打擂台



連金像獎都頒埋先黎講,已經遲到無可再遲,依然想寫寫,因為2010年度《打擂台》唔係最佳香港電影,都會係我心目中最佳港產片。


話說上年年中臨落畫幾日先去睇《打擂台》,果排中左六合彩,開頭以為得廿蚊點知原來係六獎有$160(果陣仲係五蚊注廿蚊張電腦飛時代),成世黑仔的劉Sir中到百六蚊已經係大獎黎,拎完獎金立即走去投注站斜對面豪華戲院買飛開開心心睇《打擂台》,我承認當中加左印象分。(...)套戲一定要去豪華睇先夠feel,因為故事班底氣氛根本就係復刻一間院千個位上的豪華戲院場場戲幾百人坐爆大半場齊齊睇齊齊笑的當年情。講武館、講過氣武師今日重出江湖,擺到明tribute六七八十年代,台前大堆老坑後生一班唔關拍戲事的MC Jin已經叫最出名,套戲拍得成上到畫其實已經算半個奇蹟。另一半係,理論上會好老土好易爛,點知相反極度好睇,泰迪羅賓實在太神,對白精警到爆又多真係好笑唔係苦笑的笑位(後巷打交一句「望乜撚呀!」已經抵番晒成張戲飛啦),久違了的冇威也冇特技硬橋硬馬真功夫,同故事拍得出當中辛酸熱血意識勵志,我地八十年代長大一代入場充滿共鳴。而家仲搵得到幾多套港產片,可以令你相信市儈世利蝗禍赤化香港地仍然存在希望同理想?加埋尾片MC Jin首主題曲玩sample玩到癲,就連嫌JJ戲入面著太多衫,頒獎禮果晚都補晒數。真真正正由頭好到尾。


今屆金像獎候選名單,正路到訓著弱得可憐,某程度上《打擂台》入到圍加超多提名連最佳導演最佳電影都有,見證港產片市道已經衰到貼地。除左最佳男配角冇可能輸,最佳電影個人極度睇好,大對手是《狄人傑》,一套畫面劇情演出都唔可以話好之平庸商業電影,冇幾多套戲睇完會覺得直頭浪費左我時間而後悔,《狄人傑》好難得做得到。好可惜大製作、班底有名望有資歷就有贏面是事實,你話徐克拎到最佳導演我接受到,如果《狄人傑》贏到最佳電影的話我會灰爆,寧願俾冇驚喜但踏實所以贏面值高於《打擂台》的《劍雨》。好在最後都係《打擂台》贏。大力支持因為而家已經冇乜題材班底都地道的純本地製作,仲要主題如此正面,愛情片從來冇興趣,賣女賣肉唔使搵我,懶悲懶煽情唔會睇,王晶之類垃圾片更加冇必要理,武打片青黃不接加早被內地打星入侵見到角色大陸樣or講國語打到點精彩都冇晒心機,幾位大導仍有佳作但好多時太沉重。可以隨便入場開心笑笑之餘,當中有意思俾你思考一番,又能感受到台前幕後熱誠,最重要100%港味、真真正正可以同外國人講「This is 港產片」,就是《打擂台》。你仲未睇、你覺得唔會好睇,我極力推薦一定要睇番次。