G高達係高達十六週年大作，全套四十九集，作者一係真係超級想搞新意思，一係擺到明唔妥高達，如果唔係高達做得軍事史詩故事，十六年之後黎到G唔會變成高達頭龍珠身之笑片。無論事實係點，睇完之後，只知道作者絕對係個究極香港fans：G高達故事係講未來人類已經搬出太空，而果時冇晒仗打，地球同宇宙之操控權係由四年一度之高達格鬥大賽冠軍國所持有（擺明學世界盃），故事入面地球同宇宙大佬係新香港係地球大佬（！），而香港首相（！）係似足周潤發亦扮足賭神之黃潤發（！）（有冇發覺好多日本動畫同日本gameｄ中國人角色都叫／姓黃？），而香港代表選手就係東方不敗（！！！），少林最終奧義係真流星蝴蝶劍（！！！！！），決戰擂台地點係啟德機場（！）、大嶼山同太平山（！），仲有皇后大道東（！！！），甚至插曲都係廣東歌，唔係搵ｄ「識廣東話」日本人唱下就當係，而係真係黎香港買廣東流行曲做插曲，當中仲有首軟硬式rap歌（！），係值得為呢套野買番隻soundtrack。就算你唔知咩係高達、未睇過G高達，基本上睇到呢度，你都知道呢套野一定係超超超超超級無聊。

未夠。最大劑係ｄ高達，完全顛覆晒以前所有高達之概念，睇睇ｄ名：風車高達、鬥牛高達、維京高達、人魚高達、魚蝦蟹高達、眼鏡蛇高達、班馬高達、獅身人面高達、小丑高達、大象高達．．．唔使想像咁多個名係乜部野就係乜，即係大象高達就係好簡單地高達頭大象身之高達。死未？都唔夠美少女高達咁難頂（唔使講乜野係美少女喇卦？）。可能ｄ設計實在太七，好多出個場已經死左，我好關心有冇模型賣？俾我買番隻大象高達都好丫大佬！（．．．）

大奸角ｄ機名好型：笑傲江湖、獅王爭霸、天劍絕刀，但唔好意思，只有天劍絕刀一部係名同機都咁型，其他果ｄ名越型機越七，作者真係夠晒玩野，玩晒香港同高達。可以話佢將高達呢部真實型機械人經典變成超級型劇情，好似主角果邊一行五人可加埋「黑色隊員」，仲唔係戰隊格？而最「真實型機超級型劇情」係每一集主角最後都係要出大招打爆人地部機，基本上除左最後大佬，無論主角處境係點情況幾壞點處下風，只要一出呢招敵人即死，仲唔係超級機械人？但佢聰明過超級型係好多時都係一出場即出大招出場唔使一分鐘即做底人地，慳唔少時間亦唔使好似好多超級型機械人噉硬係要俾人打番幾個字先肯出超必 － 但你睇晒之後會發現，作者的而且確係要做到主角咁「超級型」，因為身為「宇宙格鬥技之王」之佢，無論坐緊高達定平日都係十秒鐘有九秒鐘係俾人打到仆晒街果隻，唔係噉樣一出超必乜叉都搞掂佢死左十Ｑ世。打亦非常之香港舊式武俠電影／電視劇格，基本上只有三種打法：1. 拳腳，作為香港武打電影、武俠劇同武俠小說tribute呢樣一定有，亦即係一定會有 2. 武器，問題係呢ｄ打鬥設計同場畫實在係唔合格，呢樣有ｄ失望。更失望係去到後半，打法變成 3. 絕招，但基本上絕招只有兩種，一係超勁爆拳／斬，一係出波，不出呢兩幅被，而無論你部係咩機有幾型／七，基本上ｄ大招都係出波，所以去到後半變到好似龍珠噉，鑊鑊打到最後就係兩邊一鬥波炸炸炸炸炸炸炸．．．其實仲有一招，就係 4. 爆氣，冇錯又係有睇龍珠都知點爆法，通常ｄ角色唔夠打果時，又或者係俾人圍毆果時，唔夠抽就會爆氣，一野爆九晒身邊所有人同野，主角當然係出得最多啦因為主角成日唔夠人打嘛，一唔夠人打又未到時間出超必就爆氣，爆一爆乜叉都搞掂晒所有雜卒陷晒家產快手快腳乾手淨腳，亦因為咁龍珠，雖然打係G高達重點，呢部份實在強差人意，因為進行模式不外乎拳腳＞武器＞出波＞爆氣＞超必（通常係勁ｄ既波）＞唔夠勁爆氣炸開人＞之後超超必（再勁ｄ既波．．．）＞不斷重覆直到贏為止。

就係因為噉，除非你真係好有興趣知呢套野可以有幾七，如果唔係頭果三十集真係可以完全唔睇，因為最後果二十甚至十集先至係戲肉，先有番戲味同有番高達果種深度、批判同思考性。玩到最後劇情就似真三一同新世紀咁誇張之宇宙滅絕大危機，但G高達要比呢兩套野同其他同類劇情達相同誇張程度之超級型機械人動畫再早ｄ。可能個作者擺到明係想做套cult，而佢絕對做到，所以鍾意無聊野的我非常鍾意呢套野（只限尾（二）十集）。