滿，放工去菜街百記買飛已經得返最後一行最角，亦因為咁爆場，完場果下屌聲氣勢先能夠咁磅礡。
「黎緊擺明劇透，所以諗真先好睇落去。不過其實冇乜所謂，今集劇本，拍得住《風雲》咁空洞。」
「同，其實套戲遲左咁耐上，有心睇一早上網搞掂啦，相信冇幾多人似我等到佢香港肯上畫先至睇。」
打戲係今集重點，個半鐘頭入面頭半個同尾半個都係打，而頭半個鐘是水準所在畫同設計都精彩，航空戰艦打機械獸重拾庵野秀明前EVA名作《冒險少女娜汀亞》份震撼。不過，問題：乜我唔係睇緊《新世界福音戰士》咩，你俾《娜汀亞》我做乜？同，點解要有飛天戰艦呀《宇宙飛龍》咩大佬，再次證明作者有心學高達之流將一部真實型傑作降格到一般超級型少年漫畫水平，就係為就返而家代人改到易睇易賣易賺錢，而最後半個鐘場打戲比想像中普通有點反高潮，搞一大輪目的只係大條道理出多幾隻公仔同大量唔同裝備呃你錢。
除左灰仲有一種顏色就係白，同戲入面講到故事係上集十四年後發生一樣，中間到底係咩情況差唔多冇仔細講解過，只得一片空白。所以大把野你唔好預睇完會明，好似上兩集渚薰同六號機點解當初會身處月球，同月球上面有一大隻野係咩黎，唔知；上集結局明明第三次衝擊未開始六號機落黎一槍做低初號機停左，今集點解又話衝擊完，唔知；一開波初號機點解會封印左去太空，唔知；人類點樣分裂成兩大陣容，唔知；跟住隊戰艦兵團點黎又點解可以突然間咁高科技，唔知；其實一開始打果幾隻係使徒定人造兵器，其實而家仲有冇使徒，唔知；兩派打生打死為乜，都係冇人知道，包括戲入面咁多人；最後無端端又會由一枝槍變左做兩枝，第二枝新槍係咩黎，唔知；點解六號機會走左去地底匿埋咁多年，九號機同十三號機又點解會變使徒，唔知；又話要集齊兩枝槍先可以再衝擊，但而家明明唔係要果兩枝，點解都衝擊得到，同衝出黎會點，唔知；渚薰明明可以唔死點解要佢死，當然唔知。總之，一概唔知。我只知咁多新機新人物造型，現具廠周邊廠又會賺到笑。跟以前唔同係，舊時唔知係深到你唔明，今次係擺明連個故事都未度晒就趕時間出左第三集先，睇完唔知點解，庵野秀明話關我Ｘ事咩，唔好睇第四集丫笨。
而且導得都幾差，全套戲動作場面放晒頭尾太唔平均，搞到中間一大段文戲超悶，之餘仲要搞到超基，基到碇真嗣本身唔識彈鋼琴但一變基佬立即彈到李雲迪咁勁，就連部機都要兩個人一齊坐，結果變左笑片，好似當初隱隱晦晦咪幾好（其實我睇電視版完全冇諗過有任何基的成份，或者是我太天真），點解硬係要跟潮流搞到咁BL咁鬼腐呢，立即做cheap晒自己，你諗過入戲院睇EVA會睇到全院不停狂笑未？同今集角色設計得太差，難得《序》《破》一改本來黑暗風格人物變返正氣光明，《Q》全部回歸電視版種extreme emo，好似碇真嗣上集打到咁威咁勁似返個英雄，今集變返傻仔任人老點，不過我係佢都會崩潰，因為《序》係人地迫佢上初號機，《破》係人地叫佢去打使徒，係跟住打打下唔知點解就第三次衝擊，根本唔關佢事，但十四年之後成班人就話「當年都係你衰啦搞到我地陷球鏟」，真係神又佢地鬼又佢地，難怪寧願做返人地講乜佢就信乜的傻仔好過，同最後明知冇用都夾硬整多野衝擊累多次街坊攬炒。明日香變返得個嘈字，綾波零臨尾又無端白事改邪歸正幫手打使徒，全部唔配合應有性格，都唔及夾硬整出黎的真波希，新版上畫前講到點樣突破點樣重要點知超少戲，可以如入無人之境偷入特務機關偷架二號機出黎，跟住仲要完全冇人覺得有問題乜事都冇發生過一樣，證明根本冇人覺得需要理佢，今集出黎亦只因為夾硬整多架八號機入去賺錢，但個角色同其他人完全抽離晒，連同故事發展有關戲份對白都冇乜，根本冇左呢個人甚至冇埋佢部八號機都唔會對全個四部曲有任何影響，講到尾又係為開拓多條財路而整出黎的垃圾多餘角色。而渚薰就係變化最少果個，同第廿四集一樣一副世事都被佢看透了的樣子再加大量玄到爆炸對白，做到好深謀遠慮運籌帷幄噉款點知最後發現身為高高在上的使徒居然（又）會俾人類／碇司令fake到，柒到自己都頂唔順唯有自殺了事 － 到而家都唔明，佢身上面有個炸彈，本來可以唔戴戴完亦可以拆，點解最後係都要戴上身俾佢炸死，除左搵戲黎做典型日劇式濫煽情之外？難怪今集要叫《Q》，因為睇完你會大大聲爆一句
「頂到底你地做乜Ｑ呀？」
所以我寧願真係延續上集將《新世紀福音戰士》「《娜汀亞》化」方向，變成一套簡單人造兵器打使徒熱血機械人動畫算，單睇頭半個鐘都知道要噉做絕對可以拍得好好睇，可惜背負EVA之名總要故弄玄虛，明明可以講得好簡單令你一睇就明，都要夾硬整到好似好深奧好多潛台詞先滿足。都算我當為睇打戲入場完全唔理一切前設同劇情，都一路睇一直覺得唔對路，冇錯構圖同動作設計唔差，但畫面已經唔再係EVA，而係CG。對新一代動畫反感除左故事＆人物越來越低能仲有慢慢用電腦代替畫筆，上集CG主要用黎畫使徒其實效果幾好，帶出兩種生物生存於對立層面，但今集差唔多所有機械野都要用CG，結果冇晒真實感同動感，尤其架戰艦簡直膠到無倫。片尾下集trailer又係好Photoshop，死好驚會走火入魔到除左人係畫之外其餘全部變晒CG整，到時就連唯一仍勝現今動畫之處都冇晒。
講起trailer，上集預告差唔多一幕都冇出現過，如果按住條trailer拍應該係講中間十四年發生咩事，而家完全跳過晒，係咪作者都知自己一集要幾年先拍得成分分鐘第四部曲要多三五七年至有得睇，就留返呢十四年空白襯中間出返回外傳又賺多筆？而且個劇本開始爛去到不斷輪迴打使徒＞EVA同使徒合體＞第Ｘ次衝擊＞渚薰出黎殺人或自殺停左衝擊＞繼續打使徒無限loop屎橋，而家人類差唔多絕種，幾擔心最後一集可以點埋尾，尤其今集已經十足連大劇本都未寫好晒就拍左出黎先算咁鬆散，但係好大機會到頭來點樣解畫都得。一路以黎渚薰都講到好似一早知道所有事、講到好多野可以由頭黎過（其中一句對白就係「不斷重覆直至自己覺得滿意」），而第四集副題係個重覆符號，即係好大機會原來一切只係其中一個可能性：記得《真心為你》入面講到碇真嗣成為最接近神的男人可以按自己心意創造新世界嘛，所以可以話原來大家一路存在於《真心為你》個創世時空夾縫，新劇場版只係其中一個碇真嗣想出之可能性，而只有渚薰有保持清醒同遊走於所有虛構／平行空間之能力，不斷去修正直到出現一個最好結局為止。換言之，四部曲完左之後，其實成個系列仍然可以繼續同人誌式無限發展落去不斷賺錢。
總結係，純粹為睇打戲，叫值得入場，你頂得順中間悶＆基到喊的話，但如非超hardcore fans亦冇打算要追晒全個四部曲，可以直接跳過今集等最後一部曲，反正留白太多劇情冇乜進展，直接睇第四集（或有可能出現的外傳）解釋返中間發生咩事會更易明白。而我睇完之後，只有好大衝動想重溫《冒險少女娜汀亞》。邊度搵得到？